Amon komo yîwîrîmacho poko marha nîmtapowakn̂e Kporin komo Xeremias yakro. On wara kekn̂e yîwya, Kîrkomo exihra ro mak katî nai Ixaw pen yepamtho? Exihra ro mak katî nai epamthîrî? Ahce kacho Mawkan nai Kace yepamtho komo kayaritomon me hara? Kace yepamtho komo yewtontho po tak naxe noro maywen kom okwe. Ahce kacho okwe?

2 Ero wara exirî ke on wara tak wiir̂as amn̂e, kesî Kporin komo. Haba pono komo ya tuu kacho wentamexpesî, Amon yewton pono komo ya ha. Waapa men mokyaxe, kacho mîn wentamexpesî yîwya so. Ero yinhîrî tak wermonho me mak nasî Habatho okwe, pohnî me mak nasî. Cecahso marha nasî Habatho mîtwononho mko ewtoci mko. Ero yimaw tak Amon komo rowon tak nahsîyaxe Ixaw Yana kom hara ceken komo me. Pahxa Amon komo n̂en̂epetho komo rma mîkyam n̂examro tak naxe Amon rowontho yahsîn̂e me hara, kesî Kporin komo.

3 Awratacoko amyamro Esbon pono komo. Cecahso tak nasî Aitho pen okwe. Wooxam komo, Haba pono komo amyamro, awratacoko. Kumixitho mak amrucoko aponon komo me. Waaca porero etaricoko kar̂pe. Okwe, okwe, tkaro etaricoko. Waapa narîrî me men nasî Mawkan pen ponarono kom okwe. Yîwya tîmsom yakn̂in̂e pen komo, antomano rin̂enho pen komo marha, ero warai komo cexe Mawkan pen yakro rma tapomiso cexe okwe.

4 Oyemsîrî rma amoro, opona enîhkan̂e ha tko okwe. Ahce kacho mahwowa aporî yecihtawno poko? Naatî yewtî mexanî rma re mîn aporî yecihtawno. Ahce kacho tko ero yipu poko mahwowa okwe? Awemyawno komo pona mak meen̂a ham okwe, cepethîkem pona. Onoke ma re mokya owaparî me? mîîketken̂e okwe.

5 Aweraspen̂e komo me tko wiir̂asî amîtwono komo rma, kesî Kporin komo, kantoman̂e ro, Kaan ha. Kar̂pe ro mak awen̂epexe so waapa komo. Miya so waimamxapu komo yenmekn̂e exihra thakwa nai ero yimaw.

6 Pahxaro tko Amon komo wekyas hara oona hara, waapa komo narîtho kom ha, kesî. Ero wara kesî Kporin komo Amon komo poko.

7 Eton pono komo yîwîrîmacho poko marha nîmtapowakn̂e Kporin komo Xeremias yakro. On wara kekn̂e yîwya, On wara wîîkes Ow Aporin komo, awantoman̂e komo, Takîhsom komo exihra tak ma nai okwe Teman po? Kakîhren̂e mera tak ma natu takîhsomunhîrî kom okwe? N̂ehcamnoi tak ma takîhso ehtoponhîrî komo okwe?

8 Emahcicoko amyamro Tetan pono komo, awesamathîrî komo yaw xa marha etocoko hara. Ewtarî yaw mak enmacoko yuhnakan yaw. Esau yepamtho komo marha wîwîrîmes okwe. N̂examro yemetanmetopo me exitaw tak n̂examro wemetanmekyasî.

9 Ahce wa nai uupa yeperîrî potun̂e komo awya so? Noro yipu komo mokyataw ahyaka so ahnoro ro mak potutîkara naxe. Nîmcexe ciki re asak mak. Kosope mokyataw cen̂epan̂em komo kîmîn yaka awemyawnonhîrî komo naar̂axe yiixe cehtopo komo yecenarî mak.

10 Esau yepamtho komo reha Ow waihketîkesî exihra ro mak cehso ro okwe. N̂examro yeseyamtopo mko weyamhokesî ceseyamtopo komo ken̂ehra ro mak tak ehtome so. Waihyaxe thakwa okwe yîmxîkîthîrî pen komo okwe, iyananhîrî pen komo marha, yîmîtwononhîrî pen komo, ahnoro mak okwe. N̂examro pen exihra ro mak tak naxe okwe.

11 Tînomcoko rma amxîkîthîrî pen komo. N̂examro wukurunpes Owî. Opona marha n̂encowpe ahcinhîrî komo.

12 On wara kes hara Kporin komo, On wara xatken̂e oyanan pen komo, On awokru ro komo, awîrîmacho kom ha. On men eecoko, kachomera ro makî ka xatken̂e n̂examro. Wara rma ero yipu rma thakwa n̂eer̂atken̂e okwe. Ero ke ahce wa matu amyamro hara Eton pono kom ha, yîwîrîman me ro mak exihra ro mak ma re matu amyamro reha? Awokru ro komo thakwa meer̂axe amyamro marha okwe.

