On wara marha kesî Kporin komo Babiron̂a pono komo poko, On wara wîîkesî Babiron̂a pono komo poko, ocowo imo wara cehsom komo werepokesî n̂examro waparî me mohtome so. Opoko tîrwon̂em me tmohsom pen komo waparî me mohtome so werepokesî.

2 Puruma yatho mar̂mexe kahsî yîpîpîthîrî yarpotome ocowo ya, ero wara xa marha Babiron̂a pono komo n̂iir̂axe oyanme toxapu komo. Miya ro mak nar̂mexe. Pohra tak nasî yîrowonthîrî komo okwe. Yîwîrîmacho komo me enmayataw ewto pen wamcexe ar̂machome.

3 Krapa ke cemyarkem komo tak n̂esesîcowpe n̂examro wotohme, Kuripara marha namrucowpe tponon me so cecen̂an komo me. N̂examro sowtatun waihkacoko ahnoro. Kar̂pamxan komo yîmtora ro mak ehcoko.

4 Kawtew pen komo waihyaxe tîrowon komo po rma, waihkaxapu kom ha. Ewto roron po rma waihyaxe paraxkaxapu me so rma.

5 Ixaw Yana komo yahsîpînkara ro mak nasî Kporin komo, ponaro n̂examro yehtopo, kantoman̂e ro kom ha. Xuta komo yahsîpînkara marha nasî. Tawronohkatîkaxi rma re xakn̂e yîrowon komo kicicme ehtopo komo ke. Kicicme xatken̂e kica Kir̂wanî ro poko, ponaro cehtopo komo poko rma. Wara rma n̂examro yahsîpînkara nasî.

6 On wara wîîkes awya so, Babiron̂a pono komo chewno amyamro, emahcicoko men yîchei so tak waipîra awehtome so. Kicicme cehtoponhîrî komo poyero rma waihyaxe n̂examro pen. N̂examro pen yakro rma tko ewaikapora ehcoko amyamro hara yîchewno komo. Oroto tak Babiron̂a pono komo yemetanmetopo me nasî Kporin komo ya ehtoponhîrî komo yepetho me.

7 Parakweci wara xatken̂e Babiron̂a pono komo, ooru ciixapu wara. Kporin komo yemyawno wara xatken̂e. Ero yai erîrî ke wenatken̂e tak roowo poko hakno komo. N̂examro wokru n̂eer̂atken̂e mîk hak rowon pono komo. Ero ke wara ro mak kan̂e me tak n̂ehtîketken̂e.

8 Ponan̂e rma tko waihyaxe Babiron̂a pono komo. Ewtonthîrî komo nasî cecahso okwe. Iitononhîrî pen komo pînîn yaw awratacoko. Katî ke n̂examro ehcemacoko. Yukukmacoko ika, n̂ecihya rma na ehcemache so.

9 N̂examro amna n̂ehcemarî ha re. Ecpin me thakwa mak naxe okwe. Ero ke n̂examro tahsîpînkacerî. Kaikatko krowonî ro komo pona so. Tukuhkawno wara ro mak nasî n̂examro yîwîrîmacho. Îîpî wara rma nasî kah yaka rorono wara. Mer̂pora ro mak nasî yîwîrîmacho komo.

10 Kir̂wan me kehtopo komo reha tak n̂enpekn̂e Kporin komo. Ero ke amohcoko. Kporin komo n̂iritho cekatîmcerî Siaw pono komo ya, ponaro kehtopo komo n̂iritho ha.

11 Awuhre komo tak kapecoko iime cehso ro. Awecen̂an komo enmecoko. Mecia pono komo wakpamnoyasî Kporin komo Babiron̂a pono komo waihkacho poko. N̂examro pen waihkacho nîhtînoyakn̂e Noro. Ero wara n̂esepanîyasî, tîmîn n̂epanîyasî n̂examro pen poko.

12 Banteira anîmcoko waapa kuknon. Babiron̂a wacan kanahtaka rma ciicoko. Kayaritomo kurunu ro komo epamnocoko n̂he. Sowtatu komo antomacoko waapa yekahtorî poko. Ewto pono komo wapantorî poko antomacoko anarî kom hara. Tînîhtînorî yaw roro rma n̂iir̂asî Kporin komo. Tîmtapotachonhîrî yaw roro rma Babiron̂a pono komo nîwîrîmesî.

