Taa, on wara xakn̂e Setekias, 21 cimn̂ipu tî xakn̂e noro yewrutoponho kayaritomo me cecir̂ataw. 11 cimn̂ipu xakn̂e kayaritomo me. Xerusaren xakn̂e noro yewton. Amutaw tî xakn̂e noro nocwan, Xeremias yemsîrî, Ribna pono yemsîrî.

2 Kicicme marha tî noro n̂een̂akn̂e Kporin komo. Xeoiakin yehtoponho yaw roro rma xakn̂e kica.

3 Ero wa xakn̂e Kporin komo rwon yanme rma. Xerusaren pono komo poko nîrwonakn̂e, Xuta komo poko nîrwonakn̂e miyan komo poko rma. Pahkî tîrwonîmîche n̂examro pen tak n̂en̂epekn̂e mooxe tîhyai. Ero ke marha Babiron̂a pono komo kayaritomon tak nanwekyakn̂e Setekias. Ewetîra tak xakn̂e okwe.

4 Ero ke on wara tak xakn̂e Nabukotonoso, Babiron̂a kayaritomon, Xerusaren pono komo waparî me mokyakn̂e. Tîsowtatun komo n̂ekyakn̂e ahnoro takro. Ewto wamcetken̂e. Roowo marha n̂enmekyatken̂e twacan komo me. Cecen̂an me so roowo n̂iir̂atken̂e ewto tmamritîkaxi ro. 9 cimn̂ipu xakn̂e kayaritomo me Setekias yehtoponho n̂examro mokyataw. 10-înhîrî nuun̂i po mokyatken̂e, 10-înhîrî kaamo po ha.

5 Iito rma xatken̂e pahkî ewto mamhoko. 11-nhîrî cimn̂ipu pona roro iito xatken̂e. Kayaritomo me Setekias yehtoponho kuknomacho mîn cimn̂ipu kuknon.

6 Ero cimn̂ipu po, 4-nhîrî nuun̂i po, 9-nhîrî kaamo po rooma me tak n̂ehtîketken̂e ewto pono komo. Yînahrî komo exihra ro mak tak xakn̂e okwe.

7 Ero ke ero po ewto wacan nawketken̂e ewto pono komo rma. N̂emahciyatken̂e tak ahnoro Xuta sowtatun komo. Kosope n̂emahciyatken̂e. Etantari ro xakn̂e waaca asakî kayaritomo natîrî panaw. Iito xakn̂e waaca metatan. Ero yaro n̂epataketken̂e. Kawtew komo xatken̂e rma ewto mamhoko. Wara rma n̂emahciyatken̂e. Woskara wece tî n̂emahciyatken̂e.

8 Setekias wenari tko tî cetken̂e Babiron̂a pono komo, sowtatu komo. Kayaritomo mîk xakn̂e Setekias. Xer̂ko pahnoke exitaw noro nahsîyatken̂e woskara po exitaw ha. Yîhyai tî n̂etakpetken̂e noro sowtatun komo.

9 Noro pen tî nahsîyatken̂e. Babiron̂a pono komo kayaritomon yaka tî naar̂atken̂e Hibra pona, Amace pono pona. Noro takî tî Setekias pen yemetanmetopo n̂ekatîmyakn̂e yîwya.

10 Iito rma Hibra po rma Setekias mumutho pen komo waihkekn̂e Babiron̂a pono kayaritomon. Yîîm wero ro rma waihkekn̂e. Ahnoro Xuta yepamtho komo yantoman̂e komo waihkekn̂e iito.

11 Ero yinhîrî Setekias pen tî n̂ewkanoyakn̂e oko. Noro pen marha nîhraknumiyakn̂e akîknotopo ke, bronse warai ke. Ero yinhîrî noro naar̂akn̂e Babiron̂a pona. Iito tak nahruyakn̂e noro pen waihtopo pona roro. Ero wa tî xakn̂e Setekias pen okwe.

12 Ero yinhîrî tak N̂ebusaratan cekn̂e Xerusaren pona. 19 cimn̂ipu xakn̂e kayaritomo me Nabukotonoso yehtoponho. Ero po cekn̂e, 5-nhîrî nuun̂i po ha. Kayaritomo kurun komo yantoman̂e tî mîk xakn̂e N̂ebusaratan.

13 Xerusaren pona tîtoche tak Kporin komo mîn nakn̂iyakn̂e, kayaritomo mîn marha, ahnoro mîîmo mko, Xerusaren pono mko nakn̂iyakn̂e. Enîno rin̂e me cehsom komo mîntho nakn̂itîkekn̂e ahnoro.

14 Iito marha xatken̂e Kawtew komo sowtatun komo, N̂ebusaratan yakro xatken̂e. Ewto wacan macaketken̂e n̂examro. Kayaritomo kurunu ro nantomarî komo mîkyam n̂examro macaketken̂e. Macaketîketken̂e Xerusaren wacantho ahnoro okwe.

15 Xuta yepamtho komo rma ciki re xatken̂e Xerusaren po emyawnomnî komo mak ha tko. N̂examro marha naar̂akn̂e N̂ebusaratan. Ahce na ciin̂e ro komo marha naar̂akn̂e, Nabukotonoso maywen me etowxapu komo marha. Noro yipu komo naar̂akn̂e noro.

