On wara marha wîîkes awya so, ero yimaw on waano naar̂axe Xuta yepamtho komo, Kir̂wan on kewton komo okre, waapa nawkatorî ro mak kewton komo wacan. Kaanî rma nasî kukurunpen̂e me. Noro rma nasî kewton komo wacan me ha. Waapa yekahton̂e mîn me marha nasî.

2 Waaca metatan ahrunkacoko kir̂wan komo yewomtome kewton komo pona. Ero wa ahrunkacoko ewomtome so tak yaarono ponarono komo.

3 Ahwokan me roro amna miir̂asî Apa aponaro xa amna exitaw eponarononkan me ro mak. Ero wa amna miir̂asî Apa apona enîn̂e me amna yexirî ke.

4 Kporin komo pona encoko miya roro etowîn me ro mak. Xewpa Mîk Kporin komo. Toopu imo warai Mîk emacakanî ro.

5 On wara tko nasî Noro kyopono me xa cekaiporesom komo poko, kyopono mera tak noro yipu komo n̂iir̂asî. Mer̂pora exitaw so noro yipu komo ewto po n̂examro yewton pen macakesî Noro roowo pona roro. Tahrorope ro mak tak n̂iir̂asî ewto me ehxapunhîrî.

6 Tapihsom me mak n̂iir̂asî, cesemetanmesom komo napikrî me, yupurantamnî komo napikrî me ha.

7 Capape mak nasî takîhsom komo yesamarî. Ewtarî ken̂ehra miir̂asî noro yipu komo yesamarî, yîtîwîmra marha.

8 On wara nas amna Apa, awya tpanatanmetopo yaw roro mak amna nasî. Amomokyas amna. Awosotî yenta xe ro mak nas amna, awehtopo yenta xe ha.

9 Kosope amîtwo oyexi xe ro mak wasî expora. Enmapuche marha awenî xe wasî. Roowo pono komo yen̂ekache tak awya ero yimaw tak kir̂wan̂he cehtopo komo poko n̂ehcamhokexe.

10 Kicicitho komo yakronoman̂e me rma re masî. Wara rma ehcamhokara naxe noro yipu komo kir̂wan me cehtopo komo poko. Kir̂wan komo chew rma cexitaw so kicicme rma naxe okwe. Kayaritomo me xa Kporin komo yenîhra ro mak naxe okwe.

11 Tapockantaxi mas Apa. Awamorî yenîhra rma tko naxe okwe kicicitho komo. Ayanan komo xe xa awehtopo enpoko tak yîwya so. Ero wa awenîche nîhyapamyaxe tak. Nai xa wa ha wehto ahyaw Apa aaxatî pîn komo yakn̂itopo oco. Ero rma tak n̂examro pen nakn̂iyasî oroto rma.

12 Apa, ahwokan me roro amna miir̂asî. Nasî rma ha re amna n̂iritho kir̂wanî komo. An̂ir̂mexpothîrî rma tko mîn amna n̂iritho ahnoro.

13 Apa, ponaro amna yehtopo xa Amoro. Xatken̂e rma re anarî komo amna kayaritomonînho komo. Awosotî ponaro mak tko nas amna.

14 Twaihso thakwa tak naxe n̂examro, amna kayaritomonînho komo, pakahnî me ro mak tak naxe okwe. N̂exponkace ro mak, awomra ro mak tak naxe. Amoro rma tko mesepanîyakn̂e n̂examro pen poko. Mîhcamnoyakn̂e ro mak okwe. Ehtoponhîrî komo meero mîhcamnoyakn̂e. Ero wa n̂examro poko mesepanîyakn̂e.

15 Ayanan komo reha mepamnoi okre Apa, mepamnoye ro mak okre. Ero wara kir̂wan̂he awehtopo menpekn̂e. Amna rowon wokpan metakekn̂e porin me ehtome tak amna rowon.

16 On wara xatken̂e ayanan komo Apa, n̂esemetanmekyatken̂e ro mak okwe. N̂examro mîpanarekn̂e. Ero yimaw tak ehtura thakwa mak nîmtapowatken̂e awakro.

17 On wara naxe wooxam komo tarke exitaw so. Ewruyataw tak n̂erewasî oko. Aka, aka, kexe thakwa erewîmrî ke. Ero wara xa marha xakn̂e amna awero ro rma Apa.

18 Amna marha xakn̂e tarkem wara. Amna n̂erewakn̂e ro mak. Ocowo warai me mak tko amna n̂ewruyakn̂e okwe. Roowo pono komo yukurunpetopo enpora rma xakn̂e amna. Ewrura ro mak xatken̂e n̂examro amna xîkrî me.

19 Mîpakexe hara tko waihxapunhîrî. Oyokoputho yakro ro rma mîpakexe hara. Roowo chewno komo, awya so wîîkesî, Apakacoko, wîîkesî. Emtarakacoko tahwore xa awexirî ke so. Cicah ken̂e tak maxe, cuupu poko nasî cicakî pahxaxaro ero wara xa marha nas apoko so hara. Roowo nasî cewrusom wara. Waihxapunhîrî komo n̂enpesî ewruxapu wara.

20 Oyanan komo amyamro. On wara wîîkes awya so, awamtakpon yaka ka ewomcoko. Metata ahrucoko awewomuche so. Eseyamcoko ka yohno mak ha tko Kaanî rwonîmtopo cenatkaxi ro mak.

21 Enko xe ka, tîmîn yai n̂epatakesî Kporin komo. Roowo pono komo poko esepanso wa mokyasî, kicicme ehtoponhîrî komo poko n̂esepanîyasî. Ero ke pahxan pen komo kamxukutho tak n̂enpesî roowo, tîîpo waihkaxa pen komo kamxukutho ha. Tîîpo rma waihkaxa pen komo kamxukutho yeyamra tak nasî, n̂enpesî tak ha. Ero wara nasî roowo amn̂e.