13 Tuuna yecihtawno amyamro mer̂pono pîn yecihtawno. Mer̂pora ro mak nasî awemyawno komo cepethîkem kom ha. Roowo po awehtopo komo tko n̂enahcasî oroto okwe. Awemyawnononhîrî komo yepamnotopo ponaro mak mîxatken̂e. Ero wara awehtoponhîrî komo yecenarîno tak awepor̂asî awîrîmacho kom hara.

14 Awaikacho komo poko nîmtapowakn̂e Kporin komo, kantoman̂e ro. Cehtopo rma n̂etahcakn̂e yaaro tîmtapotarî yentachome entan̂e komo ya. On wara kekn̂e apoko so, Awewton komo pona kîrkomo wekyasî roowo tawronohkatîkaxi ro. Mer̂pora ro mak wekyasî makaka wara ro mak. Yuu yuu, kexe n̂examro awar̂metaw so.

15 On warai Mîk Kporin komo, roowo yakîhton̂enho Mîk. Kar̂pe cexirî ke nakîhcekn̂e. Ewakrokan me roowo n̂iir̂akn̂e takîhsom me cexirî ke. Kaapu marha namtarekn̂e yuhnari yîhtînon̂e me cexirî ke.

16 Noro yîmtapotache tuuna yewru ken̂e xa tak nasî kaapu. Tuuna yewru nakîhcesî mehxa roowo yenatîtopo n̂ixa rma. Pepe kamexpesî marha tuuna yekpetaw. Ocowo marha n̂ekmexpesî yîmtotopo yawnonho.

17 Ahnoro iitono komo naxe camkî, ahce na yîhtînon̂e pîn me naxe okwe. Ponaro cehtopo komo n̂iir̂axe prata pokono ro komo. Yin̂irithîrî komo rma tko nasî yîhyapamnoren̂e komo me. Kemîknon̂e mak mîn ponaro ehtopo komo me ciixaputho. Esesîn me ro mak nas okwe.

18 Kakronoman̂e pîn thakwa mîn. Tohnawno mak nakîhcesî kopi. N̂ecakyasî kr̂a tak amn̂e emetanmekno ritopo me exitaw tak ha.

19 Ero mko warahra ro mak nasî ponaro Xako yepamtho komo yehtopo. Miyan yakîhton̂enho rma Mîkî reha ahnoro mak. Ixaw Yana komo naxe Noro yanan me. Kporin komo Mîkî, kantoman̂e ro, kacho Mîk ha, Noro yosotî.

20 On warai amyamro reha, owatman warai amyamro, waihkano ritopo. Aake so mîk hak rowon pono komo war̂mesî ro mak. Kayaritomo komo pen Ow waihkesî aake so, maywen pen komo yakro rma.

21 Aake so kawaru komo war̂mesî ro makî yîmkawnonhîrî komo yakro ro rma. Aake so tarara war̂mesî ro makî, osomunhîrî pen komo yakro ro rma.

22 Aake so kîîrî pen komo war̂mesî ro makî, wooxam pen komo marha. Aake so poritomo pen komo war̂mesî ro makî, rikomo pen komo marha. Aake so kar̂pamxan pen komo war̂mesî ro makî, emasî pen komo marha.

23 Aake so oper̂a yenîn̂enho pen komo war̂mesî ro makî, iyokuthîrî pen yakro ro rma. Aake so tmararîyem pen komo war̂mesî ro makî, iyokuthîrî pen yakro rma paaka pen yakro. Aake so kayaritomo pen komo war̂mesî ro makî, ahce na yenîn̂enho pen komo marha. Ero wa ciino wiir̂asî aake so.

24 Babiron̂a pono komo wîwîrîmesî, Kawteia pono komo ahnoro wîwîrîmesî. Kicicme ro mak Siaw pono komo n̂iir̂atken̂e n̂examro awero ro so rma. Ero ke n̂examro wepemesî cerewrem ke, kesî Kporin komo.

25 On wara marha kesî Kporin komo, Îîpî warai amyamro. Roowo poko hakno komo yîwîrîman̂e amyamro okwe. Ero yanme awar̂macho komo wîhtînoyasî, kesî. Oyaporî wehyatkesî awahsîtome so. Îîpî poi kar̂mexe so, mehmere, mehmere, wîîkesî kr̂a apoko. Îîpî wara mak kiir̂axe so, ecahxapu wara.

