Ero yinhîrî Moabe komo yîwîrîmacho poko nîmtapowakn̂e hara Kporin komo. On wara kekn̂e, On wara wîîkesî Ow Aporin komo, awantoman̂e komo, ponaro Ixaw Yana komo yehtopo ha, Okwe ro mak okwe wîîkesî N̂ebo poko. Tîwîrîmaxi tak nas okwe. Cehn̂axmu me tak n̂esenpesî Kiriatain pono komo. N̂examro pen nahsîce waapa komo okwe. Miskabe pono komo nahsîce okwe. Cehn̂axmu me marha tak n̂esenpetken̂e iitononhîrî komo sowtatu pen komo, nahwoketken̂e marha.

2 Kir̂wan̂he nat ham okre Moabe komo, kahra tak naxe anarî rowon pono komo. Esbon po cexitaw so waapa komo Moabe pen komo waihkacho poko n̂esencetken̂e. On wara ketken̂e, Amohcoko Moabe komo yar̂matîkaxi, Moabe komo exihra tak ehtome, ketken̂e. Macmen pono komo amyamro meero tak maxe tîtîtmamso. Awece so men mokyaxe kacipara imo ke cemyarkem komo.

3 Entacoko ka, Oronain pono komo nîwracexe okwe. Tîwîrîmacho komo yanme nîwracexe, tîmîn komo yakn̂itopo yanme ha.

4 Cecahtîkaxi takî nasî Moabe komo yewtontho ahnoro. N̂examro pen xîkîtho komo yîwratarî n̂esences okwe.

5 Ruici yîpîn nawnukyaxe tîwrataro mak okwe. Oronain yîpîn n̂enîhcexe hara. Kwaihyas okwe, kwaihyas okwe, tkaro n̂enîhcexe.

6 N̂examro men waapa komo, emahcicoko men okwe. Tamakeira wara tak ehcoko axawa imo pono wara.

7 An̂irithîrî komo pona mak meen̂axe okwe, awemyawno komo pona marha, cepethîkem pona. Ero ke amyamro meero awahsîyaxe so waapa. Kemos marha naar̂axe mokuhnî me hara. Noro ya tîmsom pokono komo marha naar̂axe, antomano rin̂e komo marha.

8 Ahnoro awewtonthîrî pono komo nar̂mexe waapa komo. Cewn̂e n̂hema watohra naxe awewtonthîrî komo. Tîwîrîmaxi marha nasî aporî yecihtawno komo. Ero wara xa marha nasî woskara pono kom hara. Kporin komo thakwa nîmtapowakn̂e noro yipu komo yîwîrîmacho poko.

9 Yaimo yaporî warai tîmcoko Moabe komo ya emahcitome so, waapa yai emahcitome so. Yarîhra ro mak tak nasî n̂examro yewtontho mko okwe.

10 Tîwîrîmaxmu me men nasî wara mak Kporin komo yemyawno ciin̂e. Tîwîrîmaxmu me nasî tîkaciparan ke kamxuku yen̂epen̂e pîn.

11 Tîtken̂e mak xakn̂e Moabe tîmrenai ro rma. Wooku wara naxe n̂examro pahkî tînomxapu wara, tmakumkem wara. Arkan wara xatken̂e enhîrî yai anarî yaka. Waapa nahsîtho pîn me ka xatken̂e. Ero ke cîmîkno wara rma naxe kica, tpoxwe exihra rma nasî n̂examro kotorî.

12 On wara marha kesî Kporin komo, Pahxaro tak wooku pokono komo wen̂epesî Moabe komo cheka. N̂examro pen yukmamn̂e wara naxe. N̂examro wokru nukmamtîkexe, patiri warai mko nahkexe okwe.

13 Ero yimaw Kemos pona tak nîhyapamyaxe Moabe komo, ponaro cehtoponhîrî komo pona. Pahxa Betew pona n̂een̂atken̂e Ixaw Yana komo. Ero yinhîrî ero pona tak nîhyapamyatken̂e hara, ero wa xa marha Kemos pona nîhyapamyaxe Moabe komo amn̂e.

14 Ahce wa ma re mîîketu, Karitî komo kîwyam, sowtatu me cehsom kom ha, mîîketu ha re?

15 Moabe pen komo yewton tak nasî wemronho me mak okwe. Cewtonthîrî komo poi cetîketken̂e Moabe komo. Kîrkomo cetken̂e twaihkacho komo yaka okwe, kar̂pamxan pen komo rma kîîrî yenpotho kom okwe, kesî. Ero wara kesî Kayaritomo, Kporin komo, kantoman̂e ro, kacho ha.

