Taa, ero yinhîrî Tahtan takî tî n̂en̂epekn̂e Sahkon, Asiriu komo kayaritomon. Astoce pono komo waparî me tî n̂en̂epekn̂e. Ero ke cekn̂e noro Astoce pona. Iitono pen komo tak nar̂mekn̂e.

2 Ero cimn̂ipu po rma on wara kekn̂e Kporin komo Isaias ya, Amos mumuru ya, Ai, Isaias, etoko amîn yaka, kumixitho takî mohkakî aponon me nasî ero. Ahtarî marha mohkakî. Ero ke ero yaw roro rma takî xakn̂e Isaias. Ponomra tak n̂etar̂akn̂e, yîhtara marha.

3 Ero yinhîrî on wara kekn̂e Kporin komo Ixaw Yana komo ya, Oyanton Isaias n̂etar̂asî ponomra, yîhtara marha. 3 cimn̂ipu tak nasî ero wa etaritoponhîrî. Exitu pono komo yîwîrîmacho yenpotopo me rma ero wa nasî, Eciopia pono komo yîwîrîmacho yenpotopo me marha.

4 Ero wara rma Exitu pono komo naar̂as amn̂e Asiriu komo kayaritomon, tapomiso so rma naar̂asî. Eciopia pono komo marha ero wara naar̂asî. Kar̂pamxan komo naar̂asî, poritomo komo marha. Ponomra ro mak n̂examro naar̂asî kir̂wantaw mapirî komo. Yîhtara so marha naar̂asî. Ero wara Exitu pono komo nîhyapamnoyasî Kporin komo.

5 Ero yimaw tak n̂eraswaxe tak tantono komo, nîhyapamaxe marha Eciopa pona enîn̂enhîrî komo, Kukurunpen̂e komo okre Exitu pono komo, kan̂enho komo marha.

6 Ero yimaw on wara tak kexe tantono komo, Ponaro kehtoponhîrî komo cma re ka mîkyam xatken̂e. Yîhyaka so cemahciyatken̂e. Amna akronomatamcoko, tîtketken̂e yîwya so. Asiriu komo kayaritomon men mokyasî amna waparî me. Amna men yukurunpetamcoko, tîtketken̂e yîwya so. Oroto tak encoko ponaro kehtoponhîrî pen komo. Tapomiso tak naxe n̂examro kopi. Ero ke ahce wa thakwa re cemahciyatu kîwyam hara kopi? Asiriu komo kayaritomon kar̂mexe so men okwe, kexe. Ero wara kexe tantono komo.