26 Awewton komo poi toopu yarîhra ro mak naxe mîîmo ciin̂e komo tîmîn wacan me ciitome. Tîmîn wacan yapon me ciisom marha arîhra naxe ahyai so. Pohnî me ro mak nasî awewtonthîrî komo eroromero, kesî Kporin komo.

27 Kayaritomo banteiran anîmcoko sowtatu komo n̂enîrî me. Ero yinhîrî tuu kacoko sowtatu komo yan̂ihtopo, mîk hak rowon pono komo yan̂ihtopo. Tuwuhre komo napohtocowpe kayaritomo sowtatun komo. Babiron̂a pono komo wece tar̂maxmu napohtocowpe. Mîk hak rowon pono komo an̂ihcoko Babiron̂a pono komo waparî me totohme so. Ararace pono komo, Min̂i pono komo, Askenas pono komo, ero warai komo an̂ihcoko. Sowtatu komo yantoman̂e ciicoko. Kawaru komo marha ehcoko mer̂pora makaka wara ro mak, tmayan̂em wara.

28 Sowtatun komo an̂ihcoko, mîk hak rowon pono komo. Mecia kayaritomon komo marha an̂ihcoko, n̂examro yantoman̂e komo marha, ahce na yenîn̂e komo. Ahnoro n̂examro maywen komo an̂ihcoko.

29 Ero yinhîrî tatanaxe mak tak Babiron̂a pono pen komo, n̂ehmamexe marha cerewîmrî komo ke. Ahnoro Kporin komo ya yîhtînotopo tak n̂iir̂axe, Babiron̂a pono pen komo yîwîrîmacho ha. N̂examro rowontho tak n̂iir̂axe pohnî me ro mak, tooto yeken mera ro mak okwe.

30 Etar̂mara tak naxe kîrkomo, Babiron̂a pono komo. Karitî komo rma nîtîtmamyatken̂e. Twacan komo yaw so mak naxe epatakara so. Cekar̂kaxi so tak naxe okwe. Wooxam wara tak naxe. Iitono komo mîntho nakn̂iyatken̂e waapa komo. N̂examro wacan metatan yecetî tak nasî cewakrokaxi so.

31 Mehxa mokyasî waapa yekahton̂e Babiron̂a kayaritomon yaka, xehxa mokya anarî hara. Waapa, waapa, kexe yîwya. Ewto wacan nawkacow mînto mînto wa so okwe, kîsowtatun pen komo waihkacow okwe, kexe yîwya.

32 Tuuna yepu watotopo tak nasî twahkotoso okwe. Cecahso nasî peen, ecihtawno okwe. N̂eraswaxe tak kîsowtatun pen komo okwe, kexe. Ero wara kexe waapa yekahton̂e komo kayaritomo ya.

33 On wara kesî Kporin komo, kantoman̂e ro, ponaro Ixaw Yana komo yehtopo, On wara nasî Babiron̂a pen yemsîrî pen, puruma yîpîpîtîkacho pono wara nasî. Puruma yepu wara nasî, cenmesom wara. Pahnoke tak nasî n̂examro pen yîpîpîtîkacho okwe, kesî Kporin komo.

34 On wara kexe Xerusaren pono kom hara, Konon̂e wara ro mak xakn̂e Nabukotonoso kpoko so. Kakumpon̂e wara ro mak xakn̂e oko. Parakwe wara kiice so yarîhnîtho wara. Kermomn̂e wara xakn̂e okoimo wara. Onaputho nahtîkekn̂e tpoxwemu rma. Tmaxmitaxi ro nahyakn̂e. Karîrkan̂e wara marha xakn̂e kopi.

35 Amna nîwîrîmetken̂e ro mak Babiron̂a pono komo. Ero ke ero wa xa marha n̂examro n̂ehcowpe hara, kexe Siaw pono komo. Kawteia pono pen komo tak waihkape Kaan, amna pen waihketken̂e n̂examro ero wara rma, kexe Xerusaren pono kom ha.

36 Ero ke on wara kes hara Kporin komo, N̂examro pen wen̂ekesî awanme so. Kepanîyaxe so. N̂examro tunarî wapainokesî n̂ikithonhîrî. Tuuna pîthonhîrî marha wapainokesî.

