On wara marha wîîkes awya so Ixaw Yana komo ya, ahce wa nai kîîrî cipici yai cetowyataw? Yîhyai na nîîce yihcinhîrî. Anarî tak na nahsîya ciin̂o hara. Ero wara exitaw ahce wa tak nai noro yin̂onho? Cihcinhîrî katî nahsîya xa hara awya so ahsî xe cexitaw? Kica, ero wara cihcinhîrî yahsîyataw xa hara kicicme arowon komo n̂ehtîkes okwe ero wa ahsîtopo yanme. Ero wara rma maxe amyamro, mîk hak mak mahsîyatken̂e amyamro aan̂o komo warai me kica. Wara rma ohyaka amohcoko hara.

2 Îîpî meretîrî mko encoko comota ken̂arî pînî mko ha. Ahto nai îîpî kîîrî yenakan wara awetakritopo pîn awya so? Apokono warai komo mîmomokyaxe ceremaxi esama yakumyaw. Arabe wara rma maxe, axawa imo pono wara. Kicicme miir̂atken̂e arowon komo kicicme awexirî ke so kica, ciin̂o yairono wara awexirî ke so ha.

3 Ero ke tuuna yekpora tak wîxakn̂e. Okomn̂i tmohsom mokuhra tak xakn̂e okwe. Tweeno pîn yewken xa amyamro, ewcutan kom ha. Pîra, yîhyapamra ro mak nas amna, mîîkexe rma re okwe.

4-5 On wara tko mîmtapowaxe amn̂e oyakro, Apa, oyakronoman̂enho roro Amoro. Mehxaro ow makronomekn̂e okre emasî me oyehtoponho n̂ixa ro. Miya roro katî mîrwona opoko? Etîrwoxinkara ro mak katî mai amna poko? mîîkexetak owyla. Ero wa mîmtapowaxe oyakro. Wara rma kicicme mîxatken̂e, kicicme marha mîmtapowatken̂e. Ero yipu poko mekaricetken̂e ro mak kica. Ero wa mîxatken̂e kica.

6 Taa, ero yinhîrî nîmtapowakn̂e xa hara Kporin komo oyakro. Kayaritomo me exitaw Xosias on wara kekn̂e owya, Kaan pona enîhkan̂e komo mak mîkyam Ixaw Yana komo. Meen̂e ha na exirî komo? Îh pona so cetken̂e, weewe yapomyaka so marha cetken̂e, taakem yapomyaka. Iito so ciin̂o yairono wara ro mak xatken̂e kica.

7 On wara cma re wîîkekn̂e n̂examro poko, Amn̂e na mokyat hara ohyaka, wîîkekn̂e cma ha re. Mokuhra tko xatken̂e okwe. Ohyai totopo komo tko n̂een̂akn̂e noro yakno Xuta. Kemîknon̂e komo marha mîkyam Xuta komo meero okwe.

8 On wara wîxakn̂e Ixaw Yana komo poko, opona enîhkan̂e komo poko ha, yîhyai so oyetowtoponho Owî rma mewrekn̂e karita. Ero wîmyakn̂e yîwya so. Ohyai tak wen̂epekn̂e ciin̂o yairono wara exirî ke so emapona roro kica. Ero yinhîrî tweeno pîn me tak noro yakno ween̂akn̂e hara kica Xuta. Kemîknon̂e mîk kica. Noro makîrha tak cekn̂e ciin̂o yairono wara ehso hara.

9 Eserepokara ro mak xatken̂e Ixaw Yana komo kicicme cehtopo komo poko. Kicicme ro mak tîrowon komo n̂iir̂atken̂e kica. Tooputho poko mak xatken̂e ciin̂o pokono wara rma kica, weewetho poko marha xatken̂e ero wara kica. Ero wara xatken̂e Ixaw Yana komo, wooxam wara, ciin̂o yairono wara.

10 Wara rma on wara xatken̂e noro yakno hara, Xuta komo, kemîknon̂e me mak xatken̂e kica. Ohyaka tmohsom wara xatken̂e ha re. Aaxe tak nas amna, ketken̂e. Ketken̂e ro kyam mak kica, yaaro xa kahra, kekn̂e Kporin komo owya.

11 On wara rma kekn̂e Noro owya, Opona enîhkan̂e komo rma re mîkyam Ixaw Yana komo. Miya xe xa kemîknon̂e komo mîkyam Xuta kom hara. Wara n̂he tko naxe ha re Ixaw Yana komo takîhso n̂he Xuta yepamtho komo yopo.

12 Taa, omtapotarî ekatîmta miya nohce n̂ixan komo ya. On wara kasko, Ai Ixaw Yana komo, opona enîhkan̂e komo rma re amyamro. Wara rma ohyaka tak amohcoko hara. Yîrwomra was apoko so. Etpînîn yawno Ow ha, wîîkes Ow Aporin komo. Eroromero yîrwomnî Ow.

13 On wara kan̂e me mak awexi xe so wasî, Kicicme xakn̂e amna kica, kan̂e me. On wara mîxatken̂e, Ow manwekyatken̂e kica, Aporin komo Ow ha, ponaro awehtopo komo. Ponaro anarî yana komo yehtopo ya xa matko mîmyatken̂e tawakerecho komo kica. Ero warai mîmyatken̂e weewe yapomyaw so, taakem yapomyaw so, wîîkes Ow Aporin komo, kesî Kporin komo awya so.

