1-2 Ero yinhîrî nîmtapowakn̂e Kporin komo Babiron̂a pono komo poko hara, Kawtew komo rowon poko ha. Xeremias yakro nîmtapowakn̂e, weronomano rin̂e yakro ha. On wara kekn̂e yîwya, Ai, Xeremias, on wara wîîkes awya, omtapotarî ekatîmcoko mîk hak rowon pono komo ya. Banteira anîmko. Aropotaka mak cirihra esko. On wara kasko, Babiron̂atho nahsîyaxe waapa komo okwe, ewtotho. Noro pîntho me tak n̂esenpesî Bew Merotake warai me ciixaputho tak nasî cor̂or̂omaxi. Mîk hak warai me ciixaputho mko tak n̂esenpesî cehn̂axmu me kica. Mîk hak warai me yin̂irithîrî komo tak nasî tahkatîkaxi.

3 Babiron̂a pono komo yar̂maxi mokyaxe anarî rowon pono komo nohce n̂ixan kom ha. Kawtew pen komo rowontho tak n̂iir̂asî pohnî me ro mak. Ewtonthîrî po exihra tak naxe tooto. Anana cexe iitononhîrî komo, okno komo marha.

4 On wara marha kesî Kporin komo, ero yimaw tak mokyaxe Ixaw Yana komo Xuta komo yakro rma. Tîwrataro rma mokyaxe Kporin komo yeposo.

5 Ahto nai Siaw yesamarî? kexe iitono komo ya. Ero yaw tîto xatî me xa tak naxe Siaw pona. On wara kexe Ixaw Yana komo, Iito kexitaw so tîmtapotacerî tak Kporin komo yakro, Kporin komo ponaro xa cehcerî, kacho poko. Towhnî me ro mak, tîtkacerî ero poko. Miya roro ero wa kîmtapotacho komo ponaro cehcerî, kexe.

6 On wara xatken̂e oyanan komo, oper̂a wara mak xatken̂e tacixapu wara okwe. Anana ro mak n̂examro naar̂akn̂e enîn̂e komo okwe. Îh pore so mak waimamnoyatken̂e kica. Îh pore so waimamyatken̂e oyok warai pen komo, matîwîn pore so marha. Cepokaretopo ro komo poko twen̂ekarî mak naxe okwe.

7 Oyanan pen komo yenîche anarî yana komo ya, tonon̂e wara mak xatken̂e okwe. Oyanan pen komo waihkache on wara ketken̂e n̂examro wapatho komo, Kicicme exihra ro mak taxe. N̂examro xa matko xatken̂e kicicme Kporin komo poko, yaaro ciino rin̂e poko kica. Kporin komo Mîk, ponaro yîîm pen komo yehtopo Mîk, Noro poko kicicme xatken̂e kica, kexe yiixatî pîn komo.

8 Emahcicoko Babiron̂a poi. Kawtew komo rowontho ahsîpînkacoko. Boce wara mak ehcoko, cexihyem komo yaan̂e wara.

9 Mîk hak rowon pono komo werepokesî Babiron̂a pono komo poko. Nohce n̂ixan komo werepokesî mer̂pono pîn. Iito re kaikatko Babiron̂a pono komo yar̂maxi, kexe. N̂examro wekyasî Babiron̂a pono komo waparî me. Ewto panaw cexitaw so tak n̂epanacexe. En̂exa tak mokyaxe ewto pono komo yahsîso okwe. Sowtatu yuhre wara rma nasî n̂examro yuhre waiwî, yaana me ar̂man̂e yuhre wara. Pohcira ro mak nar̂mexe.

10 Ero wa Kawtew pen komo waihkexe waapa komo. Waihkache so emyawnonhîrî pen komo naar̂axe mer̂pora ro mak. Cemyawnonta okre, kexe tak, kesî Kporin komo.

11 On wara mîxatken̂e amyamro Babiron̂a pono komo, orowontho pono komo waihketaw awya so mahwowatken̂e kica. Tawake ro mak mîxatken̂e kica. Ero yimaw paaka woosî wara mupurukwatken̂e puruma yatho yîpîpîtîkacho pokono wara. Bui wara marha, Booo, mîîketken̂e kica.

