Taa, on warai tak wencekn̂e hara îîpî yotawno pokono, enîhnînhîrî yentopo pokono ha, Ahce wa mehcow kopi? Ahce kacho mîîmo meretkoso mîîtocow kopi?

2 Wara hakî kacho ken̂arî amoro ewto. Wara ro mak kan̂e komo ken̂arî amoro, tahwotaxmu komo ken̂arî marha. Iito nasî apononhîrî pen komo yokoputho. Kacipara imo ken̂ehra rma tko waihyatken̂e n̂examro pen, etar̂mara rma waihyatken̂e.

3 Ahnoro awantoman̂enhîrî komo n̂emahciyatken̂e iito re rma. Emahciyataw so rma tko nahsîyatken̂e waapa komo. Krapa ke tukuruyem komo rma nahsîyatken̂e. Awahsîyatken̂e so marha n̂examro yakro rma. Awapomiyatken̂e so okwe ahnoro. Mooxe rma ka exitaw waapa memahciyatken̂e. Awahsîyatken̂e so rma ha tko.

4 Ero ke on wara wîîkekn̂e, Miya cewru etaknamacoko. Owrata xe ro mak was okwe. Oyewyakîrera ro mak ehcoko. Kîwracesî rma oyanan yemsîtho pen komo waihkarî ke.

5 Awîrîmacho me xa tak n̂enmayas amn̂e kaamo ha. Wara hakî kacho me n̂enmayasî, awapitopo komo me, awerahtîmtopo komo me, waaca mohrakacho me marha, îîpî yakro amtapotacho komo me marha, tîwrataro amtapotacho komo me ha. Ero wa kacho me n̂enmayasî amn̂e Kporin komo yanme.

6 Emepu nahsîyaxe Eraw pono komo. Tarara yawno komo mîkyam, kawaru mkaw tîtosom komo marha. Cecen̂an komo womhokexe Kiiri pono komo.

7 Yaake nasî woskara arowon pono mko. Kir̂wan komo mîn ha. Oroto tko tawronohkatîkaxi nas ahnoro tarara ke. Ewto potaw so nasî sowtatu komo, kawaru mkawno komo.

8 Xuta yepamtho komo kurunînho tak naare Kporin komo. Mîîmo yaka cma re miir̂atken̂e amyamro, comota chewno yaka. Iito rma re mepor̂atken̂e.

9 Ero po marha Tapi yewtontho tak meen̂atken̂e. Cetawkaxi tak meen̂atken̂e ero wacantho okwe. Yaake xakn̂e etawkacho okwe. Tuuna mîmcetken̂e n̂ikitho kwawno uuman kwawno he.

10 Mîîmo komo mukuknometken̂e Xerusaren pono komo. Anarîtho mixketken̂e mîîmotho ewto wacan yecehtotome.

11 Asakî nas ewto wacan etantaw re. Ero yotaw anarî mahcetken̂e n̂ikitho. Iina mekpekn̂e tuuna pahxantho kwawnonho, n̂ikitho kwawnonho. Awîrîman̂e komo yekpon̂enho pona enîhra rma tko mîxatken̂e okwe. Noro pona cencerî, kahra mîxatken̂e okwe pahxa rma ero wara yîhtînon̂enhîrî poko.

12 Ero yimaw tak awan̂ikyatken̂e so Kporin komo, kantoman̂e ro. On wara kekn̂e awya so, Amohcoko yîwrataxi. Kar̂pe ro mak awratacoko. Ekanamurinkacoko, kumixitho mak amrucoko aponon komo me, kekn̂e awya so.

13 Yîwratara tko mîxatken̂e. Enko xe, mahwowaxe, wara ro mak mîîkexe. Awoh komo mîparaxkexe paaka, kahn̂eru komo. Awotî komo mon̂exe, awokru komo marha meer̂axe. On wara mîîkexe, Ceseresmacerî ha ka, wooku marha ka ceecerî. Pahxaxa men tîtwaiyaxe, mîîkexe mak okwe.

14 Ero yimaw on wara kekn̂e Kporin komo on̂entarî me, kantoman̂e ro Mîk kekn̂e, Kicicme ro mak maxe okwe. Ero wa awehtoponhîrî komo yîhcamnopîra ro mak wasî miya roro awaitopo komo pona roro, kesî. Ero wara kesî Kporin komo, kantoman̂e ro.

15 Taa, on wara kes hara owya Kporin komo, kantoman̂e ro, Etoko Sebna yaka. Kayaritomo maywen mîk, kayaritomo mîn yenîn̂e ha. Noro yaka etok ha.

16 On wara kasko yîwya, Ahce kacho tan mai? Onoke xa kekn̂e awya, Taa, awokoputhîrî yewtarî ahtoko yiixe awexitaw. Kaikokorono ahtoko. Toopu rma ahtoko yiixe awexitaw awokoputhîrî yewtarî me amn̂e awaipuchen, kekn̂e onoke xa awya?

17 Karitî rma re amoro. Wara rma on wara awir̂asî Kporin komo amn̂e, kar̂pe xa awahsîyasî. Miya ro mak awar̂mesî.

18 Miya awar̂mesî eem wara anarî komo rowon pona amtapen̂an pona. Iito tak mîwaiyasî. Iito marha nasî atararanthîrî komo, yaakeno rma cenporemînhîrî komo. Kicicitho mak amoro kica, akayaritomon yanan komo yîhyapamnon̂e mak amoro, kes okwe apoko.

19 Kayaritomo mîn yenîn̂e me ka mîxakn̂e. Ero pokono mera kr̂a tak kiir̂asî.

20 Ero yimaw tak anarî wan̂ikyasî hara oyanton hara. Eriakin xa wan̂ikyasî Iwkias mumuru.

21 Apononthîrî takî wamrupesî yîwya hara, awan̂apotunthîrî marha. Noro takî nasî antomano rin̂e me awenhîrî yaka hara. Xerusaren pono komo yîîm warai me tak nasî noro, Xuta yepamtho komo yîîm warai me.

22 Noro motaka tak wiir̂asî Tapi pen mîntho yewkacho. Ahce na yahrunkache yîwya etahrupon me ro mak nas hara. Ahce na yahruche yîwya etahrunkapon me mak nas hara.

23 Pasahtoxapu wara noro wiir̂asî weewe wara, yuhnaka pasahtoxapu wara. Kayaritomo yapon wara tak nasî noro cenporem wara. Takîhsom me tak naxe noro yîîm yanan komo Eriakin yanan me cexirî ke so.

24 Noro pona tak n̂een̂axe yîîm pen yananînho komo, tîyopono me xa n̂een̂axe. Ero wara naxe poritomo xîkrî komo, ahnoro iyanan komo. Wooku yen wara nasî noro yanan komo, parakwe wara, parakweci mara marha. Ero wara naxe iyanan komo amn̂e.

25 On wara marha tko kesî Kporin komo, kantoman̂e ro, pasahtoxapunhîrî rma tak n̂emohkes hara amn̂e okwe. N̂ehkocesî mak tak okwe, n̂epîrkesî marha tak okwe. N̂emarakesî marha ero pona akrixapunhîrî komo okwe, kesî. Ero wara kesî Kporin komo.