Keserepokesî ro mak oyewtontho poko. Pohnî me ro mak tak nas okwe. Pahxa mer̂pora xatken̂e iipono komo. Oroto tak wooxam wara nasî ecin̂onkaxapu wara okwe. Pahxa cekaiporesom me roro xakn̂e mîk hak rowon pono komo n̂entarî me. Kayaritomo pici wara xakn̂e, mîn hak rowon pono kayaritomon pici wara. Oroto tak antonano me mak nas okwe, epeman me antomaxapu me thakwa.

2 Kosope tîwrataxmu wara nasî, ceresposponîmsom wara okwe. Ewyokuthîrî nasî eepataw. Pahxa cma tî re xatken̂e yaake noro xatî komo. Oroto tak ahworen̂e exihra ro mak nas okwe. Noro pen n̂emîknoyatken̂e yiixatînhîrî komo. Yiixatî pîn me tak naxe hara okwe.

3 Waapa narîtho me tak naxe Xuta pen kom okwe. N̂examro napickexe ro mak ahsîn̂e komo. N̂emetanmekyaxe marha okwe. Mîk hak rowon pono komo chewno me mak tak naxe. Cexpore exihra ro thakwa mak naxe iito yîchew so. Esemetanmekyataw so rma mokyaxe emetanmekn̂e komo xa hara. Ero wa Xuta pen komo n̂emetanmekyaxe okwe.

4 Tîwrataxmu wara marha nasî Siaw yesamarî mko hara. Ahwon wara nasî mokuhra ro mak exirî ke tahwotaxmu komo ahwotacho komo yimaw so. Pohra marha nasî metata mko. Kaan ya tîmsom pokono komo marha pokexe okwe. Ahwora ro mak naxe emasî komo, Xerusaren pononho komo. Cerewre tîwrataxmu wara nasî ewtonthîrî komo okwe.

5 Iitononhîrî komo yantoman̂e me tak naxe yiixatî pîn komo okwe. Esemetanmekîra ro mak naxe yiixatî pîn komo. Kporin komo xa Mîk Xerusaren pononho komo n̂emetanmekyasî. Mer̂pora ro mak xakn̂e kicicme ehtoponhîrî komo. Ero ke waapa narîtho me tak naxe yîmxîkrî komo. Yiixatî pîn komo nahsîtho me naxe okwe.

6 Oroto tak yawno mera ro mak nasî Siaw yemsîrî kir̂wanînhîrî okwe. Kooso wara mak tak naxe iitononhîrî yantoman̂enho pen komo, katayarî yenîn̂e pîn wara. Ero wara exitaw kooso kar̂pera ro mak n̂emahciyasî twaparî yenîche. Ero wara naxe Xerusaren pononho pen komo okwe.

7 Oroto tahcaxe ro mak tak Xerusaren pononho pen komo, n̂esemetanmekyaxe marha okwe. Ero wa tahcataw so rma cerepore cehtoponhîrî komo pînîn yaw naxe. Pahxa cerepore ro mak tîxatken̂e okwe, kexe. Ero wara exitaw so waparî komo mokyatken̂e. N̂examro pen tak nahsîyatken̂e okwe, yukurunpen̂e komo exihra ro mak xatken̂e okwe. Yiixatî pîn komo n̂ewretken̂e ro mak kica een̂ataw so. Ahsîyataw so rma n̂ewretken̂e kica.

8 Kicicme ro mak xatken̂e Xerusaren pononho komo. Ero ke poxumnî me tak naxe kica. Cemyawnoyemînhîrî komo mîkyam okre, kan̂enho komo rma n̂examro nîwîrîyakexe tak kica. Ponomnî wara ro mak n̂examro yehtopo n̂een̂atken̂e. Ero ke nîwîrîyakexe. Okwe, kexe mak Xerusaren pononho komo. Tîwîrîyakan̂e komo yai n̂etaknamexe.

9 Kicicme n̂examro yehtoponho xakn̂e wooxam sayan wara, tusmuyemtho wara kica. Ahce wa wai amn̂e on wara rma oyexitaw miya roro kopi? kahra xatken̂e okwe. Ero ke cerewre ro mak n̂epîrketken̂e twaparî komo mamaka. Ahworen̂e komo exihra ro mak xakn̂e okwe. On wara wîîkes awya Apa, oyemetanmetopo cma re meen̂asî. N̂ehcoyoponkexe ro mak amna xatî pîn komo okwe.

10 N̂examro yemyawnonho nahsîtîketken̂e yiixatî pîn komo. Tpoxwem nahsîyatken̂e ahnoro. Xenciu komo n̂ewomyatken̂e Kaan mîn yaka n̂examro wero ro rma kica. Iina mokuhra ro mak n̂ehcowpe noro yipu komo, kachonho awya mokyatken̂e wero ro so rma.

