On wara nasî Kporin komo Siaw yemsîrî poko, ahrun̂e wara nasî kaapu smun warai ke. Poko so tîrwonîmrî ke wa nahruyakn̂e. Cenpore ka xatken̂e Ixaw Yana komo. Kah yawno wara xatken̂e. Roowo pona tko nar̂mekn̂e cenporemînhîrî. Tîhtarî yapon pînîn yaw exihra ro mak xakn̂e tîrwonîmtopo me exitaw ha.

2 Xako yepamtho komo yewton yer̂momn̂e wara marha xakn̂e Kporin komo. Yîpînîn yaw so exihra ro mak tak xakn̂e. Xuta yemsîtho sowtatun komo ka xatken̂e twacan komo yaw so. Ero mko marha macakekn̂e Noro roowo pona roro. Noro pîntho me ro mak tak n̂iir̂akn̂e n̂examro pen kayaritomon pen, antomano rin̂e pen komo marha.

3 Yaake ka xatken̂e Ixaw Yana yaan̂e komo, poturu wara cehsom komo. Noro yipu pen komo marha waihkekn̂e Kporin komo ahnoro. Pahxa ka tamorî ke rma kaari ke Ixaw Yana xatî pîn komo porohkekn̂e amna yukurunpetome. Oroto ero wara amna yukurunpera nas okwe. Xako yepamtho pen komo yakn̂in̂e wara nasî Noro, wehto wara ro mak nasî akn̂in̂e komo mak oco. Yîmîtwono komo yakn̂in̂e wara marha nas oco.

4 Ixaw Yana komo xatî pîn wara ro mak nasî Kporin komo. Tîkrapan n̂ehsasî karme. Amna waparî me tak nas okwe. Kir̂wan̂he tîn̂enîthîrî komo xa waihkekn̂e ahnoro. Wehto yar̂man̂e wara ro mak nasî Siaw yemsîrî mîn pona. Wehto wara ro mak nasî yîrwon oco.

5 Ixaw Yana komo xatî pîn me tak nasî Kporin komo. N̂examro pen yermomn̂e wara xakn̂e okwe. N̂examro kayaritomon pen mîntho mko yermomn̂e wara marha nasî. Ixaw Yana sowtatun komo mîn macakekn̂e. Tîwrataxmu komo n̂epamnoyakn̂e, okwe okwe kan̂e komo marha. Ero wara Xuta yemsîrî n̂iir̂akn̂e okwe.

6 Tîmîn n̂ixketîkekn̂e, mararî wara ro mak n̂iir̂akn̂e. Ixaw Yana komo yesenmetopo komo mîn n̂ixkekn̂e. Twen̂ekarî tak naxe Siaw pono komo tahwotacho ro me ciixapu mko poko, cepokaretopo me ciixapu mko poko marha. Kporin komo yanme rma ero wara naxe. Nîrwonasî ro mak tak Noro. Ero ke kayaritomo ponarora ro mak tak nasî, tîmsom pokono komo ponarora marha.

7 Tîwya tîmsom yakn̂itopo tak poxunkekn̂e. Tîmînthîrî marha nahsîpînkekn̂e okwe. Kayaritomo mîn wacan n̂ixkapekn̂e yiixatî pîn komo ya. Yahya kexe tak yiixatî pîn komo Kporin komo mîn yaw rma. Ceseresmacho komo po so n̂emtarakes amna ero wara tak kexe amna xatî pîn kom hara okwe.

8 Siaw yemsîrî wacan macakacho tak nîhtînoyakn̂e Kporin komo. Xapopo warai n̂ehyatkekn̂e waaca yukuknomachome. N̂eexi tak, ero wicakî mak macakesî, kahra ro mak nas okwe. Ero ke tîwrataxmu wara tak nasî ewto wacan, sowtatu mîn marha. Ehcamaw re rma n̂exixkesî ero yipu asakno roro rma.

9 Yuhnaka tak n̂emihcakn̂e ewto metatan. Metata yecehtotopotho naxikwekn̂e Kporin komo. Meye tak nasî Ixaw Yana kayaritomon pen mîk hak rowon pono komo chew. Iito marha naxe antomano rin̂e pen komo. Kaan ya tpanatametopo komo yentara ro mak tak naxe. Ero wara ciino n̂iir̂asî Kporin komo amn̂e, kacho yenîhra tak naxe n̂examro weronoman̂e kom okwe.

10 Siaw yemsîrî poritomon komo naxe ceremaxe roowo po. Tîtken̂e mak naxe iito. Ero wara naxe poritomo komo. N̂ekanapupurexe tak okwe. Kumixitho marha namruyaxe. Emasî komo marha nutupenwaxe. N̂esewnapexe ro mak. Ero wara naxe Xerusaren pono pen komo okwe.

11 N̂erewasî tak oyewru oyewyotarî ke. Keserepokesî ro mak. Oropotarî nasî wooku wara yukmamxaputho wara. Ero wara wasî oyanan komo yemsîtho pen waihkarî ke. N̂epokunkexe tak rikomo komo roro po rma. Enawno komo meero naxe kar̂pera.

12 On wara kexe tînocwan komo ya, Yeme, ahto nai oyuru, ahto nai owokru? kexe. Ero wara kexe twerorora cehtîketaw so roro po rma. Paraxkaxapu wara rma kexe oko. Ero wa kexe tîson komo yenaw so rma, twaihyataw so okwe.

