On wara kacho n̂encekn̂e Isaias Kporin komo mtapotarî, Ciru pono komo pokono hara, Awratacoko amyamro kanawa imo yawno komo, Tahsisi pono kom ha. Tar̂matîkaxi tak nasî Ciru pen okwe ewto pen. Ero pononho exihra ro mak tak nasî mîîmotho okwe. Yînakwathîrî komo marha exihra nas okwe. Ero wa Ciru pen yehtopo amna n̂encekn̂e Xipre pono komo mtapotarî.

2 Tîtken̂e tak ehcoko amyamro ciwya pono komo, amyamro marha Siton pono kom hara. Awemyawnometken̂e so ha ka kanawa yaw tîtosom komo.

3 Sio pono n̂ekyatken̂e ahyaka so puruma, raixi warai komo. Niru yecihtawno yeperîrî marha n̂ekyatken̂e Ciru pona okre. Mîk hak rowon pono komo ka warawanwatken̂e Ciru pononho pen komo yakro.

4 Okwe okwe, kacoko tak amyamro Siton pono komo. Tuuna imo kwaw tîtosom komo kurunpen̂e komo amyamro. On wara kesî tuuna imo, Erewra ro mak wîxakn̂e omxîkrî yewrutopo poko. Omrerî komo por̂mamnopîra wîxakn̂e okwe, oyemsîrî marha por̂mamnopîra wîxakn̂e, kesî.

5 N̂examro pen waihtoponho yentache Exitu pono komo ya nahwokexe ro mak okwe. Ciru pononho pen komo tî nar̂mace okwe, kexe.

6 Tuuna imo watocoko amyamro, Tahsisi pona etocoko. Awratacoko amyamro hara ciwya pono komo.

7 On ma xakn̂e awewtonthîrî komo, wara ro mak kachonhîrî awya so? Pahxantho ma on ewtotho? On pononho komo cetken̂e meyeno pona esekenmaxi, n̂examro yewtontho ma tan okwe?

8 Onoke xa on wara Ciru pono komo yar̂macho nîhtînoyakn̂e? Aroko yaw ciino riin̂e me mîkyam xatken̂e iitononhîrî pen komo. Twarawantaxmu me marha xatken̂e. Cesekaiporesom me xa tî xatken̂e iitononhîrî pen komo, twarawantaxmunhîrî pen komo.

9 Kporin komo xa tko nîhtînoyakn̂e Ciru pen yar̂macho. Kantoman̂e ro Mîk ha. Ero wara nîhtînoyakn̂e, Ow xa takîhsom, kan̂e komo yemetanmetopo ahnoro, Poxumnî me enpo xe so nasî Noro ahnoro takîhsom me cesehtînosomînhîrî komo, roowo poko hakno kom ha.

10 Arowon komo yopono me ehcoko amoro Tahsisi yemsîrî. Tarenarî yopo nukmesî N̂iru yepu ero wara ehcoko. Ciru nakwarî exihra tak nas okwe ero kwaka awtotoponhîrî komo.

11 Tuuna imo yecihtawno komo wece tak n̂ekanîyakn̂e Kporin komo. Ero wa ekanîrî ke mîk hak rowon pono komo tak tatanaxe. Kanan pono komo yar̂marî poko antomano n̂iir̂akn̂e Kporin komo. Iitono komo wacan yixkacoko sowtatu komo wacan, kekn̂e.

12 On wara marha kekn̂e Noro iitono komo ya tak, Ahwotara tak maxe amoro Siton yemsîrî. Wooxam warai rma re amyamro iitono komo iin̂omnî ro warai. Tar̂maxi tak maxe oroto okwe. Awomcoko tak, etocoko Xipre pona. Iito meero tko awepokaretopo komo exihra nas okwe.

13 Kawtew komo rowon encoko. N̂examro kayaritomon exihra ka xakn̂e. Asiriu pen komo nar̂metken̂e n̂examro. Xapari warai komo yeken me mak n̂iir̂atken̂e yîrowonthîrî komo, axawa imo pono komo yeken me. Tîsowtatun komo mînî komo n̂iir̂atken̂e Kawtew komo iina, kawno mko. Asiriu sowtatun komo tko ero wacantho mohraketken̂e. Pohnî me tak n̂iir̂atken̂e iitono komo yekenho.

14 Awratacoko amyamro kanawa imo yawno komo, Tahsisi pono komo. Asowtatun komo wacan marha nasî tmohrakaxi okwe.

15 Ero yimaw tak yîhcamnoxapu me tak nasî Cirutho. 70 cimn̂ipu nasî kayaritomo yewrutoponho twaihtopo pona roro ero wicakî xa marha tîhcamnoso nasî Cirutho. 70 cimn̂ipu yenatîche tak Cirutho ponaro tak nas hara Kporin komo. Wooxam wanorî kesî, kîîrî pohkan̂e ro wanorî ero wara rma nasî Ciru ero yimaw.

16 On wara kesî waano, Awya wîîkesî okopur̂wa. Mîk hak pokononho amoro kica. Apoko twen̂ekarî tak naxe poko awehtoponhîrî komo. Ahpa tak ahsîko aratîn. Ewto pore etariko. Takîhso men ahpa iyorkakî. Yaake xa arko waano yîtwen̂ekarîntara tak ehtome so apoko, kesî.

17 Taa, 70 cimn̂ipu yenatîche tak Ciru pono komo karihcesî xa hara Kporin komo. Mîk hak pohkan̂e ro wara nas hara kica wooxam wara. Roowo poko hakno komo pohkan̂e me nasî xa hara. Mîk hak rowon pono komo pohkan̂e me nasî.

18 Yupurantan komo tko n̂etîmcesî Kporin komo ya tîmsom me. Tupurantan komo me yîmtora naxe iitono komo. Kporin komo mîtwono komo purantan me xa nasî. Ero pona n̂examro tak nahsîyaxe tponon komo kir̂wan. Tînahrî komo marha nahsîyaxe ero pona Ciru pono komo purantantho pona. Ero wa nasî Ciru pono komo purantan amn̂e.