11 Okwe, okwe, kexe ahnoro Xerusaren pononho pen komo. Tuuru komo n̂epor̂axe. Cemyawnonhîrî komo nîmyatken̂e tînahrî komo yepetho me kar̂pe n̂he tak cehtome so. Owî cma re meen̂as Apa. Meserepokesî cma re opoko etaporerî ke so kica.

12 Ahce wa amna meen̂atu amyamro hara amna yari tîtosom komo, amna pînîn yaw exihra ro makî mat ham okwe? Awero ro so xa amna encoko. Anarî yana komo ma re meen̂atu ahwokatîkaxapu komo amna wara? Ahwokatîkaxapu xa amna anarî yana komo yopo. Amna nahwoketîkekn̂e ro mak Kporin komo tîrwonîmtopo me xa exitaw.

13 Kai ro wehto nar̂mekn̂e Noro opona. Oyocho tak nakn̂iyasî oco. Mîîye ke ohtayamxîkyakn̂e. Oporokekn̂e okwe yaw xa marha owtotome hara. Oyakrononkekn̂e, okar̂kekn̂e marha. Ero wara oriyakn̂e kokmamso ro okwe.

14 Kicicme oyehtoponho n̂imiyakn̂e opîmtaka paaka pîmtawno wara. Kicicme oyehtoponho kahyakn̂e tamorî ke rma. Kapuche opîmtaka n̂imiyakn̂e. Okar̂kekn̂e okwe Kporin komo. Oyar̂mapekn̂e oyopono komo ya okwe.

15 Kîrkomo yapikn̂e wara ro mak xakn̂e Kporin komo, karitî komo yapikn̂e wara okwe. Ero wa oyewton pononho pen komo n̂iir̂akn̂e. Waapa komo nan̂ikyakn̂e kar̂pamxan komo waparî komo. Oyewton pononho pen komo yapikmon̂e wara ro mak xakn̂e oko. Xuta yemsîrî yapikmon̂e wara ro mak xakn̂e Kporin komo okwe. Uupa napikmexe ewkukachome ero wara apikmon̂e wara xakn̂e.

16 Ero ke thakwa tak kîwracesî. Kewyokwasî ro mak oyewru yopo. Omîtwono komo cma re naxe oyahworen̂e me. Mooxe mak naxe noro yipu komo okwe. Ahwora marha naxe amna xîkrî komo. Amna yopo thakwa naxe amna xatî pîn kom okwe.

17 Napockanwaxe Siaw pononho komo tahworen̂e komo wece ha cma re. Ahworen̂e komo tko exihra ro mak nas okwe. On wara tko kekn̂e Kporin komo Xako yepamtho mîtwono komo ya, Ai, amyamro, Xako yepamtho komo xatî pîn me tak ehcoko, kekn̂e. Ero ke poonotho wara tak naxe Xerusaren pononho komo, tusmuyemtho wara ro mak kica.

18 Yaaro rma ero wa kekn̂e Kporin komo. Yîmtapotachonhîrî wanwekyakn̂e okwe. Ero ke on wara wîîkes anarî yana komo ya, miyan komo ya rma, oyahwokacho encoko. Oyewtontho pononho komo naar̂atken̂e waapa komo okwe. Emasî komo naar̂atken̂e, kar̂pamxan komo marha.

19 Ooxatî komo cma re wan̂ikyakn̂e. Oyemîknoyatken̂e mak ha tko kica. Poritomo pen komo waihyatken̂e okwe, tîmsom pokono pen komo marha okwe. Tan ewto po rma waihyatken̂e tînahrî komo yepor̂ataw rma, waipîra ciin̂e komo yepor̂ataw.

20 Apa kah yawno, oponaro cma re masî. Kahwokesî ro mak, keserepokesî marha. Cerepore exihra ro mak wasî. Awanwekn̂e me ro mak wîxakn̂e kica. Esama yaw so yîmxîkano n̂iir̂axe kacipara imo ke okwe. Omîn yaw oyexitaw hara waixapu komo marha ween̂asî.

21 Okwe okwe, kacho tî n̂encetken̂e ooxatî pîn komo omtapotarî ha. Oyahworen̂e exihtorî marha n̂encetken̂e. Ahnoro oyesemetanametopo n̂encetken̂e. N̂examro yewresaw tî amna mîwîrîme okwe. Apa, on wara mîîkekn̂e n̂examro poko, Pahxaro tak n̂examro meero naxe tîwîrîmaxmu me hara oyanan pen komo wara xa marha, mîîkekn̂e. Ero ke ero wara ciitopo me n̂enmape yohno n̂he.

22 Kicicme n̂examro yehtoponho ponaro tak esko. N̂examro tak emetanmeko amna memetanmekyasî ero wara xa marha. Kicicme oyehtoponho yepetho me rma owî memetanmekyakn̂e. Ero ke ero wa xa marha n̂examro emetanmeko hara. Okwe wîîkesî emapona roro Apa. N̂ekar̂kesî ro mak oropotarî okwe. Ero wara wasî.