12 Ero ke anocwan komo tak nîhyapamyasî ro mak apona so. Noro pîntho me tak n̂esenpesî aame so ewruxapunhîrî. Anarî yana komo xawyaka xa tak naxe Babiron̂a pono komo. Naatî yewtî mera ro mak tak nasî arowonthîrî komo, turpe tak nasî, axawa imo me mak nas okwe.

13 Nîrwonasî ro mak Kporin komo Babiron̂atho poko. Ero ke pohra tak nasî ewtotho. Tooto yeken mera ro mak tak nasî. Babiron̂atho panari cetaw so cetarisom komo amn̂e, Okwe ro mak okwe, kexe. N̂eserepokexe ro mak ewtotho poko yîwîrîmatîkaxapu me enîrî ke.

14 Amohcoko amyamro krapa yesîn̂e komo. Waiwî ar̂macoko Babiron̂a pono komo wece. Awuhre komo yîmtora ro mak ehcoko. Kicicme ro mak xatken̂e n̂examro Kporin komo poko okwe.

15 Yuuu, kacoko Babiron̂a pono komo wece. Mehxarpa kacoko. Ero yimaw tak etar̂mara tak naxe. Yîmînthîrî komo macakexe kawno pen. Ewto wacantho marha macakexe. Kporin komo yesepantopo me tak nasî Babiron̂a pono komo poko. Ero ke n̂examro poko esepancoko. Waihkano rin̂enho komo mîkyam. Ero ke ero wa xa marha n̂examro pen ar̂macoko hara.

16 On wara ciicoko Babiron̂a pono komo, mararî ciin̂e komo waihkacoko. Mararî pono yeperîrî yenmetopo me exitaw tak enmekn̂e komo marha waihkacoko. Kacipara imo ke cemyarke so rma mokyaxe waapa komo. N̂examro yai tak n̂emahciyaxe Babiron̂a pono komo chewno komo ahnoro. Tpoyino komo cheka n̂emahciyaxe, tîrowonî ro komo pona.

17 Oper̂a wara naxe Ixaw Yana komo, akpaxapu wara okwe. Reaw nweken̂emekîtho wara naxe okwe. Yihcirî me ka Asiriu komo kayaritomon xakn̂e ermomn̂e komo wara. Kokon̂oro tak Nabukotonoso xakn̂e n̂examro yocho yaxikwon̂e wara hara, Babiron̂a kayaritomon ha.

18 Ero ke on wara kesî Kporin komo, kantoman̂e ro, ponaro Ixaw Yana komo yehtopo, Babiron̂a pono komo kayaritomon wîwîrîmesî, yîrowonthîrî marha wîwîrîmesî. Pahxa Asiriu komo kayaritomon wîwîrîmekn̂e ero wa xa marha Babiron̂a pono komo kayaritomon wîwîrîmes hara.

19 Ixaw Yana komo reha wekyasî ekenî ro komo pona hara. Kahmeru po tak n̂eseresmexe Basan po marha. Cerepore so tak naxe Eprain yîpîn po so, Xireace po marha.

20 Ero yimaw tak kicicme Ixaw Yana komo yehtopo n̂epor̂axe rma re anarî komo. Exihra ro makî tko nas okre. Xuta komo yehtopo marha n̂epor̂axe, kicicme ehtopo. Exihra marha nas okre. Kicicme ehtoponhîrî komo wîhcamnoyasî onkurunpetho komo yehtoponho ha. Ponarora ro mak tak wasî. Ero wara was amn̂e oyanan komo poko, kesî Kporin komo.

21 On wara marha kesî Noro, Ai, waapa komo, on wara wîîkes awya so, etocoko Meratain pono komo waihkaxi, Pekoce pono komo yar̂maxi marha. N̂examro pen weken̂emecoko, waihkatîkacoko. Omtapotaconho yaw roro rma n̂examro pen ciicoko watohnî me ro mak, wîîkekn̂e awya so ero wa kacho yaw roro ciicoko, kesî Kporin komo.

22 Waapa mtapotarî n̂esencesî yîrowon komo po, yuuu, kacho. Tooto pen waihkacho marha n̂esencesî.

23 Aama wara ka xatken̂e Babiron̂a pono komo. Roowo poko hakno komo yakuhr̂apon̂e wara xatken̂e. Oroto cetahkaxi tak nasî aama warainhîrî pen okwe, cecor̂or̂omaxi mak nas okwe. Ero pîntho me tak Babiron̂atho n̂een̂axe mîk hak rowon pono komo. Awemcinotopo komo wiire, kesî Kporin komo.

