On wara marha wîîkes awya so, ero yimaw tak repiatan poko tak n̂esepanîyasî Kporin komo. Tîkaciparan ke noro pen waihkesî. Porin xa mîn Noro kaciparan, ceipuru xa, kaman̂e ro mak oko. Ero ke rma noro pen waihkesî. Okoi mîk repiatan kar̂pe tîtosom, cekaramisom. Porinî ro mîk repiatan, tuuna imo kwawno ha. Noro pen tak waihkesî Kporin komo.

2-3 Ero yimaw tak waano aacoko, naatî pokono. Uupa yepu pokono aacoko, cepetaxmu pokono ha. On wara kesî Kporin komo ero poko, Owî rma Aporin komo. Onatîrî ween̂asî. Emapona roro wîhyasî. Onatîrî kurun me wasî yîwîrîmara ehtome yiixatî pîn komo. Katpanaw ween̂asî, kosope marha.

4 Yîrwomra rma wasî. Cekyekyem wara naxe ooxatî pîn komo. Noro yipu komo mokyataw owaparî me n̂examro chere rma kîwcesî. Wahsîyasî, wakn̂iyasî marha. Ero wara wiir̂asî noro yipu komo.

5 Anarimaw kar̂pe oyehtopo ke rma n̂ekaritocowpe. Ero wara n̂ehcowpe ooxatî me tak cehtome so. Ero wara cexitaw so ooxatî me tak naxe.

6 On wara tak naxe Xako yepamtho komo, n̂imicinwaxe tak iito tîrowon komo po. N̂epemrutunwaxe tak Ixaw Yana kom ha, n̂eperwaxe marha. Roowo tak nas amn̂e tawronohkatîkaxi ro mak eperîrî komo ke okre.

7 Ahce wa Ixaw Yana komo n̂etapekn̂e Kporin komo, tîîxatî pîn komo n̂etapekn̂e ero wara rma katî Ixaw Yana komo n̂etapekn̂e hara? Ixaw Yana komo rma re waihkekn̂e. Ixaw Yana komo waihkan̂enho komo waihkekn̂e ero wara ma re Ixaw Yana komo waihkekn̂e awya so?

8 On wara mak n̂examro mîpanarekn̂e Apa, men̂epekn̂e waapa komo yanton me. Ocowo imo n̂ekmexpekn̂e Kaan, resce n̂ixan n̂ekmexpekn̂e ocowo.

9 On wara kicicme Ixaw Yana komo yehtoponho poko n̂esepanîyasî Kporin komo, on wara marha nasî kicicme ehtoponhîrî komo yeperîrî warai, noro pîntho komo ya tîmsom yakn̂itoponho tak nakuhr̂apesî. Tooputho nakumhesî sororope cehso ro. Ero yimaw mîk hak warai me ciixapunhîrî pen exihra tak nas amn̂e, kotoporem yakn̂itopo komo marha exihra.

10 Pohra tak nas ewtotho okwe sowtatu yekenho rma. Tahsîpînkaxi nasî, yarîhra tak nasî mîîmotho mko iitono. Axawa imo wara mak nasî pohra okwe. Iito tak cuupu nahyasî paaka xîkrî. Iina n̂etîrapesî. Peen peremru marha nahyasî.

11 Twaihso exitaw iitono yakuxwere n̂ehkocesî. Wooxam komo mokyaxe akn̂iso. Yuhnari yentan̂e pînî ro mak moxam oyanan komo. Ero ke yîpînîn yawra nasî akîhton̂enhîrî komo rma. Akronomara nasî akîhton̂enhîrî komo okwe.

12 Ero yimaw tak tînatîrî yeperîrî potun̂e wara nasî Kporin komo. Ixaw Yana komo amyamro, awenmekyaxe so Ewpratesî pona rorono komo, Exitu Yaporî pona rorono komo marha. Cewn̂e so awenmekyaxe so.

13 Ero yimaw tuu kacho tak n̂encexe. Raatî n̂encexe porinî ro mak. Tuu kache tak mokyaxe waiporono komo Asiriu komo chewnonho. Mokyaxe marha Exitu pono komo chewnonho, iina emahcixapunhîrî kom ha. Kporin komo yakro tak nîmtapowaxe, Oporinî ro Amoro, kexe yîwya. Ero wa kexe Kaan yekenî ro po îh po. Xerusaren pono mîn Kaan yeken. Ero wara naxe iito.