1-2 Ero yinhîrî tak Kporin komo mtapotarî wencekn̂e xa hara. On wara kekn̂e owya, Ai, Xeremias, etoko Xerusaren pona. On wara kasko iitono komo ya, Ai, Xerusaren pono komo, on wara kesî Kporin komo awya so, Pahxa emasî wara ka awehtoponhîrî ponaro wasî. Ero wara awexitaw so ooxe mîxatken̂e. Ciin̂o xe xa nasî emasî ero wara rma ooxe mîxatken̂e. Owenari mîmokyatken̂e axawa imo pore, naatî yewtî pîn pore.

3 Opokono ro me makî ka mîxatken̂e amyamro, Aporinî ro komo pokono ro me. Aporin komo natîrî yeperîrî wara mîxatken̂e, yihcirî me potuxapu wara okre. Ero wa mîxatken̂e amyamro, Ixaw Yana komo. Awonon̂e komo wara tko xatken̂e tooto komo. Kicicme maxe kica, wîîkekn̂e tko awonon̂e warai komo ya. Yîwîrîmacho komo tak n̂examro pen n̂epor̂as amn̂e, kesî Aporin komo.

4-5 Ai, Xako yepamtho komo amyamro, Aporin komo mtapotarî ka entacoko omtapotarî ha. Ahnoro Ixaw pen mumutho komo yepamtho amyamro. On wara kesî Kporin komo awya so, Akpîra oyehtoponho ma re n̂een̂atken̂e aporin pen komo awya so? Ero poyero ma wa oyahsîpînketken̂e? Mooxeno wara tak cetken̂e ha. Mîn hak ponaro mak tak xatken̂e enporixaputho ponaro. Ero yiputho ponarono me mak tak xatken̂e kica.

6 On wara kahra xatken̂e n̂examro, Ahto nai Kporin komo Exitu poi kekn̂enhîrî kom ha? Pohnîntari ro mak kekyatken̂e so, axawa imo pore, cewtakem pore. Tuuna ken̂arî pîn pore kekyatken̂e so. Awarpan chere marha kekyatken̂e so, kwaihtopo komo yawarpan chere. Esama ken̂arî pîn pore ro mak kekyatken̂e so. Pohnîntari ro mak okwe. Ahto nai Kporin komo ero yipu pore kekn̂enhîrî komo? kahra ro mak xatken̂e okwe.

7 Ow xa kekyatken̂e so kir̂wanî ro pona roowo pona, naatî yewtî mexan pona ha. Tantono yeperîrî tak mahyatken̂e tpoxwe okre. Oona awepatakache so tko orowon mîwîrîmetken̂e okwe. Kicicitho me ro mak orowonî ro miir̂atken̂e okwe.

8 On wara kahra xatken̂e owya tîmsom pokono ro komo, Ahto nai Kporin komo? kahra xatken̂e. Apanatanmetopo yekatîmn̂e komo ohtînopîra xatken̂e okwe. Awantoman̂e komo marha omtapotarî yewetîra xatken̂e okwe. Aweronoman̂e komo cma re xatken̂e achew so. Baaw mtapotarî makî tko n̂ekatîmyatken̂e kica. Takronoman̂e pînî ro mtapotarî mak n̂ewehcatken̂e okwe.

9 Ero ke ken̂ekexe so men kicicme awehtoponhîrî komo poyero, wîîkesî Ow Aporin komo. Amxîkrî komo yepamtho meero wen̂ekes amn̂e.

10 Miya etocoko ha Kitin pono komo yenso. Keta pono komo yenîn̂e marha en̂epecoko n̂examro yehtoponho yentan̂e komo. On wara kacoko, Nai ha ma re anarî komo, amna wara ehxapu komo? kacoko iitono komo ya.

11 Anarî komo ma re nahsîpînketken̂e ponaro cehtoponhîrî komo anarî komo ponaro tak cehtome so hara, Kaan pîn komo ponaro cehtome so ha? Ow wîxakn̂e oyanan komo yenporin̂e me okre. Oyahsîpînketken̂e tko oyanan komo ero pîntho yahsîtome hara kica.

12 Ai, kah yawno komo, amyamro eserepokacoko oyanan komo poko. Erahtîmcoko ro mak. Ahwokacoko ro mak n̂examro poko, wîîkes Ow Aporin komo.