16 Iito rma tko nînomyakn̂e emyawnomnî komo, anarî komo mak, uupa yatî yenîn̂e me, mararî yenîn̂e me marha.

17 Kporin komo mîn mîtwono mko nahketken̂e Babiron̂a pono komo. Mapata imo asakî, esemokacho yaponî mko, tuuna yen porin, ero mko nahketken̂e wahra cehso ro. Naatîketken̂e takî tî Babiron̂a pona.

18 Kaan mîn yawno mko marha naar̂atken̂e, tîmsom pokono komo yemyawno mko ha. Tahrem, caarapa, wehto yetahsîtopo mahkototopo, tutum porin, kaxara yanîmtopo, ahce na mko naatîketken̂e Kaan mîn yawno mko, bronse ciixapu.

19 Ooru ciixapu marha naatîketken̂e basia mko, kotoporem yakn̂itopo, tutum wahrai, tahrem, weeyu yapon, kaxara yanîmtopo, parakweci, ahnoro ooru ciixapu, prata ciixapu marha, ahnoro ero yipu mko naar̂akn̂e kayaritomo kurun komo yantoman̂e.

20 Nawsînakn̂e ro mak mapata imo ahkaxapu, bronse ciixapu, tuuna yen porin, ero yapon paaka warai mko. Ero yipu mko nawsînakn̂e. Yukuknomarî yopo ro mak xakn̂e. Saromaw n̂ir̂potho mko mîn xakn̂e. Kporin komo mîn yakan me n̂irpekn̂e.

21 Porin mîn xakn̂e mapata imo, 8,1 metru wicakî xakn̂e kawnon, 5,4 metru xakn̂e awrutarî kuknomacho. 4 kamoyaran wicakî xakn̂e yahconon. Potokoi so xakn̂e asakno roro rma.

22 Kaw marha xakn̂e mapata imo kanahtawno. 2,3 metru wicakî xakn̂e kawnon. Mîîye warai ke tporokutoso xakn̂e, homan ke marha. Bronse mîn xakn̂e homan me ciixapu.

23 96 homanî mko xakn̂e mapata kanahtawno yawxarî poko. 100 xa hara xakn̂e mîîye yepoi hara. Ero mko naar̂akn̂e N̂ebusaratan Babiron̂a pona.

24 Seraias marha naar̂akn̂e N̂ebusaratan. Kaan yaka cewomsom mîk xakn̂e Seraias. Sopon̂ias marha naar̂akn̂e Kaan yaka cewomsom xawyakan. Kaan mîn metatan yenîn̂e komo marha xatken̂e iito 3 mak. N̂examro pen marha naar̂akn̂e.

25 Iito rma ewto po xakn̂e sowtatu yantoman̂e, kayaritomo yakro cesentaxmu komo marha 7 yakenon. Sowtatu komo yosotî mewren̂e ro marha xakn̂e iito. Sowtatu yan̂ikn̂e mîk xakn̂e. Yaake xatken̂e noro maywen komo marha iito, 60 ha.

26 Noro yipu komo naar̂akn̂e N̂ebusaratan Babiron̂a kayaritomon yaka Hibra pona.

27 Iito tak n̂examro pen waihkapekn̂e noro. Ero wa tî xatken̂e Xuta pen komo okwe. Yîrowonthîrî komo poi naar̂atken̂e waapa komo.

28 On wicakî tî ka naar̂akn̂e Nabukotonoso miya mokuhnî me hara, 3023 tî naar̂akn̂e Xutew pen komo. 7 cimn̂ipu exitaw ka kayaritomo me noro yehtoponho n̂examro pen naar̂akn̂e.

29 Ero yinhîrî tak 18 cimn̂îpu exitaw tak kayaritomo me noro yehtoponho 832 tî naar̂akn̂e hara Xerusaren pononho komo.

30 Ero yinhîrî takî 23 cimn̂ipu exitaw kayaritomo me noro yehto-ponho 745 tî naar̂akn̂e hara N̂ebusaratan, kayaritomo kurunu ro komo yenîn̂e. 4.600 yakenon xatken̂e aaxapu komo ahnorono komo kuknomacho. Ero wicakî tî naar̂atken̂e.

31 Taa, ero yinhîrî 37 cimn̂ipu tak xakn̂e aaxapu me Xeoiakin yehtoponho, Xuta komo kayaritomonînho yehtoponho. Ero po Epiw-Merotake tak n̂ecir̂akn̂e hara Babiron̂a pono komo kayaritomon me. Ero po rma tak Xeoiakin nahrunkekn̂e. 12-nhîrî nuun̂i po nahrunkekn̂e 5-nhîrî kaamo po.

32 Tawake tî nîmtapowakn̂e Epiw-Merotake noro yakro. Yaake kayaritomo komo xatken̂e noro yakro Babiron̂a po. Xeoiakin yapon tî n̂iir̂akn̂e n̂examro yopono me.

33 Ero ke tpononthîrî tak mohkekn̂e Xeoiakin, kahrutopo yaw ehtoponhîrî mko. Anarî namruyakn̂e hara. Kayaritomo yakro takî tî n̂eseresmekn̂e miya roro twaihtopo pona roro.

34 Ahnoro kaamo po roro Xeoiakin nahrî nîmyakn̂e Babiron̂a kayaritomon. Ero wa nîmyakn̂e yîwya noro waihtopo pona roro. Ero wa tî xakn̂e Xeoiakin.