24 On wara maxe amyamro Babiron̂a pono komo, omîyen warai yaka memciyatken̂e. Awemcinotopo komo yenîhra rma mîxatken̂e. Awen̂atken̂e so tak awaparî komo. Awahsîyatken̂e. Ero wara awir̂atken̂e so Kporin komo yanwekrî ke kica awya so.

25 On wara xakn̂e Kporin komo, tukurun mîn nahrunkekn̂e. En̂exa tak n̂en̂emhatakekn̂e tuwuhre warai mer̂pora, tîrwon̂e tînar̂marî. Ero poko tak nasî, Kawtew pen komo yîwîrîmacho poko. Ero poko xa nasî Kporin komo, kantoman̂e ro komo.

26 Waapa komo, amohcoko roowo mapitawno komo meero. N̂examro yemyawno mîntho mko ahrunkacoko ero yawnonho yaatome tak. Yukpurukpuruntho enmexapu wara mak tak ciicoko n̂examro yewtontho. Iitono pen komo waihkatîkacoko, waipîn yîmtora ro mak ehcoko.

27 N̂examro yokutho pen marha waihkatîkacoko bui pen komo. Miya aacoko waihkatopo yaka. Okwe ro mak okwe, kapore nasî Babiron̂a pono pen komo poko. N̂examro pen waihkacho me tak n̂enmapu, n̂examro yîwîrîmacho me ha.

28 Babiron̂a poi emahcixapu komo cexe Siaw pona hara. On wara kexe iitono komo ya, N̂esepanîy ham okwe Kporin komo, ponaro kehtopo komo. Tîmînthîrî yîwîrîmachonho yanme n̂esepanîy ham okwe, kexe.

29 Taa, waiwî yar̂man̂e komo ahnoro an̂ihcoko Babiron̂a pono pen komo wotohme so. Awetarî komo ciicoko n̂examro yewton tmamritîkaxi ro. Emahcira ro mak n̂ehcowpe iitononhîrî komo. Kicicme n̂examro yehtoponho epanîko. Yîwîrîmano rin̂enho mîkyam kica. Ero ke ero wa xa marha n̂examro pen yîwîrîmacoko hara. Ixaw Yana komo Porin yopo tîmtapotaxmu komo ro mak mîkyam kica, kir̂wanî ro yopo tîmtapotaxmu ha.

30 Ero wara cexirî ke so iitono pen komo tak n̂epîrkexe ewto po rma. Kar̂pamxan pen komo rma n̂epîrkexe okwe. Twaihkaxi thakwa naxe ahnoro n̂examro sowtatun komo ero yimaw, kesî Kporin komo.

31 On wara marha wîîkes Owî, Aporin komo, kantoman̂e ro, ponaro awehtopo komo, Awaparî komo me tak was Ow hara. Ow xa kir̂wanî ro, kan̂e ro mak amyamro kica. Awaitopo komo me tak n̂enmapu, kwaikexe so tak okwe.

32 Cehcoyoponkaxmu me cesehtînosom ro mak mîkyam okwe, iitono yewton pono komo. Noro yipu komo tko n̂ehrokexe amn̂e, n̂epîrkexe marha oko cehcoyoponkaxmunhîrî pen komo. Anîmn̂e komo exihra ro mak tak nasî ero yimaw. Yaake nasî ewton komo. Ero po so rma tko wehto wiriyasî miyan komo yakn̂itopo rma oco.

33 On wara marha kesî Kporin komo, kantoman̂e ro, Ixaw Yana komo n̂emetanmekyaxe ahsîn̂enhîrî komo okwe. Xuta yepamtho komo marha n̂emetanmekyaxe. Ahsîpînkara ro mak naxe. Taa, n̂ex ha, etocoko hara, kahra ro mak naxe yîwya so okwe.

34 Karitî tko Mîkî, n̂examro town̂e. Kantoman̂e ro, kacho rma Mîkî. N̂examro yemetanmekn̂enho komo n̂en̂ekesî ro mak tak. Emetanmekîn me tak oyanan komo wiir̂asî yîrowon komo po. Cemetanmesom me tko wiir̂asî Babiron̂a pono kom hara okwe, kesî Kporin komo.

35 On wara marha kesî Noro, Kacipara imo ke cemyarkem komo men mokyaxe Babiron̂a pono komo waparî me okwe. Iitono komo yantoman̂e pen komo paraxkexe oko, akîhreno rin̂e pen komo marha.