16 Pahnoke tak nasî Moabe pen komo waihkacho. Yohno rma yîwîrîman̂e komo mokyaxe.

17 N̂examro pen pînîn yaw awratacoko amyamro yîmîtwononhîrî komo. Moabe komo mîkyam okre, kan̂enhîrî komo marha awratacoko. On wara kacoko, Okwe, okwe, okwe, amoyi wara ro mak xatken̂e Moabe komo, cewaxkem wara, enpor̂ixapu wara. Ahce kacho etaxikwoxapu wara tak naxe hara okwe.

18 On wara kesî Kporin komo Cibon yemsîrî ya, Aapo po ceremaxmu wara maxe îh pono po. En̂exa ahtocoko cenporem me xa awesenpotoponhîrî poi. Roowo pona tak eremacoko turpem pona. Awokru komo exihra ro mak nasî iito. Moabe komo yîwîrîman̂e komo cexe awaparî komo me marha. Awewtonthîrî komo nîwîrîmexe ro mak, sowtatu ke tukuruyem komo rma okwe.

19 Aroe pono komo, awya so wîîkes hara, esama yakumyaw ececetocoko. Cemahcisom komo encoko iito. On wara kacoko kîrkomo ya, waapa yai emahcixapu komo ya, wooxam komo ya marha kacoko. Ahce wa mehcow hara kopi? kacoko yîwya so.

20 Cehn̂axmu me tak n̂esenpexe Moabe komo anarî yana komo ya. Cecor̂or̂omaxi mak naxe oko. Awratacoko, okwe okwe, kacoko. On wara kacoko Ahnon yecihtawno komo ya, Tar̂matîkaxi tak naxe Moabe pen komo okwe, kacoko.

21-24 Kporin komo tak n̂esepanîyasî, woskara pono komo nîwîrîmesî. Mîn hak pono komo rma nîwîrîmes oko, Oron pono komo, Xasa pono komo, Mepaace pono komo, Cibon pono komo, N̂ebo pono komo, Bece-Tibratain pono komo, Kiriatain pono komo, Bece-Kamuru pono komo, Bece-Meon pono komo, Kerioce pono komo, Bosora pono komo, ero warai pono komo Noro nîwîrîmesî. Meyeno komo rma Kporin komo nîwîrîmesî Moabe yewton kom ha, meyeno pîn komo marha.

25 Kar̂pe Moabe komo yehtoponho tak n̂ehcamnoi okwe. Etapoxwoxapu wara mak naxe okwe, kesî Kporin komo.

26 N̂examro kr̂a wenmecoko Kporin komo yanwekrî poyero yîwya so. N̂ehmamexe n̂examro pen twenarîthîrî komo pore rma. N̂examro poko n̂etaporexe kr̂a anarî yana komo.

27 Pahxa Ixaw Yana komo poko metaporetken̂e amyamro. Ahce poyero Ixaw Yana komo poko amtapowataw so mepanametken̂e kica aweserepokarî komo ke? Cen̂epan̂em komo chewno me katî n̂examro meen̂atken̂e awya so?

28 Awewtonthîrî komo ahsîpînkacoko amyamro Moabe komo. Toopu chew mak tak enmacoko hara. Potkuku wara mak ehcoko, ewtarî potaka cetmînmaxmu wara.

29 Anarî komo yopono ro mak amna, kan̂e komo mîkyam Moabe komo, kacho amna n̂encekn̂e. Ow xa ha n̂e ro kir̂wan. Pîra n̂he maxe amyamro reha, kan̂e komo mîkyam kica. Miyan komo yopono me rma n̂esehtînoyaxe n̂examro kica.

30 Kanwekn̂e ro me n̂examro yehtopo ween̂asî, kesî Kporin komo. Tohnaw makî tko anwekno n̂iir̂axe. Akîhreno cirihra rma nasî yîmtapotarî komo tohnawno me exirî ke kica.

31 Ero ke kîwracesî Moabe komo pînîn yaw okwe. Ahnoro n̂examro pen pînîn yaw, okwe okwe, wîîkesî. Kiri-Eres pononho pen komo pînîn yaw kîwracesî, kîrkomo pen pînîn yaw.

32 Uupa yatî ke tînatkem me xa mîxatken̂e amyamro Sibma pono pen komo. Ero pînîn yaw kîwracesî. Xase pono komo nîwracetken̂e ero wa xa marha kîwracesî apînîn yaw so. Aperemru komo tak por̂mamyasî miya ro mak n̂ikitho yecihtaka roro. Xase n̂ikithon yecihtaka rma cesî. Waapa komo tko naatîketken̂e anatîthîrî komo yeperîrî, uupa yeperîrî meero okwe.