13 On wara wîîkes awya so, ahce wa thakwa re kewyakîre amoro Xerusaren yemsîtho okwe? Ahce wa thakwa re awehtopo komo wekatîmya? Onoke warai na amoro Siaw yemsîtho okwe? Yîhtînopîra ro mak wasî. Noro yipu komo wara maxe amyamro, ka xe was apoko so awahworetome so. Miya ro mak n̂esenmamye awîrîmacho komo. Amtapen̂e xa nasî tuuna imo wara rma. Onoke thakwa re awehcemetu so okwe?

14 On wara ketken̂e apoyino komo awya so, aweronoman̂e komo, Kaanî mtapotarî ween̂e. On wara kekn̂e Noro apoko so, ketken̂e tohnaw ro mak okwe. Awemîknoyatken̂e so ro mak okwe. Kicicme awehtoponhîrî komo yenpora ro mak wa naxe awya so. Yaaro ekatîmyataw ketaw ha re waapa narîtho komo n̂ehcerî hara oona. Ero wara awemîknoyatken̂e so tohnawno poko aweronoman̂e komo okwe.

15 Oroto ahyari tîtosom komo knowknow kexe awîrîyakachome. Okwe, kexe ro mak. N̂epanamexe marha ceserepokarî ke so Xerusaren yemsîtho yeen̂ataw. On wara tak ma nai ewto imo pen, cenporem xa mîn, kachonho, Roowo poko hakno komo n̂enîrî mexanînho okwe, kexe.

16 Cemcaxmu wara mak naxe aaxatî pîn komo ahnoro aaxera so cexirî ke so. Kica ro mak, kexe apoko so. Nîyokrececenwaxe marha aaxera so ro mak cexirî ke so. On wara kexe apoko so, Xerusaren pononho pen komo tak cermomtîkace okre. Pahxa ro makî moxam waihkacho ponaro tîxatken̂e. Ceen̂asî tak tantono komo yîhcamnotopo okre, kexe okwe.

17 Kporin komo xa matko amna n̂iir̂e tînîhtînoputhîrî yaw roro rma. Tîmtapotachonhîrî yaw roro rma n̂iire. Pahxa rma n̂ekatîmyakn̂e awya so awîrîmacho komo, ero yaw roro rma tak n̂iire. Awar̂metken̂e so okwe. Apînîn yaw so exihra ro mak xakn̂e okwe. Awya kr̂a, kamexpekn̂e aaxatî pîn komo ya apoko so. Karitî me tak aaxatî pîn komo kayaritomon n̂iir̂akn̂e. Ero wara xakn̂e Kporin komo apoko so.

18 Ero wara exitaw so cerewre ro mak nîmtapowatken̂e opoyino komo Kporin komo yakro. On wara kesî Noro awya so hara, Ai, Siaw yemsîrî wacan, awya wîîkesî, ahyawno komo n̂ewyotacowpe mer̂pora ro mak, eepu wicakî ro mak okwe. Katpanaw n̂ewyotacowpe, kosope marha. Ewto pono komo, awya so wîîkesî, Tîî kahra ro mak ehcoko. N̂eexi tak oyewyotacho, kahra ro mak ehcoko.

19 Kosope rma apakacoko Kaan yakro amtapotachome so. Ero yimaw rma amtapotacoko akurun komo yesenhîyakametaw. Aropotawno ekatîmtîkacoko Kporin komo ya. Amtapotarî en̂epeko tuuna yar̂kan̂e wara. Apockantacoko Noro wece. Ero wara amtapotacoko Noro yakro amxîkrî komo poko ciki, waipîra ehtopo komo poko. N̂ekar̂ketîkexe okwe amxîkrî komo rooma ke. Roro po rma n̂epokunkexe, ewto po rma ha.

20 Apa kah yawno, amna cma re meen̂asî, amna poko cma re meserepokesî. Onoke warai komo mîwîrîmekn̂e amna yîwîrîmacho wara? Tîmxîkîthîrî pen punu rma non̂exe tan wooxam komo. Cenawnonhîrî komo punu rma non̂exe okwe. Kir̂wan̂he ma re nai awya tîmsom pokono pen komo waihketaw amîn yaw rma okwe, iina marha weronomano rin̂e pen komo waihketaw hara. Kir̂wan̂he ma re nai ero wara awya?

21 Kar̂pamxan pen yokoputho nasî puknow wara ewto roron po, poritomo pen yokoputho marha nasî ero wara xa marha. Emasî pen komo waihyatken̂e kacipara imo ke, kar̂pamxan pen komo marha. Arwonîmtopo yimaw xa noro yipu komo mîwaikekn̂e. Yîpînîn yaw so exihra ro mak mîxakn̂e.

22 Tooto amna nan̂ikyasî ahwotachome. On harehe, kes amna. Ero wara rma eraspetono man̂ikyakn̂e opona. Arwonîmtopo yimaw xa emahcira thakwa xatken̂e, cewn̂e n̂hema emahcira xakn̂e. Etîmtoxapu marha exihra xakn̂e okwe. Amna xîkrî cma re n̂ewruyatken̂e. N̂examro marha cma re amna por̂mamnoyakn̂e. Noro yinhîrî komo rma tko waihketken̂e amna xatî pîn komo okwe. Ero wara xatken̂e amna xîkîtho pen kom okwe.