13 Oyehtopo rma wetahcasî yaaro omtapotarî yentachome awya so, kesî Kporin komo, wermonho me tak nasî Bosoratho amn̂e. Kopi ro mak, kacho me mak nasî, tîwîrîyakaxmu me marha, yîwîrîmano ritopo me marha. Awewtonthîrî komo marha nasî wermonho me mak eroromero, kesî Kporin komo.

14 Kporin komo mtapotarî wentai. Tîmtapotarî yentamexpon̂e n̂en̂epekn̂e Noro mîk hak rowon pono komo yaka. On wara n̂entamexpekn̂e Kporin komo yîwya so. Esenmecoko tak iina re amyamro. Eton pono komo yakro etar̂maxi amohcoko, kacho n̂entamexpesî yîwya so.

15 Ai, Eton pono komo, asak makno me tak kiir̂axe so mîk hak rowon pono komo wero ro. Awîrîyakan̂e me so tak naxe tooto komo.

16 On wara mîxatken̂e ha ka, yukurumîkno me ro makî ka mîxatken̂e. Ow xa karitî, mîîketken̂e. Mesemîknoyaxe tko kar̂pe awehtopo komo poko. Ewtarî yaw so rma re nas amîn komo, toopu yaw so etîmtakaxapu yaw. Îh po nasî aweken komo. Kaw xa rma re miir̂atu amîn komo yaimo wara. En̂exa rma tko kar̂mexe so okwe.

17 Okwe ro mak, kacho me tak nasî Eton pono pen komo yewtontho. N̂eserepokexe ituxari tîtosom komo. Okwe ro mak, kexe yîwîrîmachonhîrî komo yeen̂ataw.

18 Pahxa Sotomatho wakn̂iyakn̂e, Komohatho marha, yîmîtwononhîrî komo meero rma wakn̂iyakn̂e ewtoci mko. Ero wa xa marha Eton rowontho wiir̂as hara. Pohnî me ro mak nasî. Tooto yewton mera ro mak tak nas amn̂e okwe.

19 Sowtatu komo wen̂epesî Eton pono komo waparî me. Reaw wara rma mokyaxe Xotaw yepu yecihtawnonho wara, eepu yukmetîketawno wara. Karitînhîrî pen komo mîn yixkan̂e me mokyaxe. Ero wa xa marha yohno ro mak Eton pono komo wen̂epesî Ow hara. Onoke ha na wen̂epe n̂examro pen waparî me? Onok ma re nai owarai xa? Onok ma re nîîke owya, Ahce kacho ero wara miirî hara ke? nîîke? Ahto ma re nai oper̂a yenîn̂e okurunkan̂e? Exihra ro thakwa mak nasî.

20 Ero ke entacoko Kaanî mtapotarî. Eton pono komo yîwîrîmacho nîhtînoi, Teman pono pen komo waihkacho marha. Ero ke ero ka entacoko. Oper̂a xîkîtho warai komo n̂ihxikyaxe miya ro mak tak okwe. N̂examro yewtontho nakn̂itîkapesî waapa ya okwe.

21 N̂examro pen yepîrkachonho n̂encexe miyan komo rma roowo poko hakno komo. Ero wa entache tatanaxe ro mak. Kwaihyas okwe, kacho n̂encexe miya rono komo, Cucurem Yewku kwaka rorono kom ha.

22 N̂examro mokyaxe yaimo wara kaikokorono wara okwe. Bosora yepoi tak naporarakanwasî. Ero yimaw nahwokexe ro mak Eton pono sowtatun pen komo. Wooxam wara ro mak naxe okwe cewrusom wara. Ero wara naxe Eton pono pen komo amn̂e okwe, kesî Kporin komo.

23 Ero yinhîrî Tamasku pono komo yîwîrîmacho poko nîmtapowakn̂e hara Kporin komo Xeremias yakro. On wara kekn̂e yîwya, Amace pono komo nîhyapamyaxe, Ahpace pono komo marha. Nahwokexe okwe, n̂eserepokexe. Tuuna imo wara naxe cesewcokocokomaxmu wara eserepotanmekîn me okwe.

24 Kar̂pera tak n̂ehtîkace Tamasku pono komo. Miya n̂emahciyaxe okwe. Tatanaxe ro mak cerahtîmrî ke so. Okwe, okwe, kexe ro mak. N̂erewaxe marha iitono pen komo wooxam wara cewrusom wara.

