Ero yinhîrî Kporin komo mtapotarî n̂encekn̂e xa hara Xeremias, weronomano rin̂e. Piristew komo pokono tak mîn n̂encekn̂e. Kasa pono komo waparî me tohra ka exitaw Paraw ero yimaw n̂encekn̂e.

2 On wara kekn̂e Kporin komo yîwya, On wara wîîkes awya, Aporin komo Ow, Yukmacho warai men encoko, nohce n̂ixa mokyasî yukmacho warai. Arowon komo yukmanîren̂e wara naxe, ero pono komo yenorinokan̂e wara marha okwe. Awewtonthîrî komo yukmanîren̂e wara naxe, ero pono pen komo marha. Okwe okwe, kexe tak iitono komo kîrkomo. Ahnoro iitono komo nîwracexe.

3 Noro yoku mokrî n̂encexe kawaru mokrî, karitî komo mokrî. Kar̂pe nîyorwasî yîhtarî kar̂pe mokrî ke so. Noro tararan mokrî marha n̂esencesî kar̂pe. Nîyorwasî yîhtarî mko mokyataw. Ero yimaw tîmxîkrî komo yukurunpetopo ponarora tak naxe yîîm komo okwe. Taporore mak n̂ecececexe yîîm komo okwe.

4 N̂enmayasî tak amn̂e Piristew pen komo waihkacho me, ahnorono komo waihkatîkacho me okwe. Yîmtora ro mak tak nasî Ciru pono komo yakronoman̂e komo, Siton yakronoman̂e kom ha. Piristew komo waihkesî tak Kporin komo. Kahtoro pononho pen komo mîkyam waihkesî, ciwya pononho pen kom okwe.

5 Ero yimaw tak n̂ekanamurinkexe Kasa pono komo ahnoro. Nîtîtmamyaxe mak Askaron pono komo. Amyamro woskara pono komo yakwenho hara, atî wicakî pahkî mecaiket ha?

6 On wara wîîkes awya Kporin komo kaciparan amoro, atî wicakî pahkî tîî kahra rma mai okwe? Awen yaka tak esenkak hara. Epokareko, tîtken̂e mak esko.

7 Ahce wa thakwa ma re nîtîtmamya? Askaron pono komo waihkacho poko nantomekn̂e thakwa okwe Kporin komo, tuuna imo yecihtawno komo waihkacho poko marha. Iitono komo waihkacho poko thakwa nantomekn̂e. Ero wa nasî Kporin komo kaciparan, kekn̂e Kporin komo Xeremias ya.