Apa, on wara wîîkes awya, ponaro xa oyehtopo Amoro. Kyopono ro me awehtopo poko tan kîmtapowasî. Kir̂wanî ro me awehtopo wekatîmyasî mîk hak ya, cirihnî ciitopo awya. Amna n̂eserepokesî ro mak amtapotarî poko, pahxa mîîkekn̂e ero poko. Kemîknotopo pînî ro mak amtapotarî, yaarono xa mîn okre.

2 Ewto mko miir̂akn̂e wemronho me mak. Ero wara miir̂akn̂e sowtatu ken̂arî mko rma. Anarî yana komo yewtontho komo xakn̂e twacaye so. Ero rma makn̂iyakn̂e ewtotho me cehso ro. Ero yipunhîrî tak nasî ewto me cirihnî me xa hara.

3 Ero wara ciino rirî ke awya karitî me tak awen̂axe karitî komo rma. Twerî tak naxe yukurumîkno komo apoko.

4-5 Emyawnomnî komo mîkaricekn̂e. Cesemetanmesom komo makronomekn̂e ahwokaxapu kom ha. Noro yipu komo mîn me mîxakn̂e ocowonataw xa oko. Awarpaman̂e komo wara marha mîxakn̂e ocoro xa exitaw kaamo. Ocowo wara rma nasî waapa komo yapepen, puu kacho. Cikihciki kesî ocowo waaca poko ero wara rma nasî kicicitho komo yapepen okwe. Axawa imo po kexitaw kipikesî ro mak kaamo oco, ero wara nasî noro yipu komo yapepen. Anarî yana komo mîtîtîresî cewtun̂em wara ketaw. Ocoro exitaw kaamo, kaapu smun ke mahruyasî twotme n̂he amna yehtome, ero wara xa marha nasî waapa komo wanorî yîtîtmamnotopo awya.

6 On îh po rma erewusmano n̂iir̂asî Kporin komo, kantoman̂e ro ha. Erewusmacho n̂iir̂asî anarî yana komo nahrî etpoyino pîn komo nahrî ha. Tpoxwem ro mak n̂etakesî yînahrî komo. Wooku marha n̂etakesî pahxa ciixapu, akir̂wamaxapu ha. Wooto marha n̂etakesî kasom komo okre.

7 Oroto ka ceewopoyem wara thakwa naxe anarî yana komo ahnoro. On îh po rma tko eewoponthîrî komo nowyasî Kporin komo. Xwaraxwarano ke ewyahruxapu wara ka naxe mîk hak rowon pono komo. Ero warai mera tak Noro n̂iir̂asî.

8 Kwaihtoponhîrî komo marha nîhcamnoyasî Kporin komo Kaan. Erotho yermomn̂e wara nasî. Kewyokuthîrî komo marha n̂ickesî exihra cehso ro. Ero yimaw tîyanan komo yîwîrîyakacho tak nîhcamnoyasî. Ero ponarora tak naxe roowo pono komo ahnoro. Kporin komo rma ero wara kesî.

9 On wara kexe Noro yanan komo, Kaan xa Moso, ponaro kehtopo kom ha. Noro ya kakronomacho komo tîtmomokyatken̂e. Ero ke tak kakir̂wametken̂e so okre. Kporin komo rma Moso. Noro ya kakir̂wamacho komo tîtmomokyatken̂e. Oroto tak tahwowaxe Noro ya kakir̂wamacho komo poko. Tawake xa taxe okre, kexe. Ero wa kexe Kporin komo yanan komo.

10 On îh pono komo yakronoman̂e me nasî Kporin komo amn̂e. Moabe komo reha naxe yînapikrî me. Puruma yeputho tapikyasî paaka wetî cheka ero wara naxe Moabe komo amn̂e apihxapu wara.

11 N̂examro chew rma napockanwasî Kporin komo tperen̂em napockanwasî ero wara. Akpîntho me tak n̂examro pen n̂enpesî Kaan, Amna xa takîhsom, kan̂enhîrî komo. Amocamkîra rma re naxe emîknono ritopo poko mak kica. Ero ke Kporin komo tak camkîno me n̂iir̂as hara.

12 On wara tak kesî Noro yîwya so, Twacayem po rma re maxe ewto po. Sowtatu komo marha naxe awewton komo wacan meretwo akurunpen̂e komo me. Ero yipu rma tko mohrakesî Kporin komo. Roowo pona mak nar̂mesî awacanthîrî komo, roowo pupuntho pona xa. Ero wara Moabe pen komo n̂iir̂asî Kporin komo amn̂e.