37 Wermonho me mak tak nasî Babiron̂a amn̂e. Kamara yeken me mak nasî. Okwe ro mak, kacho me tak nasî iitoxa tîtosom komo ya. N̂eserepokexe ro mak ewtotho yenîche. Pohnî me ro mak nasî.

38 Yihcirî me ka hihi kexe Babiron̂a pono komo reaw wara kopi. Mayanaxe reaw xîkrî wara.

39 Ero wara mayanataw so n̂examro wokru wetakesî wenîmtome so tak. Nahwowaxe ha kapu. Ero yinhîrî nîwînîkyaxe hara, pakahnî me ro mak nîwînîkyaxe, kesî Kporin komo.

40 N̂examro pen wekyasî oper̂a xîkrî wara, twaihkaxmu wara. Kahn̂eru wara wekyasî, boce komo wara marha.

41 Sesaka tak nar̂mexe waapa komo. N̂examro yewton poko n̂eserepoketken̂e ahnoro roowo poko hakno komo kir̂wanî ro me exirî ke. Ero yipu rma tko nahsîyatken̂e waapa komo. N̂eserepokexe xa hara mîk hak rowon pono komo tîwîrîmatîkaxi xa exirî ke hara okwe.

42 Tuuna imo warai tak nukmekn̂e Babiron̂a pono komo towso ro okwe. Cemiciso tak naxe okwe iitono pen komo mer̂pora exirî ke ewcokocokon.

43 Pohnî me tak nas ahnoro n̂examro yewtontho penî mko. Yîrowonthîrî komo tak nasî turpe ro mak, pohnî me ro mak nas okwe. Tooto yeken me exihra ro mak tak nasî. Tooto yesamarî mera marha nas okwe.

44 Bew pen wîwîrîmesî Babiron̂a po rma. Noro pen tak narîrkesî tîn̂ermomîthîrî. Oyanme rma narîrkesî. Noro yaka esesamatora tak naxe mîk hak rowon pono komo. Ero yimaw marha Babiron̂a wacantho tak n̂emacakes okwe.

45 Ai, oyanan komo awya so wîîkesî, Babiron̂a poi amohcoko. Emahcicoko ro mak waipîra awehtome so. Iitono komo poko nîrwonasî ro mak Kporin komo. Ero ke en̂exa emahcicoko.

46 Anarimaw etîxera kayaritomo komo yehtopo na mencetu n̂examro re rma. N̂etwaiketu n̂examro re rma kopi. Ero yipu yentache awya so ahwokara ehcoko, erasîra marha ehcoko. Anarî cimn̂ipu po ero yipu mencetu, yicimn̂ipuntache xa hara ero wa kacho xa marha mencetu xa hara.

47 N̂enmayasî men amn̂e ponaro ehtopo komo yîwîrîmacho me, ciixaputho yîwîrîmacho me ha. Babiron̂a pono yîwîrîmacho me n̂enmayasî. Ero yimaw cehn̂axmu me tak n̂esenpexe ahnoro itono komo. Iitononhîrî pen komo yokoputho tak naxe ero yimaw pukno wa mak yîrowonthîrî komo po rma.

48 Ero yimaw n̂ewanomexe tak kah yawno komo, roowo pono komo marha. Tahwore n̂ewanomexe. Ahnoro mak nahwowaxe Babiron̂a pono pen komo waparî komo mokrî ke. Nohce n̂ixan komo mokyaxe n̂examro waparî me, kesî Kporin komo.

49 Ixaw Yana pen komo waihketken̂e Babiron̂a pono komo. Ero ke ero wa xa marha roowo poko hakno poyino komo waihyaxe Babiron̂a po hara.

50 Ai, kacipara yai cemahcisom komo, awya so wîîkesî, Babiron̂a poi etocoko. Tan mak ececetora ro mak ehcoko. Mooxe rma awexitaw so Kporin komo ponaro ehcoko. Xerusaren ponaro marha ehcoko.

51 Tîwîrîyakaxmu me taxe okwe. Tîhyapamyaxe ro mak kopi. Ixaw Yana pîn komo n̂ewomyatken̂e Kporin komo mîn yaka, Noro yekenî ro yaka xa okwe.