36 Iito marha naxe tohnawno poko weronoman̂e komo. Camkî mak tak n̂ehtîkexe n̂examro. N̂examro pen marha paraxkexe tkaciparayem komo. N̂examro sowtatun komo n̂eraswaxe ro mak. N̂examro pen meero paraxkexe tkaciparayem komo.

37 Iitono pen komo yokutho marha paraxkexe kawaru pen. N̂examro tararantho marha nîwîrîmexe. Yîchew so marha naxe anarî yana komo, sowtatu komo chew. Wooxam wara ro mak n̂ehtîkexe n̂examro okwe. Iitono komo yemyawnonho marha naar̂axe tkaciparayem komo.

38 Tuuna tak mokuhra nas iito. Ero ke napaitîkesî tak tuuna yepu, aporî marha. Ponaro ehtopo me ciixapu yeken me mak nasî n̂examro rowon. Wara ro mak kan̂e me tak naxe tîn̂irithîrî komo poko.

39 Okno pîn komo mak tak nas iito, axawa imo pono ro komo. Kamara komo nas iito, pupuri komo marha. Tooto yeken me exihra ro mak tak nasî. Iina esekenmara tak naxe tooto komo, yîmxîkrî komo marha, epamuthîrî komo marha. Iitono me exihra ro mak tak naxe miya roro mak ehretawnomaxapu komo.

40 Pahxa Sotoma pono pen komo nakn̂iyakn̂e Kaan, Komoha pono pen komo marha. Ewtoci pono pen komo marha nakn̂iyakn̂e yîmîtwononhîrî pen komo. Ero wa xa marha nasî Babiron̂a amn̂e. Pohra ro mak tak nasî, tooto yeken me exihra ro mak nasî, kesî Kporin komo.

41 On wara marha kesî Noro, Mîkyam anarî yana komo kopi. Mehxa mokyaxe nohce n̂ixa, enko xe. Anarî rowon pono komo mîkyam, mer̂pono pîn kopi. Akro so mokyaxe kayaritomo komo mer̂pono pîn komo xa marha. Meyeno komo rma n̂ewakpamnoyaxe iina tîtotopo komo poko, anarî rowon pono komo rma. Ero wa mokyaxe.

42 Tukurui so mokyaxe krapa ke, rah ke marha. Kîpînîn yawno pînî ro mak mîkyam okwe. Moxam ciki okwe, kan̂e pîn me ro mak naxe. Kawaru mkaw so tmokyataw so cewtun̂em wara mak n̂esencexe, tuuna imo wara ro mak kopi. Cepanatoso rma mokyaxe etar̂maxi. Awaparî me men mokyaxe, Babiron̂a yemsîrî waparî me okwe.

43 Twaparî mohtopo n̂encekn̂e Babiron̂a kayaritomon. Ero ke kar̂pera tak nasî noro yamorî. Nahwokesî ro mak okwe. N̂erewasî marha wooxam wara cewrusom wara.

44 Babiron̂a pono pen komo weken̂emekyasî Ow ewtonthîrî komo poi. Yohno ro mak wen̂epesî. Reaw mokya anarimaw peen chei Xotaw yecihtawno chei. Woskara pona mokya yohno ro mak cuh ken̂arî pona, ero wa xa marha yohno kmokyasî Ow hara Babiron̂a pono komo cheka. Onoke xa wiir̂a n̂examro waparî komo yantoman̂e me? Onoke n̂esehtînoya owara rma? Onoke nîîke ha re owya, Ahce kacho ero wa miir̂a? nîîke? Onoke nai ha re oper̂a yosom warai oporokan̂e me?

45 Ero ke omtapotarî tak entacoko, Kawtew komo poko wîhtînoi on wara kacho, Ero wa men n̂examro pen wîwîrîmesî, kacho owya. Oper̂a xîkrî warai komo cik naar̂axe kr̂a waapa komo. Woskara pononho nakn̂iyasî cuupu pen, n̂examro naputho okwe.

46 Babiron̂a pono pen komo tak nahsîce okwe waapa, kacho n̂encexe roowo poko hakno komo. Ero ke tatanaxe tak kopi cerahtîmrî ke so. Miyan komo rma n̂examro pen waihtoponho n̂encexe mîk hak rowon pono komo. Ero wa n̂encexe.