14 On wara marha kesî Kporin komo awya so, opona enîhkan̂e komo mak amyamro omxîkrî komo. Wara rma amohcoko hara ohyaka. Aan̂o komo rma Ow ha. On wara kiir̂axe so, kmen̂ekexe so. Cewn̂e so kmen̂ekexe so ewto pono komo poyinonho. Asakî so kmen̂ekexe so noro re komo yepamtho. Onmen̂ekatho komo tak wekyasî Siaw pona.

15 Ero yimaw tak awenîn̂e komo wiir̂asî oper̂a yenîn̂e komo warai me. Owara xa marha cesehtînosom komo mak wiir̂asî ero warai me. N̂examro tak awar̂axe so camkîra, yuhnari yîhtînon̂e me cexirî ke so kir̂wan̂he tak awar̂axe so okre.

16 Ero yimaw tak mepamtîkexe ro mak okre. Arowon komo po rma naxe awepamthîrî komo. Ero yimaw on wara kahra tak naxe n̂examro, Mînto nasî Kporin komo yamatan, kahra naxe. Erotho ponarora ro mak tak naxe, twen̂ekarî mak naxe ero poko. Ero yaka tohra marha naxe. Ero yipu yakîhtora marha naxe anarî xa hara.

17 Ero yimaw on wara kexe tooto komo Xerusaren poko, Kporin komo yapon yeken mîn ha, kexe. Iina tak cexe mîk hak rowon pono komo ahnoro. Kporin komo yeken, kacho me exirî ke iina cexe Xerusaren pona. Kaan yanwekn̂e me exihra tak naxe ero yimaw, oyanme ro mak wehsî, kahra marha naxe.

18 Ero yimaw Xuta yepamtho komo tak mokyaxe hara, Ixaw Yana komo yakro rma mokyaxe. Meyeno pononho mokyaxe nohce n̂ixan pononho ha. On roowo pona tak mokyaxe, aporin pen komo ya onmîtho pona ha.

19 On wara tko wîîkekn̂e, Ahce wa thakwa re kiir̂atu so omxîkrî warai me? Ahce wa thakwa re tpoxwem wîmya roowo awya so, ahce wa thakwa re ero yipu wiir̂a aweken komo me? Kir̂wanî ro on roowo, mîk hak rowon pono komo yeken yopono okre. On wara tko wîîkekn̂e, ero yimaw, Apa, mîîkexe tak owya okre. Ohyai etowra ro mak tak maxe.

20 On wara tko mîxatken̂e, wooxam wara mîxatken̂e ciin̂o yai cetowsom wara. Apoko mak wasî, kan̂enho rma n̂etowyaxe anarî komo. Ero wara xa marha maxe amyamro hara, Ixaw Yana komo. Ohyai metowyatken̂e, Ahyai etowra ro mak nas amna, kan̂enho rma. Ero wa mîxatken̂e amyamro okwe, kesî Kporin komo.

21 Taa, on wara marha kesî Kporin komo awya so, Tooto mtapotarî n̂esencesî mehxa îh po, comota ken̂arî pîn po. Ixaw Yana komo yîwratarî mîn n̂esencesî. Amna yukurunpeko, kexe. Kicicitho pokono me tko n̂ehtîketken̂e kica. Tporin komo Kaan nîhcamnoyatken̂e okwe. Ero ke nîwracexe okwe.

22 Opona enîhkan̂e komo mak amyamro okwe. Wara rma ohyaka amohcoko hara. Kakir̂wamexe so ka opona enîhkan̂e pîn me tak awehtome so, kesî Kporin komo awya so. On wara tak Ow meyukyaxe amn̂e, Taa, amna tak mokyas hara ahyaka. Amna porin Amoro, ponaro amna yehtopo ha, mîîkexe.

23 Tohnaw ro mak ceen̂asî îh pona kukurunpetopo komo. Kukurunpera ro mak wa nasî ero yipu mer̂pono pînî rma. Kporin komo xa nasî Ixaw Yana komo kurunpen̂e, ponaro kehtopo kom ha.

24 Pahxa amna mrenai ro rma enporixaputho mak nas amna yîîm pen komo n̂iritho yermomn̂e wara. Iyokuthîrî pen komo oper̂a, paaka pen marha, yumumuthîrî pen komo, emsîthîrî pen komo marha. Ero warai pen komo yermomn̂e wara marha nasî enporixaputho okwe.

25 Amna tak n̂etakriyasî tîhyapamso ro mak. Amna yopo mak nas amna yîwîrîyakacho tooto komo ya. Kporin komo poko kicicme amna xakn̂e kica, ponaro amna yehtopo poko. Ero wa xakn̂e amna, amna porin pen komo marha. Mehxa ro rma ero wara xakn̂e amna tîmrenai ro rma okwe. Kporin komo yewetîn̂e pîn me nas amna, ponaro amna yehtopo yewetîn̂e pîn me kica. Ero wara nas amna kica, mîîkexe. Ero wara Ow meyukyaxe amn̂e, kesî. Ero wara kesî Kporin komo awya so.