Taa, Exitu pono komo yar̂macho pokono tak wencekn̂e hara on wara kacho, Kporin komo encoko, tuuna yewru mkaw cesî kar̂pe tîtosomu mkaw. Exitu pona cesî. Iina epatakache mîk hak warai me ciixaputho mko tak tatanasî. Exitu pono komo tak nahwokexe ro mak okwe.

2 On wara kesî Kporin komo, etpoko tîrwonîmsom me rma n̂examro wiir̂asî. Exitu pono komo nîrwonasî Exitu pono komo poko rma. Etpoko n̂etar̂mexe etakno re komo rma, etmîtwono komo re marha, ero re ewto pono komo rma, noro re maywen komo marha. Noro yipu komo n̂etar̂mexe etpoko okwe.

3 Nahwokexe ro mak tak Exitu pono komo. Ahce na poko esentachonhîrî komo wiir̂asî tohnawno me ro mak. Mîk hak warai me ciixaputho mko mtapotarî n̂encexe, waihxa pen yekatînho komo mtapotarî marha. Yaskomo mtapotarî marha n̂encexe, erem pokono ro mtapotarî marha.

4 Kîpînîn yawno pîn tak wiir̂asî Exitu pono komo kayaritomon me. Yîrwonpontho ro mak nasî kayaritomon komo me, kesî. Ero wara kesî Kporin komo, kantoman̂e ro.

5 Pahxaro tak napaiyasî tuuna imo. Yarinho me marha tak nasî tuuna yepu, turpe ro mak okwe.

6 Kowasî tak tuuna yepu komo. Aporî mko marha napayasî, n̂ewturpamyasî marha. Ero wa nasî Exitu pono komo. Tuuwa warai marha waihyasî ecihtawnonhîrî ha.

7 Ero wa xa marha nasî tuuwa N̂iru yecihtawno hara, waihyasî marha okwe, eepu kentawno marha. Yînatîrî komo marha naawaiyasî, N̂iru yecihtaw ciixapu. Roowo tak naar̂asî ocowo okwe mararî pononho. Mararî exihra tak nasî iito.

8 Nîwracexe mak tak ootî yanîmn̂enho komo, N̂iru kwaka kiiwi yar̂man̂enho komo. N̂ekar̂kexe marha tak mîîye yar̂man̂enho komo ero kwaka.

9 Riin̂u pokono komo marha nahwoketîkexe. Ahce poko thakwa ma re tatu okwe? kexe ero kahn̂enho komo.

10 Poono pokono komo marha naxe ahwora. Ahnoro puranta pona cetapickaxmu komo naxe ahwora ro mak okwe.

11 On wara naxe Soan pono yantoman̂e komo, akpîra cesehtînosom me mak naxe kica. Ero pîntho me ro mak nîmtapowaxe Paraw yakîhren̂e komo rma. Ahce kacho on wara mîîketu Paraw ya, Takîhso cesehtînosom mumuru ow, pahxan pen mumuru ow ha kayaritomo mumuru, mîîkexe ahce kacho kica?

12 Ahto natu? Ahto natu takîhsom komo, awakîren̂e kom ha? Ero wa xa maxe amn̂e, kacowpe oroto awya. Ero wa xa nîhtînoi Kporin komo Exitu pono komo yîwîrîmacho. Kantoman̂e ro Mîk ero wara nîhtînoi, kacowpe ha ka.

13 Soan pono yantoman̂e komo tak naxe akpîra cesehtînosom me. Cemaro mak n̂ewehcaxe Nope pono yantoman̂e komo. Ahnoro Exitu pono komo n̂iir̂axe cemaro yewetîn̂e me kica Exitu yecehton̂e komo meero okwe.

14 Cetanwesom yekatî n̂iir̂akn̂e Kporin komo n̂examro ropotaka. Noro tak Exitu pono komo n̂iir̂asî camkîno me ahce na poko exitaw so. On wara nasî wenîmxapu, twenarîthîrî kwaw rma n̂etar̂asî epîrkaporo kica. Ero wara Exitu pono komo n̂iir̂axe tohnawno poko akîhren̂e komo.

