Taa, anarî tak wencekn̂e hara Kaanî mtapotarî axawa imo pono komo yar̂macho pokono, tuuna imo yecihtawno komo pokono, On wara kekn̂e, Ocowo mokyasî cetaporisom. Suu n̂ixa mokyasî. Ero wa mokyaxe waapa komo kopi. Axawa imo poi mokyasî kicicitho poi ha.

2 Kerepokacho xa ween̂e, kahwokacho xa. Emku me kwapahton̂e komo naxe emku me wapahtono rirî poko. Kemyawno yaan̂e komo marha naxe emyawnano yarîrî poko hara. N̂examro ar̂macoko amyamro Eraw pono komo. N̂examro yewton wamtocoko amyamro hara Mecîa pono komo. Okwe okwe, kamexpono n̂iir̂atken̂e iitono komo mer̂pora ro mak. Amn̂e tak ero wa kamexporî wîtîtmamnoyasî, kesî Kporin komo.

3 Ero yipu yenîrî ke n̂erewasî ro mak opun. Kerewasî wooxam wara ro mak cewrusom wara. Keserepokekn̂e ro mak waapa yekaci yentarî ke, kahwokekn̂e ro mak Kaan n̂enpotho yenîrî ke owya.

4 Yîtîtmamporono wara n̂eexi ocoro okwe. Kîtatanmo ro mak oyerahtîmrî ke. Pahxa tpoxwe xakn̂e kokmamrî owya awarpantacho. Oroto tak oyerahtîmtopo me ro mak nasî kopi awarpantacho.

5 Keseresmacho yapon n̂iir̂axe. Kurara pona poono n̂ehyatkexe. N̂eseresmexe, wooku n̂eer̂axe. Piiri awomcoko amyamro sowtatu yantoman̂e komo. Awecen̂an komo ka kapecoko.

6 On wara kesî Kporin komo owya, waapa yekaiporen̂e antomakî. On wara kasko yîwya, An̂enîthîrî men ekatîmko owya amn̂e, kasko.

7 Tarara meen̂asî amn̂e asak hakno kawaru n̂ihxikrî. Buhu mkaw tmohsom meen̂asî, kameru mkaw tmohsom marha. Noro yipu komo yenîche awya tîtken̂e mak esko kir̂wan̂he entachome awya, kasko. Ero wa kasko yîwya.

8 Ero yinhîrî on wara tak kekn̂e waapa yenîn̂e, Apa, reaw ween̂asî kopi. Tan wasî pahkî mîîmo meretwo kawno meretwo. Katpanaw tan wasî, kosope marha. Yaake kaamo wenatkai tan.

9 Taa, enko tak, Noro tak ham, tarara yawno mokyasî, asakî kawaru nai tarara xikn̂e. On wara kexe n̂examro, Babiron̂a pono komo waihkace okwe, waihkatîkace ro mak okwe. Xakn̂e ha ka mîk hak warai me ciixapu mko, ponaro n̂examro yehtopo me. Ero mak tak nasî cor̂or̂maxi mak okwe roowo pore, kesî. Ero wa kesî tmohsom, kekn̂e waapa yenîn̂e. Ero warai wencekn̂e Babiron̂a pono pen komo yar̂macho pokono.

10 On wara wîîkes awya so hara, oyanan komo amyamro okwe. Puruma yîpîpîtîkaxapu warai mak amyamro oko. Kporin komo mtapotacho rma tko mîn wekatmo awya so okre. Kantoman̂e ro Mîk Kaan ha, ponaro Ixaw Yana komo yehtopo ha. Noro mtapotacho xa wekatmo awya so.

11 Taa, on wara wencekn̂e Tuma pokono hara, Seei pono mtapotarî wencesî. On wara kes owya, Ai, waapa yekaiporen̂e amoro, on wara wîîkes awya, atî wicakî ka nai enmatopo? Ai, waapa yenîn̂e amoro, atî wicakî ka nai enmatopo?

12 On wara kesî waapa yekaiporen̂e enmaporo tak nai ha re, kokmamporo rma tko nas okwe. Kaanî mtapotarî yenta xe awexitaw so kacoko yîwya. Ero yinhîrî amohcoko xa hara oona, kesî Kporin komo. Ero wara kesî.

13 Taa, on warai tak wencakn̂e hara Arabia pono komo yar̂macho pokono hara, On wara wîîkes awya so Tetan pono komo amyamro, kameru mkaw so tîtosom ha. Comota cheka mak metakriyaxe amyamro, Arabia pono cheka.

14 On wara wîîkes awya so, tuuna ehcoko twokru xatî komo wokru. Tema pono komo amyamro hara, waapa yenîche emahcixapu komo nahrî ehcoko.

15 N̂emahciyaxe n̂examro kacipara imo pona cerahtîmrî ke so, enhîrî yai mohkaxapu pona cerahtîmrî ke so. Krapa pona cerahtîmrî ke so marha n̂emahciyaxe, esîxapu pona cerahtîmrî ke so. Ero wara cetar̂macho komo pona n̂eraswaxe. Ero ke n̂emahciyaxe.

16 On wara kesî Kporin komo owya, Cewn̂e cimn̂ipu yenatîra rma ka exitaw, apickaxapu nukuknomatho yaw roro, ero wicakî exihra rma ka exitaw n̂etwîrîmexe tak okwe Keta pono komo, kyopono mera tak n̂esenpexe okwe.

17 Asak mak tak n̂etîmcexe asakî mak waiwî yar̂man̂e komo. Asak mak tak n̂ehtîkexe Keta pono komo karitî kom ha. Ero wara naxe okwe, kesî. Ero wara kesî Kporin komo, ponaro Ixaw Yana komo yehtopo.