On wara oriyasî Kporin komo, oyemetanmekyasî ro mak okwe. Twatman ke kpanaretu so tîrwonataw, ero yipu ke panarexapu me was ow oko.

2 Awarpanaw mak oyar̂asî roro Noro. Katpanawno pîn wara ro mak oriyas okwe.

3 Oyakronoman̂e mera tak nai ham okwe. Oyemetanmekn̂e me mak tak nai ham okwe. Emapona roro ero wara nas opoko kokmamso ro rma.

4 Poritomotho cîpîtho wara ro mak ohcîpîrî n̂iir̂as Noro. Poritomotho me xa thakwa kesenpesî. Oyocho marha tak naxikwesî marha oko.

5 Kesemetanmetîkesî ro mak okwe. Ero ke kahwoketîkesî. Ero wa oyehtopo ke omamton̂e wara nasî Kporin komo. Ahna so na tohnî me ro mak oriyas okwe.

6 Awarpanawno me mak oriyasî pahxa waihxapu pen komo wara rma.

7 Owacanton̂e wara nasî Noro emahcin me ro mak oyehtome. Kanawa mici warai ke omin̂e wara nasî, tawsîn̂em ke oko.

8 Kîmtapowasî cma re Noro yakro. Cerewre ro mak wîîkesî yîwya, kar̂pe wîîkesî. Omtapotarî yentan̂e pîn wara tko nas okwe.

9 Oyesamarî wahkoton̂e wara ro mak nasî Noro, toh ke wahkoton̂e wara, enporixapu ke ha. Cekumxe ro mak n̂iir̂as oyesamarî.

10 Uhsu wara ro mak nasî Noro opoko, owapanton̂e wara. Reaw wara marha nas opoko owapanton̂e wara.

11 Peen cheka oyan̂e wara nasî iito oyarixkachome. Akronomra ro mak marha oriyas okwe.

12 Tîkrapan yesîn̂e wara nasî. Waiwî ke yînworî me was ow pen.

13 Tuwuhre ke owesî opar̂kakan to, cemepun yawnonho ke rma.

14 Opoyino komo yetaporetopo me tak wasî. Owîrîyakacho naar̂axe waano, kokmamso ro naar̂axe.

15 Ahwora ro mak oriyasî Kporin komo, cîmîkno yeen̂e wara.

16 Tohkarara ke oyorî yahkan̂e wara nas oko. Wemronho ke opupuren̂e wara marha nasî.

17 On wara wîîkes awya Apa, oyerepotacho yenpora ro mak mas owya. Cerepore oyehtoponho wîhcamnoyakn̂e mak okwe.

18 On wara wîîkesî, Karitî me oyehtoponho n̂ehcamnoye ro mak okwe. Kporin komo xa oyerepores amn̂e, kacho marha n̂ehcamnoi.

19 Oyesemetanmetopo ponaro cma re mas Apa, cîmîkno yeetoponho owya, erexkuthîrî warai yeetoponho ha.

20 Ero wara oyehtoponho ponaro rma wasî. Ero yimawnonho yîhtînoyataw owya kahwokes hara okwe.

21-22 On wara Noro yehtopo tko wîhtînoyasî oyahwotachome hara, kîpînîn yaw so rma wa nasî Kporin komo. Kîpînînkara ro mak nasî. Ero ke waihtîkara taxe.

23 Kîpînîn yaw nasî Noro enmar̂atîxera. Kokmamso ro ero wa nasî. Amn̂e enmapuche ero wa xa marha nas hara, kîpînîn yaw xa hara. On wara wîîkesî yîwya, Amna pînîn yawno ro xa Amoro Apa esemîknopîn me ro mak miya roro okre.

24 On wara wîîkesî oropotaw, Oyemyawno warai xa Mîk Kporin komo. Ero ke, Ahrika, ahwokara wasî, oyakronomesî rma Noro, wîîkesî mak.

25 Kakronoman̂e Mîk Kporin komo. Ahrika oyakronomape Noro, kan̂e komo nakronomesî, yîmtapotarî yenta xatî kom ha.

26 Kir̂wan̂he nasî on wara kan̂e, Kesemetanmekyasî ka. Ahrika oyakronomape Kporin komo, kan̂e. Ero wara kapore nasî pokahra ro mak.

27 Kir̂wan̂he kiir̂asî kesemetanmetopo komo, kar̂pamxan me rma kesemetanmekyataw so.

28 Cesemetanmesom me cexitaw kar̂pamxan cewyaro tak n̂eremape tîtken̂e. Ero wara n̂eremape Kaan npanaretho me cexirî ke.

29 Roowo wece cewru mak n̂etîrapope, roowo po xa tîmtarî. Ero wa cexitaw tahworetopo tak na n̂een̂a hara amn̂e okre.

30 Ceepatarî n̂enpope cewkatapan̂e ya rma. Tîwîrîyakaxmu me ro mak tak n̂expe. Ero wara n̂expe.

31 Eroromero kahsîpînkara tko nasî Kporin komo.

32 Kemetanmekyaxe so rma re. Kîpînîn yaw so cehtopo rma tko n̂enpesî kîwya so. Miya ro mak Noro nasî kîpînîn yaw so.

33 Tanmenkera ro mak emetanmekno n̂iir̂asî Noro. Ahwokano ciri xera ro mak nasî.

34-36 On wara naxe anarî komo, kahrutopo yawno pen komo yapikn̂e wara ro mak naxe, roowo poko hakno pen komo yapikn̂e wara naxe okwe. Kir̂wan̂he epemano cirihra ro mak naxe anarî kom hara. Kyopono ro wero ro rma ero wara naxe. Kicicme kpoyino yehtopo n̂ekatîmyaxe marha anarî komo tohnaw ro mak kica. Kir̂wan̂he naxe ero wara ciino rin̂e komo, kahra ro mak nasî Kporin komo.

