Okwe ro mak wîîkesî meyeno komo poko hara. Iito nasî tapokem komo, tîyorîrem komo. Eciopia yewkuru mehxan komo mîkyam.

2 Tîmtapotarî yentamexpon̂e komo n̂en̂epesî iitono komo kayaritomon anarî komo kayaritomon yaka. Kanawa yaw cexe tuuwa warai kahxapu yaw. On wara kexe yîwya so, Etocoko amyamro tapota yentamexpon̂e komo, kar̂pe tîtosom komo. Kawno komo yaka etocoko, tmemehsem yîhcîpîrî komo yaka. Kopi, kacho rma mîkyam xatken̂e n̂examro yihcitoponhîrî komo n̂ixa ro rma. Karitî komo mîkyam, waapa me tîtosom kom ha. Yîrowon komo nasî tîraconkaxi tuuna yepu ke. Noro yipu komo yaka etocoko, kexe tîn̂en̂eperî komo ya.

3 On wara wîîkes awya so roowo poko hakno komo ya, roowo po cekenkem komo ya, amn̂e kayaritomo banteiran n̂etanîmyasî îh po. Ero tak meen̂axe. Ero yimaw marha tuu kacho n̂esencesî. Ero tak mencexe.

4 On wara kesî Kporin komo owya, Tîtken̂e mak wasî tan oyeken po. Xehxa enîno wiir̂asî. Kaamo me exitaw ocoro tak nasî kaamo, ero wa wasî. Kaweresî wara marha wasî natî yeperîrî yenmetopo yimaw esenpoxapu, kes owya.

5 On wara n̂iir̂asî Kporin komo, uupa yeperîrî yenmetopo mera ka exitaw, ero yimaw n̂epemrutunwasî kir̂wan̂he okre. Eperîrî tak por̂mamyasî epemrutun yaw rma. Ero yimaw uupa yatî natîkronkesî Noro atîkronkacho ke rma. Peremthîrî komo marha nîhkocesî.

6 Iitononhîrî komo yokoputho tak nasî pukno wara îh po. Kurum komo nahrî me tak nasî korînthîrî kom okwe. Kamara warai yotî me marha nas okwe. Kaamo yimaw kurum komo nahrî me nasî, twotu yimaw tak kamara warai makîrha nahyasî okoputhîrî komo.

7 Ero yimaw tak Kporin komo ya tîmsom tak n̂ekyaxe n̂examro, kantoman̂e ro ya tîmsom. Kawno komo mîkyam n̂examro, tmemehsem yîhcîpîrî. Kopi, kacho mîkyam yihcitoponhîrî n̂ixa ro rma. Karitî komo mîkyam waapa me tîtosom kom ha. Yîrowon komo nasî tîraconkaxi tuuna yepu ke. Tînîmrî komo n̂ekyaxe Siaw Yîpîn pona, Kporin komo yosotî yekenî ro pona, kantoman̂e ro yosotî yeken pona ha. Iina n̂ekyaxe.