On wara marha wîîkesî, nîcwinta ro mak okwe ooru tpepeyuremînhîrî. Anarme tak nasî ooru kir̂wanînhîrî xa. Cetakpaxi tak nasî toopu Kaan mîn wacan me ciixapunhîrî. Esama yaw so cetakpaxi so ro mak nasî.

2 Ero wara xa marha naxe kar̂pamxan komo, Siaw pono komo. Tîpîn̂emînhîrî ro mak mîkyam ooru wara. Oroto tak yîpînîmnî me mak naxe. Tahremtho wara ro mak naxe, er̂mo kahxapu wara okwe.

3 Kamara warai komo na rma tîmxîkrî komo wokpesî moomo ke. Ero warahra tak naxe oyanan yemsîrî komo. Tîmxîkrî komo pînîn yawra ro mak naxe okwe apeseturusu wara, axawa imo pono wara.

4 Rikomo n̂uru n̂etahsîyasî karantaka wokru exihra exirî ke. Oyuru xe wasî yeme, kexe rikomo komo. Yîwya so tîmn̂e tko exihra ro mak nas okwe.

5 Tînahporemînhîrî komo tak naxe yînapumra ro mak roro po so rma. Yucur̂exapu yaw por̂mamnoxapu komo poono yaw oroto tak n̂etîrapexe yukpurukpuruntho po mak okwe.

6 Pahxa Sotoma pono pen komo n̂ecakyatken̂e kicicme cehtopo komo yepetho me. Yohno ro mak n̂ecakyatken̂e. Yukurunpen̂e komo exihra ro mak xakn̂e ero yimaw. Oyanan komo yemsîtho yehtoponho yepetho reha nasî Sotoma pono pen komo yehtoponho yepetho yopo okwe.

7 On wara ka xatken̂e oyanan komo, yusmumra ro mak xatken̂e n̂examro yantoman̂e komo pun n̂eepe yopo. Tumutwe marha xatken̂e paaka mownu yopo. Cucure so xakn̂e yupun komo rubi yopo. Sapira wara n̂esenpekn̂e okre.

8 Oroto tak cicwiye mak nasî yupun komo tahrem cwintho yopo. Onok na mîkro ha? kexe mak tak akrononhîrî komo rma, camkî ro mak tak n̂een̂axe esama yaw etar̂ataw so. Yîhcîpîrî tak n̂etahsîyasî iyochîrî poko okwe. Turpe tak nasî yîhcîpîrî, weewe wara ro mak nasî.

9 Wara n̂he naxe kacipara imo ke waihkaxapu pen komo. Ahwora ro makî reha naxe rooma yaka twaihsom komo reha. N̂erewasî ro mak rooma oko. Nakporotîkexe ro mak yînahpumra cexirî ke so, mararî pono exihtorî ke okwe.

10 On wara xatken̂e wooxam komo, tîmxîkîthîrî pen komo pînîn yawnonhîrî komo rma, tîmxîkîthîrî pen komo pun nîyetken̂e. Totme so n̂iir̂atken̂e tîmxîkîthîrî pen komo punu rma okwe. Ero wa xatken̂e oyanan komo yemsîtho yehcamnoyataw okwe.

11 Nîrwonîmtîkekn̂e tak Kporin komo, tîrwon wahkotora tak xakn̂e. Tîrwon nar̂mekn̂e tîyanan pen po so wooku yukmamn̂e wara. Wehto yirin̂e wara xakn̂e, Siaw pona yirin̂e wara. Ero tak Siaw nakn̂itîkekn̂e mapatanthîrî meero okwe.

12 On wara ka ketken̂e tooto komo, roowo poko hakno komo, n̂examro kayaritomon komo marha, Xerusaren wacan metatan yaro ewomra thakwa naxe iitono komo waparî, yîîxatî pîn kom ha, ketken̂e ha ka.

13 Xerusaren wacan metatan yaro rma tko n̂ewomyatken̂e iitono komo waparî kicicme exirî ke so n̂examro weronoman̂e komo. Kicicme marha xatken̂e yînîmrî pokono kom hara. Takîhsom pen komo waihkan̂enho mîkyam xatken̂e okwe.

14 On wara xatken̂e weronoman̂enhîrî komo, tîmsom pokono komo marha, ewto po n̂etar̂atken̂e ewuhnî wara ro mak. Kamxuku ke n̂etwîrîmetken̂e kica. Ero ke n̂examro ponon yape xera ro mak xatken̂e poyino komo rma.

15 On wara kexe poyino komo yîwya so, Amna yai etocoko. Tusmuyemtho ro mak amyamro kica. Miya etocoko, etocoko ha. Amna apehra ro mak ehcoko, kexe yîwya so. Ero ke n̂emahciyatken̂e tak. Mîk hak rowon pono komo cheka toce. Iina toche so on wara ketken̂e iitono kom hara, Tan enmapîra ro mak ehcoko, ketken̂e. Ero wara ketken̂e yîwya so.

16 N̂examro pen nakpayakn̂e Kporin komo cewru ke rma. N̂examro ponarora tak nasî Noro okwe. Tîmsom pokono komo ponarora ro mak tak naxe poyino komo. Apa, kahra ro mak tak naxe poritomo komo ya hara okwe.

17 On wara amna xakn̂e amna waparî mokuche, esama amna n̂een̂akn̂e tukurunpen̂e komo mokrî yenî xe. Mokuhra ro mak xatken̂e. Sowtatu komo mokrî yenî xe amna xakn̂e anarî rowon pono kom ha. Amna n̂esewkekn̂e ha re pahkî enîrî ke. Tohnaw tko amna n̂een̂akn̂e. Amna re yukurunpen̂e mera thakwa xatken̂e anarî rowon pono komo.

18 Amna wenatîketken̂e amna waparî komo. Ero ke esama yaw so etarira thakwa amna xakn̂e. Pahnoke tak xakn̂e ham amna waihtopo. Asak mak tak xakn̂e enmarî waipîra amna yehtopo. Amna waihtopo me tak xakn̂e ham okwe.

19 Kar̂pe xa mokyatken̂e amna wenatîkan̂e komo. Yaimo yopo kar̂pe mokyatken̂e kaykokoro tîtosom yopo. Amna wenatîketken̂e îh pore so. Pohnîntaw so marha amna wapancetken̂e.

20 Amna kayaritomon pen meero nahsîyatken̂e okwe Kporin komo nîhkapetho rma. Pona amna ya entopo xa mîk xakn̂e, amna yesesîtopo warai rma. Noro kurun yaw cenmayas amn̂e mîk hak rowon pono komo yotawno me, kekn̂e cma re amna. Noro rma tko nahsîyatken̂e waapa ewtarî yaka, tînahtothîrî komo yaka.

21 Tawake rma ehcoko amyamro Eton yemsîrî komo, tahwore rma ka ehcoko. Amyamro marha ahwotacoko Usu pono kom hara. Amyamro meero awokpexe so Kporin komo amn̂e. Ero ke tak mîwenaxe. Mepononkexe marha kica.

22 N̂eexi tak kicicme awehtoponhîrî yepetho amoro, Siaw yemsîrî reha. Waapa nahsîtho me awen̂epera ro mak tak nasî Kporin komo. Amoro hara Eton yemsîrî, kicicme awehtoponhîrî yepetho nîmyasî rma awya. Kicicme awehtoponhîrî komo nahrunkesî. Ero wara nasî Kporin komo apoko so hara.