52 Ero ke on wara kesî Kporin kom hara, On wara wiir̂asî pahxaro, mîk hak warai me ciixaputho wîwîrîmesî. Iitono pen komo marha n̂emkutunaxe ceparaxkarî ke so oko.

53 Ahce wa natu Babiron̂a pono komo tîmîn ciir̂ataw kawno, kah yaka rorono? Ahce wa natu tîsowtatun wacan ciriche yahcome ro mak. Ero wara exitaw so n̂examro waparî komo rma tko wekyasî yîhyaka so, kesî Kporin komo.

54 Babiron̂a pono pen komo yîwratarî n̂esencesî okwe. Kawtew komo rowon pononho komo waihkacho marha n̂esences okwe.

55 Kporin komo rma waihkesî Babiron̂a pono pen komo. Kar̂pe ka nîmtapowatken̂e n̂examro. N̂examro tko nîtîtmamnoyasî Noro. Kar̂pe xa marha nîmtapowaxe yiixatî pîn komo. N̂ewtunaxe mak kopi tuuna imo wara, cewcokocokon̂em wara. Miya ro mak n̂esencesî yîmtapotarî komo.

56 Babiron̂a waparî komo mokyaxe. Iitono pen komo nahsîyaxe karitî pen kom okwe. N̂etaxikwesî tak yîkrapanthîrî komo. Cesepansom Ow Aporin komo. Babiron̂a pono pen komo men n̂epemes amn̂e.

57 Iitono komo wiirasî wenîmxapu wara, kesî Kporin komo. Antomano rin̂e komo, akîhreno rin̂e komo, kayaritomo warai komo, ahce na yenîn̂e komo, ero warai komo wiir̂asî wenmexapu wara. Ero yinhîrî nîwînîkyaxe tak n̂examro. Pakahnî me ro mak nîwînîkyaxe okwe, kesî. Ero wara kesî kayaritomo. Kporin komo Noro yosotî, kantoman̂e ro kom ha.

58 On wara kesî hara Kporin komo, kantoman̂e ro komo, Yahcome rma nasî Babiron̂a wacan. Wara rma n̂emacakesî ro mak amn̂e. Kaw nasî waaca metatan. Ero rma n̂ecakyas okwe. Tohnaw mak n̂etapickexe iitono komo. Tohnaw marha pokexe okwe. Cecahsom me thakwa mak nasî mîk hak rowon pono komo n̂iritho, kesî. Ero wara kesî Kporin komo.

59 Taa, ero yinhîrî ero wa kacho yentamexporî poko Seraias nantomekn̂e Xeremias, weronomano rin̂e ha. N̂erias mumuru mîk xakn̂e Seraias, Maaseias parî ha. Setekias yakro cekn̂e noro Babiron̂a pona, Xuta komo kayaritomon yakro. 4 cimn̂ipu xakn̂e kayaritomo me noro yehtoponho ero po cetken̂e iina. Sowtatu komo mîn yenîn̂e mîk xakn̂e Seraias.

60 Babiron̂a yîwîrîmacho pokono mewrekn̂e Xeremias karita yaka. Ahnoro Babiron̂a pokono mewretîkekn̂e.

61 On wara kekn̂e noro Seraias ya, Babiron̂a pona awtoche on men yîmtapotareko yîn̂entarî komo me. Ahnoro yîmtapotaretîkakî.

62 Yîmtapotaretîkache awya on wara kasko, Apa kah yawno, on wara mîîkekn̂e on ewto poko, wakn̂itîkesî. Ero yinhîrî tooto yeken mera ro mak tak nasî, okno yeken mera marha. Pohnî me ro mak nasî eroromero, mîîkekn̂e, kasko.

63-64 On karita yîmtapotaretîkache toopu yimiko ero poko. Ero tak ar̂makî eepu kwaka, Ewpratesî kwaka. Ar̂mache on wara kasko, Ero wa xa marha n̂emihcasî on ewto, Babiron̂a ha. Pakahra xa hara nas okwe. Yîwîrîmacho wekmexpesî. On pono komo waihyaxe okwe. N̂epîrkexe ro mak Babiron̂a pono pen komo, kasko. Ero wara kekn̂e Xeremias Seraias ya. Iina mak nai omtapotarî, Xeremias ow ha.