37 On wara xa kweronoman̂e yehtopo tîhtînopore nasî, Ero wara men taxe amn̂e, ero wara, ero wara, nîîke. Ero yinhîrî yîmtapotachonhîrî yaw roro rma na tatu. Ero wara exitaw, Kaan yanmera rma n̂ekatîmye kica, kahra cexpore nai noro poko.

38 Kyopono ro mtapotarî yanme mak kepor̂asî kesemetanmetopo, esemetanmekîra kehtopo marha.

39 Toototho makî tko kîwyam waipîn kom ha ka. Ahce kacho, Okwe, okwe, tîtketu kicicme kehtoponhîrî komo yepetho me rma kesemetanmekyataw so?

40 Kehtopo komo centîkapore nasî, takîhso cesehtînopore nasî ero poko. Kporin komo wece tak cetaknamapore nas hara.

41 Yaaro mak xa tîmtapotapore nai Noro yakro, Noro yaka kropotarî yanîmn̂e wara cexpore nai. Tapockantacerî marha Noro wece.

42 On wara tîtkacerî yîwya, Kicicme ro mak amna xakn̂e kica. Awanwekn̂e me ro mak amna xakn̂e okwe. Ero wara amna yehtoponho yîhcamnopîra ro mak mîxakn̂e.

43 Arwonî rma mamruyakn̂e aponon wara. Ero yaw tak amna memetanmekyakn̂e. Amna mîwaikai. Amna pînîn yawra ro mak mîxakn̂e okwe.

44 Kaweresî ke cetahrusom wara mak mîxakn̂e okwe. Ero ke amna mtapotarî yentara mas okwe.

45 Xapari wetî wara ro mak amna miir̂e, yukpurukpuruntho wara marha. Ero wara amna miire mîk hak yana komo wero ro rma.

46 Amna poko nîmtapowaxe ro mak amna xatî pîn komo. Kicicme ro mak nîmtapowaxe.

47 Pona amna yerahtîmtopo rma amna n̂epor̂as okwe. Ewtarî yaka epîrkaxapu wara amna nas oko. Amna mak n̂etwîrîmekn̂e okwe. Cehcamnoso tak nas amna yewtontho okwe.

48 Kewyokwasî ro mak mer̂pora, tuuna yepu wara ro mak nas oyewyokru. Opoyino yemsîtho pînîn yaw kîwracesî tîhcamnoso exirî ke okwe.

49 Kewyokwasî roro yîtîtmamra ro mak.

50 Ero wara wasî pahkî Kporin komo ya amna yentome tak amn̂e. Kah yaw rma nasî, en̂exa rma oyen̂as amn̂e.

51 Oyenmayipu komo yemsîtho komo yesemetanmetopo ween̂asî. N̂examro yenîrî ke n̂erewasî tak oropotarî.

52 Oyepor̂atken̂e ooxatî pîn komo cemetanmekn̂enhîrî pînî ro mak okwe. Tarin̂em woso tîhcesî, ero wara rma oyepor̂atken̂e ooxatî pîn komo.

53 Ewtarî yaka oriyatken̂e owaikacho. Toopu marha nar̂mekn̂e oopo oko.

54 Kahxi cheka enor̂ixapu wara ro mak wîxakn̂e. Owaitopo xa tan okwe, wîîkekn̂e.

55 Yuhnaw xa oyexitaw tak ewtarî yaw, awakro kîmtapowakn̂e. Ow akronomak Apa. Amxîkrî ow ha, wîîkekn̂e awya.

56 Omtapotarî mencekn̂e okre. Ero ke omtapotarî entakî rma, Ow akronomakî okwe, kacho. Epanayahrura cma re masî.

57 Pahxa kîmtapowakn̂e oyakronomacho poko awya. Ero ke ero kaamo po rma ohyaka mîmokyakn̂e. Erasîra tak esko, mîîkekn̂e owya.

58 Ero yinhîrî tak ooxatî pîn komo men̂ekekn̂e. Ow mecehcekn̂e waipîra rma.

59 Tohnaw ro mak oyemetanmekyaxe. Ero wara oritopo meen̂asî. Ero ke n̂examro en̂ekakî.

60 Yîwya so oyemetanmetoponho meen̂as Apa. Oyemetanmetopo poko rma n̂esehtînoyaxe okwe.

61 Kicicitho me ro mak nîmtapowaxe opoko. Ero wara yîmtapotacho komo mencesî. Oyemetanmetopo poko esentacho komo mencesî.

62 Ehtura n̂esencexe owîrîmacho poko. Kokmamso ro ero wara n̂esencexe. Ero rma tko mencesî Amoro Apa.

63 Enko Apa n̂examro yehtopo. N̂eremexe ka, ero yinhîrî nawomyaxe hara. Waano naar̂axe opoko cetaporetopo komo mak kica.

64 Ow tak epanko Apa. Anarmerpan poko xatken̂e oyemetanmetopo poko. Ero wara ehtopo komo yepetho tîmko yîwya so.

65 Yîropotarî komo ahruko yuhnareno yîhtînopîra ro mak ehtome so. N̂examro yîwîrîmacho poko amtapotakî Amoro.

66 N̂examro wenari etoko tîrwon̂e. N̂examro pen yîhcamnoko kaapu makataw exihra cehso ro, aweken makataw exihra cehso ro ha Apa. Ero wara n̂examro cirko.