33 Pahxa tahwore xatken̂e Moabe komo tînatîrî komo chew cexirî ke so, ceperkem chew cexirî ke so. Oroto tak tahwore awehtoponhîrî komo tak nasî cehcamnoso okwe, tawake awehtoponhîrî komo marha. Wooku tak epatakara nasî uupa yeperîrî yewkukacho yai. Owî rma wîtîtmamnoi. Uupa yeperîrî yewkukara tak naxe, Okre okre, tkaro ewkukara tak okwe. Tahwokarî komo yanme emtarakara ro mak tak naxe okwe.

34 Esbon pono komo nîwracexe. Yîwratarî komo n̂encexe meyeno komo, Ereare pono komo, Xaas pono komo marha. Soa pono komo marha nîwracexe. Yîwratarî komo n̂encexe meyeno kom hara, Oronain pono komo, Ekrace-Serisia pono komo marha. Napaitîkai tuuna yepu N̂imrin̂i pore tîhtosom meero okwe.

35 On wara marha kesî Kporin komo, On wara naxe Moabe komo, îh po so ponaro cehtopo komo ya tîmsom nakn̂iyaxe. Noro yipu komo tawakeretopo me marha kotoporem nakn̂iyaxe kica. Ero yipu yakn̂in̂e komo wîtîtmamnoyas okwe, kesî Kporin komo.

36 Okwe okwe, kesî oropotarî Moabe komo pînîn yaw. Raatî wara rma. Okwe okwe, kesî marha oropotarî raatî wara Kiri-Eres pono komo pînîn yaw. Cemyawnoi xa xatken̂e okre n̂examro. Oroto emyawnonhîrî komo exihra ro mak tak nas okwe.

37 Kanahmuri yaw so naxe ahnoro okwe. Cesetpokaxi marha naxe ahnoro kîrkomo. Cecaikaxi nasî n̂examro yamorî ahnoro. Kumixitho mak namruyaxe ahnoro iitono komo tponon komo me.

38 Tîwrataxmu komo mak naxe Moabe mîn meretwo so okwe. Ewto roron po so marha naxe noro yipu komo re mak okwe. Moabe komo wahkekn̂e, tahremtho mahkexe pohnîtho ero wara, kesî Kporin komo.

39 Cecor̂or̂omaxi mak naxe okwe. Cerewre ro mak nîwracexe. Tîmkai mak n̂etaknamexe tîhyapamrî ke so okwe. Tîmîtwono komo yetaporetopo me mak tak naxe okwe. Okwe ro mak, kacho me mak naxe n̂examro ya.

40 On wara kes hara Kporin komo, Mîkro nîhcesî kar̂pe yaimo wara. Moabe komo yepoi naporarakanwasî kopi.

41 N̂examro yewtontho mko nahsîyaxe waapa komo, sowtatu wacantho komo marha nahsîyaxe. Ero yimaw nahwokexe ro mak Moabe sowtatun komo. Wooxam nahwokesî cewruyataw ero wara naxe sowtatu komo rma okwe.

42 Moabe pen komo exihra ro mak tak naxe ero yimaw. Ero wara naxe Moabe komo Kporin komo yanwekrî poyero okwe.

43 Ai Moabe komo, on wara kesî Kporin komo awya so, amomokn̂e wara nasî eraspetono komo. Ewtarî marha amomokyaxe so, ero yaka awepîrkacho komo, mîîye marha nas iito awecimnotopo komo. Ero yipu mak nas amomokn̂e komo wara, kesî Kporin komo.

44 Eraspetono yai cemahcisom tak n̂epîrkesî ewtarî yaka hara okwe. Ewtarî yai epatakaxapu komo tak n̂emciyasî mîîye yaka hara okwe. Ero cimn̂ipu tak nasî Kporin komo yesepantopo me Moabe komo poko. Ero ke ero po yîwîrîmacho komo n̂ekmexpesî.

45 Esbon wacan yawarpanaw rma n̂ecececexe waapa yai emahcixapu komo kar̂pera okwe. En̂exa rma tko n̂epatakesî wehto oco Esbon poi rma. Seon poi marha cesî wehto. Ero tak Moabe komo perî nakn̂iyasî. Cehcoyoponkaxmunhîrî pen komo tîpîrî nakn̂iyas oco.

46 Okwe ro mak wîîkesî Moabe komo pînîn yaw. Kemos ponarono pen komo waihyaxe okwe. Miya ro mak amumuru komo naar̂axe waapa komo mokuhnî me hara. Ero wa xa marha awemsîrî komo naar̂axe hara mokuhnî me.

47 Pahxaro tko Moabe komo wekyas hara waapa narîtho komo. Eromanhîrî kaamo pahnoke n̂he exitaw wekyasî, kesî Kporin komo. Ero wa xa nasî Moabe komo poko Kporin komo yesepantopo.