On wara n̂iir̂asî Kporin komo amn̂e, roowo nîwîrîmesî ahnoro. Ewtotho wara ro mak n̂iir̂asî pohnî me ro mak okwe. Cewtake so tak n̂iir̂asî tahrorononhîrî. Yiipononhîrî komo tak nakpayasî.

2 Etîme re mak akpano n̂iir̂asî. Kaan ya tîmsom pokono pen komo, noro yipu pîn pen komo marha, antomano rin̂e pen komo kîrkomo, anton pen komo marha kîrkomo, antomano rin̂e pen komo wooxam komo, anton pen komo marha wooxam kom hara, twarawantaxmu pen komo marha, cemyawnoyem pen komo marha. Awemyawno xe ka wasî, wekyas hara yohno, kan̂e pen komo, ero yipu tîmn̂e pen komo marha emyaka so, puranta tîmn̂e pen komo marha, tîramansom me tîmn̂e pen, ero yipu yahsîn̂e pen komo marha, yohno mak ahsîn̂e pen marha. Etîme re mak akpano n̂iir̂asî.

3 Pohnî me ro mak nasî roowo. Iitononhîrî komo yemyawnonho narpesî ahnoro waapa komo ya. Kporin komo mtapotarî tan wekatîmyas awya so.

4 Tîwrataxmu wara tak nasî roowo. Yiipononhîrî pen tak naawaiyasî atîhtaxapunhîrî pen. Okwe ro mak, kan̂e wara nasî roowo. N̂epoxunketîkesî tak okwe. Okwe ro mak, kan̂e me marha naxe cehcoyoponkaxmu komo roowo pono komo.

5 Tîwîrîmaxi tak nasî roowo okwe tîîpono komo ke rma. Tpanatanmetopo komo nanwekyatken̂e okwe. On wara ehcoko, kacho yewetîra marha naxe. Kaanî mtapotachonho yaw roro exihra marha naxe okwe. Kakronomexe so oyewehcataw awya so, kacho yaw roro exihra naxe.

6 Ero ke Kaan ya yîwîrîmacho tak nasî roowo yermomn̂e wara okwe. Ero ke thakwa yiipono komo nahsîyaxe kicicme cehtoponhîrî yepetho okwe. Ero ke cecahso tak naxe roowo pononhîrî pen komo. Asak mak tak nasî waipîn komo reha.

7 N̂enahcasî tak uupa yewkutho, ciixanînhîrî okwe. Uupa yepu naawaiyas okwe. Okwe, okwe, kexe tak tahwotaxmunhîrî komo.

8 Kahworechonhîrî komo marha tak nasî tîtîtmamso cerecere kachonho. Wara hakî kan̂en̂hîrî komo tak naxe tîtken̂e. Ahpa marha nasî tîtken̂e kahworechonhîrî komo kewanometaw so.

9 Cewanomarî me so uupa yukuntho yerîhra naxe, wok me ciixapu. Cîmîkî tak nasî kawaxiyem, ero yeen̂e komo ya.

10 Pohnî me ro mak tak nasî ewtotho. Tahruso tak nasî mîîmo mko ahnoro ewomrî yarohra.

11 Okwe, exihra nas okwe, kexe iitono komo uupa yukuntho poko, wok me ciixapu poko. Tahwore ehxapunhîrî komo ahwora ro mak tak naxe hara. Tahwotacho komo pokohra ro mak tak naxe roowo pono komo, pîra ro mak okwe.

12 Cecahso tak nasî mîîmotho ahnoro ewtotho pononho. Takuhr̂aposo marha nasî ewto wacan metatantho okwe.

13 On wara nasî oripa yepu yenîhmetawno wara nasî amn̂e. Iito rma cik nas asak mak eperîrî epotura rma. Uupa yeperîrî pohcataw marha iito rma cik n̂etîmcesî asak mak eperîrî. Ero wara rma naxe roowo pono komo amn̂e.

14 Waipîn komo tko nîmtapowaxe kar̂pe, n̂ewanomexe marha tahwore cexirî ke so. Oesce n̂ixan komo n̂ewanomexe Kporin komo yehtopo poko, kayaritomo me xa ehtopo poko ha.

15 Ero ke awya so wîîkes hara resce n̂ixan komo ya, amtapotacoko kir̂wan̂he Kaan yehtopo poko. Kyopono xa Mîk Kporin komo, ponaro Ixaw Yana komo yehtopo, kacoko. Ero wara xa marha kacoko amyamro hara ciwya pono komo, tuuna imo kwawno pono kom ha.

16 Waano cencesî roowo mapitawno komo yewanomarî rma, Kir̂wanî ro xa Mîkî Kporin komo okre, kacho naar̂axe waano. On wara tko wîîkekn̂e ow, Tîwîrîmaxi was okwe, tîwîrîmaxi was okwe. Okwe ro mak wîîkes opoko rma. Kemîknoyaxe so okwe kemîknon̂e komo. Yaaro, kemîknoyaxe so ro mak kemîknon̂e komo kica.

17 Ai, on wara wîîkes awya so roowo pono komo ya, iito nasî pona awerahtîmtopo komo. Ewtarî marha nasî awesamarî komo yaw, awemcinotopo komo marha nasî iito ahyaw so.

18 Anarimaw memahciyatu na pona awerahtîmtopo komo yentarî ke. Awemaciyataw so tko ewtarî yaka mepîrkexe hara okwe. Ewtarî yai awepatakache so memciyaxe hara okwe xiika warai yaka xa hara. Tahrunkaxi tak nasî kaapu yewkanapan. N̂esewsîyasî marha roowo mapatanî mko.

19 N̂ewakrokesî tak roowo pen kopi, n̂etîmtakesî marha kopi. N̂esewsîyasî ro mak roowo pen okwe.

20 Miya xiya wara n̂esewsîyasî roowo wenîmxapu n̂etar̂asî ero wara. Pawxi matko n̂esewsîyasî anarimaw, ero wara xa nasî roowo kopi. Iipono komo yehtopo nasî tawsîn̂em wara roowo yopono wara. Ero wara nasî Kaan yanwetoponho yîwya so. Ero ke roowo pono komo n̂epîrkexe awomun me ro mak tak okwe.

21 Ero yimaw tak kah yawno komo poko n̂esepanîyasî kr̂a Kaan, yukurumîkno me cehsom komo poko. Roowo pono komo poko marha n̂esepanîyasî kayaritomo komo poko.

22 Yihcirî me ka noro yipu komo n̂enmekyasî Kaan. Kahrutopo yaka ahruxapu wara naxe. Iito tak naxe tahruso. Pahkî exiche tak Kaan nîmyasî yîwya so kicicme ehtoponhîrî komo yepetho.

23 Ero yimaw tak nuun̂i nasî ehn̂anmexapu wara, kaamo marha nasî yîhyapamnoxapu wara. Ero yimaw Kporin komo tak nasî kayaritomo me. Siaw Yîpîn nasî Noro yewton me, Xerusaren ha. Iito naxe poritomo komo, n̂examro wero ro rma kayaritomo me nasî Kporin komo kantoman̂e ro. Kir̂wan̂he ro mak n̂esenpesî yîwya so kayaritomo me xa. Ero wara n̂esenpesî Kporin komo amn̂e.