13 Asakî nasî oyanan komo yehtoponho, kicicme ehtoponhîrî komo, tuuna pîtho warai Ow n̂examro karihton̂e komo ken̂arî warai. Noro yipu rma tko oyahsîpînketken̂e okwe. Toopu tak nahcetken̂e tutunarî komo yen hara. Cetahkaxi tko nasî yînahtothîrî komo okwe. Cetîkesî tak yutunathîrî komo okwe. Ero wara xatken̂e oyanan komo kica.

14 Tooto yanton makî katî mîkyam Ixaw Yana komo? Tosom mîn yaw ewruxapu ma mîkyam ha? Ahce poyero waapa narîtho me tak nat hara okwe?

15 N̂examro pen wece mayanatken̂e reaw warai komo, kar̂pamxan warai kom ha, hihi, ketken̂e kopi wece so. N̂examro rowon nîwîrîmetken̂e ro mak okwe. N̂examro yewtontho nakn̂iyatken̂e. Pohra so tak nasî ewtonthîrî komo okwe.

16 Ahtîpîrî komo nahketken̂e oko Nope pono komo, Tapn̂es pono komo marha.

17 Aporin komo Ow, kir̂wan̂he kaar̂atken̂e so esama yaw. Owî tko mahsîpînketken̂e okwe. Awanme ro so rma metwîrîmet ham okwe.

18 Oroto tak ahce kacho mîîcetu Exitu pona Sio yepu poi eetome awokru komo awya so? Ahce kacho Asiria pona mîîcet hara iitono poi eetome awokru kom hara okwe?

19 Kicicme awehtoponhîrî komo rma apanarexe so amn̂e. Opona enîhkan̂e me awehtopo komo marha nas amn̂e atwerman̂e komo me. Ero ke on wara kacoko, Kicicme ro mak taxe kica. Kporin komo mak tahsîpînketken̂e kica, ponaro kehtoponhîrî komo rma. Cîmîkno wara ro mak nasî ero wara kehtopo komo kica, kacoko. Oponarora ro mak maxe okwe, wîîkes Ow Aporin komo Kaan, awantoman̂e ro kom ha.

20 Pahxa rma paaka yîpîmtawno warai maxikwetken̂e apîmtawnonhîrî komo, amicithîrî komo warai marha mawocetken̂e. On wara mîîketken̂e owya, Awewetîra ro mak nas amna, mîîketken̂e okwe. Îh po so metîrapetken̂e wooxam wara, kîîrî pohkan̂e wara. Weewe yapomyaw so marha ero wara metîrapetken̂e kica.

21 Yihcirî me ka onatîrî warai me kiir̂atken̂e so, uupa yatî warai me. Tpoxwem me cepetaxmu warai me ka mîxatken̂e. Ahce kacho anarî warai me tak metakîcetken̂e hara okwe owero ro rma? Naatî pîn warai me tak metakîcetken̂e okwe, comota pono warai me mak okwe.

22 Anarimaw na mekoroketu kotokan̂e ke, sakmo ke marha na meyehyatu mer̂pono pîn ke. Wara rma kicicme awehtoponhîrî komo etowra rma nas okwe, owero ro rma wa nasî, wîîkes Ow Aporin komo Kaan ha.

23 On wara mîîkexe, Kicicme exihra rma nas amna. Baaw poko exihra ro mak xakn̂e amna, mîîkexe. Ahce kacho ero wara mîîketu kopi? Tarenakem yaw so mîxatken̂e kicicme ro mak. Ero wara awehtoponhîrî komo yîhtînocoko. Kameru warai mak amyamro karitî warai. Anarimaw cimicithîrî nawocesî kameru, miya n̂emahciyasî. Noro yipu warai amyamro okwe.

24 Buhu warai marha amyamro, okno pîn warai, woosî warai. Pohnîntari mak n̂etar̂asî noro yipu. Ciin̂o xe cexitaw kîîrî kotorî n̂esunukyasî. Ero yimaw ewacantopora ro mak nai. Cipici xe exitaw kîîrî hara mooxe tohra rma nasî woosî yeposo cekar̂kaxi ro tohra. Yohno rma n̂eseporpesî woosî kîîrî ya. Ero wara nasî buhu okno pîn. Noro yipu warai rma amyamro kica.

25 Mooxe awcetaw so ahtarî komo n̂ewakrokesî, awokru komo xe marha tak maxe tuuna xe. Ero wa so tohra ro mak ehcoko, wîîkesî thakwa re awya so. On wara makî tko Ow meyukyaxe, Tohnaw mak tak amna mîpanatanmekya. Pîra, kesî tak amna awya. Ponaro anarî yana komo yehtopo xatî me mak nas amna. Ero ke noro yipu yaka men amna cesî, mîîkexe owya okwe.