15 Ahce na poko Exitu pono komo yehtopo exihra ro mak tak nas okwe. Yîhtîpîrî me cehsom, matkîrî me cehsom, kuum yarî warai me cehsom, tuuwa warai me cehsom, ero warai komo naxe emyarîra ro mak. Ahce na poko ehtopo komo exihra thakwa mak nas okwe.

16 Ero yimaw tak wooxam wara mak naxe Exitu Pono komo. N̂examro yepoi tak pokupoku kesî Kporin komo, kantoman̂e ro, tamorî ke. Ero wara Noro yenîche tatanaxe mak tak okwe Exitu pono komo cerahtîke so.

17 Xuta rowon pono komo pona tak n̂eraswaxe ro mak Exitu pono komo. Xuta pono komo yetacirî yencetaw mak Exitu Pono komo ya n̂erahtîmtîkexe ro mak kopi. Exitu pono komo yîwîrîmacho nîhtînoi ham okwe Kporin komo, kantoman̂e ro. Ero wa Exitu pono komo n̂emetanmekyas amn̂e Kporin komo.

18 Ero yimaw tak on wara naxe Exitu pono yewton pono komo, 5 pono kom ha, Kanan pono komo mtapotarî yaro tak nîmtapowaxe. Kporin komo yakrono ro me tak nas amna, kexe tak. Yaaro xa kexe cemaro pîn me ro mak. On wara kacho me nasî anarînhîrî ewto, Takn̂isom Tan Ewto, kacho me tak nas okwe.

19 Ero yimaw tak Kporin komo ya tîmsom yakn̂itopo nasî Exitu po, yîrowon komo rakataw rma. Yîrowon komo wokpan to marha nasî toopu mîîmo mapatan warai Kporin komo ponaro ehtome so iitono komo.

20 Exitu pono komo n̂enîrî mîn. Kporin komo pona enîn̂e komo moxam, kantoman̂e ro pona enîn̂e kom ha, kacho mîn ha. Cemetanmekn̂e komo mokuche Kporin komo yakro nîmtapowaxe takronomacho komo poko. Ero wa karî ke yîwya yukurunpen̂e komo tak n̂en̂epesî yîhyaka so karitî. N̂examro yemetanmekn̂e komo mokyataw Noro rma nas yukurunpen̂e komo me.

21 Ero wa Exitu pono komo yukurunpen̂e me n̂esenpesî Kporin komo. Kaan ponarono ow ha, kexe tak. Noro poko nahwowaxe. Tokuthîrî komo pun marha nakn̂iyaxe yîwya tîmsom me. Ahce na marha nîmyaxe yîwya. On wara was amn̂e awanme, kexe marha yîwya. Ero yinhîrî tîmtapotachonhîrî komo yaw roro rma wa naxe.

22 Exitu pono komo ka namotoresî Kporin komo eper̂a ke. Amotoreche tak karihces hara. Kporin komo yakro tak nîmtapowaxe tamotoyataw so. Ero wara yîmtapotache so karihces hara. Ero wara n̂examro n̂iir̂asî.

23 Ero yimaw tak tarara yesamarî nasî Exitu poi kîwtotopo Asiria pona. Asiriu komo cexe Exitu pona. Exitu pono komo marha cexe Asiria pona hara. Kporin komo poko nahwowaxe iito re Exitu pono komo, Asiriu kom ha. Ero wara naxe.

24 Ero yimaw n̂examro yanme rma ahnoro roowo pono komo nakronomesî Kporin komo. Ixaw Yana komo ke rma tak naxe ero wara. 3 tak naxe, Exitu pono komo, Asiriu komo, Ixaw Yana komo, n̂examro yanme ahnoro roowo pono komo nakronomesî Kporin komo.

25 N̂examro marha wakresî Kporin kom hara, kantoman̂e ro. On wara kesî poko so, Onwakretho xa mîkyam. Oyanan komo mîkyam Exitu pono komo. Onakîtotho mîkyam Asiriu komo. Apapa nîmîtho owya mîkyam Ixaw Yana kom hara, kesî poko so. Ero wara kesî Kporin komo.