25 Cekaiporesom me ka xakn̂e Tamasku. Tahwotaxmu me ka xatken̂e iitono komo. Ahce poyero pohnî me tak nai hara okwe?

26 Iitono pen komo n̂epîrkexe kar̂pamxan pen komo rma. Ewto po rma n̂epîrkexe esama yaw so. Ero kaamo po rma tak ahnoro sowtatu komo tak waihyaxe iitono pen komo, kesî Kporin komo, kantoman̂e ro.

27 Wehto wiriyasî Tamasku wacantho yakn̂itopo. Kayaritomo mîntho mko marha wakn̂iyasî, Ben-Atace pen mîntho ha, kesî. Ero wa kesî Kporin komo Tamasku yîwîrîmacho poko.

28 Ero yinhîrî nîmtapowakn̂e xa hara Kporin komo Keta pono komo poko, Aso pono komo maywen komo poko marha. N̂examro pen yar̂maxi marha cesî Nabukotonoso, Babiron̂a pono komo kayaritomon. On wara kekn̂e Kporin komo Xeremias ya, Taa, etocoko tak Keta pono komo yar̂maxi. Resce n̂ixan komo ahnoro ar̂matatko.

29 Yîmînthîrî komo naar̂axe waapa komo, iyokuthîrî komo marha oper̂a komo. Yîmînthîrî yewkanapan yahrutho komo marha naar̂axe. Ahnoro emyawnonhîrî komo naar̂axe, iyokuthîrî komo marha, kameru komo. Mehxarpa mak n̂esencesî tooto mtapotarî, Kwamcexe ro mak kwaparî komo kopi, kexe kar̂pe ro mak.

30 On wara wîîkes awya so Aso pono komo, kesî Kporin komo, emahcicoko yohno. Ewtarî yaw so mak enmacoko yuhnawno yaw. Awaikacho komo tak men nîhtînoyasî Nabukotonoso. Awar̂macho komo poko n̂esencekn̂e ero poko ehn̂ara cehtome.

31 Etoko rma n̂examro pen yar̂maxi, kesî Kporin komo yîwya. Eserepokan komo mak mîkyam, erasîn me ro mak naxe. Wacamra ro mak nasî n̂examro yewton, metata exihra marha nasî, metata yecetî marha exihra nasî. Cewyarono komo mak mîkyam.

32 Iyokuthîrî komo tak naar̂axe waapa komo, kameru pen komo. Mer̂pora ro mak nasî n̂examro yoku paaka. N̂examro pen marha naar̂axe. Miya so ro mak n̂examro pen wakpayasî. Mehxarpa wekyasî n̂examro pen yîwîrîman̂e komo, kesî Kporin komo.

33 Kamara yeken me tak nas amn̂e Asotho. Pohnî me mak nasî eroromero. Iina esekenmara ro mak nasî tooto, kesî Kporin komo. Ero wara kesî n̂examro poko.

34 Ero yinhîrî nîmtapowakn̂e xa hara porin komo Xeremias yakro, weronomano rin̂e yakro. Eraw yîwîrîmacho poko kekn̂e hara yîwya. Ciixan me rma ka exitaw Setekias kayaritomo me ero poko nîmtapowakn̂e.

35 On wara kekn̂e Kporin komo yîwya, On wara men wîîkes Ow Aporin komo, kantoman̂e ro, Eraw pono komo krapan waxikwesî kr̂a, karitînhîrî pen komo waihkesî.

36 4 ocowo mko wekyasî Eraw pono pen komo yaan̂e me. Nohce n̂ixan wekyasî, suu n̂ixan, resce n̂ixan, oesce n̂ixan, en̂exanî mko wekyasî ocowo. Iitono pen komo wakpayasî nohce yaw roro, suu yaw roro, resce yaw roro, oesce yaw roro. Mîk hak rowon pono komo cheka cexe Eraw pononho pen komo, Noro rowon pono komo chew exihra nasî Eraw pononhopen komo, kacho exihra ro mak tak nas amn̂e.

37 Eraw pono pen komo wiir̂asî cerahsom me yiixatî pîn komo mokyataw, waihka xatî komo mokyataw. Eraw pono pen komo yîwîrîmacho wekmexpesî poko so. Orwonîmrî ke ero wara wiir̂asî, kesî Kporin komo. N̂examro wenari wen̂epesî kacipara imo ke cemyarkem komo. Eraw pononho pen komo wenatîkexe twaihkatîkaxi ro okwe.

38 Oyaponî rma wiir̂asî Eraw pona, kayaritomo me oyesenpotopo ha. N̂examro kayaritomon pen waihkesî, antomano rin̂e pen komo marha, kesî Kporin komo.

39 Eromanhîrî yimaw tko Eraw pononho komo wekyas hara, waapa narîtho kom ha, kesî. Ero wa kesî Kporin komo Eraw pono komo poko.