26 Anarimaw na cen̂epan̂em meen̂atu awemyawno komo yaar̂ataw rma. Ero wa een̂ataw cehyapampokacho ken̂ehra thakwa nai noro. Ero wa xa marha naxe Ixaw Yana pen komo amn̂e, cehyapampokacho komo ken̂ehra thakwa naxe. Ero wa naxe n̂examro kayaritomon komo, antoman̂e komo, tîmsom pokono ro komo, weronoman̂e komo marha. Ero wa naxe Ixaw Yana komo ahnoro.

27 Weewetho yakro mak nîmtapowaxe, Apapa amoro, kexe ero yipu ya kopi. Toopu yakro marha nîmtapowaxe, Amxîkrî ow, kexe ero yipu ya hara kopi. Ohyai tak n̂etaknametken̂e okwe. Owece cewru exihra ro mak tak naxe okwe. On wara tko naxe amn̂e cetwîrîmacho chew cexitaw so hara, Apa, amok ha, amna n̂he yukurunpetamko, kexe tak hara re owya.

28 On wara tko weyukyasî yîmtaka so, Ahto ma natu ponaro awehtopo ro komo? Menpor̂atken̂e hara re akro amtapotacho komo. Ahto tak natu n̂examro? Noro yipu komo xa matko mohcowpe awesemetanmekyataw so, akurunpen̂e komo me exitaw so. Xuta yepamtho komo amyamro, Mer̂pora ro mak mexe naxe ponaro awehtopo komo. Yaake nas awewton komo, ero wicakî xa marha naxe ponaro awehtopo kom hara.

29 Ahce kacho oyakro mîmtapowatu akurunpetopo komo poko? Oyanwekn̂e komo mexe amyamro ahnoro. Aporin komo rma Ow wîîkes ero wara awya so ha.

30 On wara marha wîîkes awya so, Tohnaw amxîkrî komo Ow panarekn̂e ham okwe. Panatara rma xatken̂e okwe. Aweronoman̂enhîrî pen komo mîwaiketken̂e kacipara imo ke rma okwe. Reaw wara rma mîxatken̂e tmayan̂em wara.

31 On wara wîîkes awya so Ixaw Yana komo ya, omtapotarî poko men eserepokacoko, Aporin komo mtapotarî poko ha. Axawa imo wara makî katî wai awya so Ixaw Yana komo ya? Awarpanawno wara katî wai yîwya so roowo wara? Ahce kacho on wara mîîketu amyamro oyanan komo, Tanme ro mak amna n̂etar̂as okre. Ahyaka mokuhra ro mak tak amna nasî, mîîketu okwe ahce kacho?

32 Twen̂ekarî ma re nai emasî tporokru poko? Twen̂ekarî ma re nai wooxam, ciin̂ontaxmu, tporokru poko? Wara rma opoko twen̂ekarî xatken̂e oyanan komo mer̂pora kaamo, yukuknomarî yopo ro mak okwe.

33 Takîhsom amyamro aaxatî komo yenpamnotopo poko mak okwe. Kicicitho komo rma n̂ehcamhokexe awehtopo komo poko kica, wooxam kom ha.

34-35 Aponon komo poko rma kamxuku n̂esenpesî. Emyawnomnî pen komo kamxukutho mîn, emetanmexapu komo kamxukutho ha. Awapantaw so exihra rma wîxakn̂e kamxuku yentome owya. Kir̂wantaw mak n̂esenpesî. Wara rma on wara rma mîîkexe, Kicicme exihra ro mak nas amna. Amna poko tak n̂etîrwoxinke ham Kaan, mîîkexe kica. Ero ke tak ken̂ekexe so, Kicicme exihra rma nas amna, karî poyero awya so.

36 Ahce kacho miya xiya wara metar̂atu awehtopo komo yaknamachome awya so? Mîhyapamyaxe men okwe amn̂e Exitu pono komo pona hara. Pahxa mîhyapamyatken̂e Asiriu komo pona, ero wa xa marha mîhpayamyaxe Exitu pono komo pona.

37 Exitu poi mîîcexe hara tîhyapamso. Ahtîpîrî komo mahsîyaxe ahyapamrî ke so. Aporin komo nahsîpînkatho komo mîkyam, pona meen̂axe n̂examro. Awakronoman̂e komo me exihra ro mak naxe okwe, kasko yîwya so, kekn̂e. Ero wara kekn̂e Kporin komo owya.