Taa, ero yinhîrî tak Kporin komo mtapotarî n̂encekn̂e xa hara Xeremias, weronomano rin̂e. Mîk hak rowon pono komo yîwîrîmacho n̂encekn̂e.

2 Exitu Yana komo yîwîrîmacho poko kekn̂e Kporin komo. 4 cimn̂ipu xakn̂e kayaritomo me Xeoiakin yehtoponho, Xosias pen mumutho yehtoponho. Ero yimaw on wara xakn̂e Paraw-N̂eku, Exitu pono komo kayaritomon, noro xakn̂e Kakemis po tîsowtatun komo yakro. Ewpratesî yecihtawno mîn Kakemis. Iito tak noro sowtatun komo n̂etar̂metken̂e Nabukotonoso sowtatun komo yakro. Paraw sowtatun komo yopono me tî xatken̂e Nabukotonoso sowtatun komo, Babiron̂a kayaritomon sowtatun komo.

3 Ero yimaw on wara kekn̂e Kporin komo, awecen̂an komo ahsîcoko, porin komo, wahrai komo marha. Etar̂maxi tak etocoko ha.

4 Kawaru mtayetkacho ciicoko yîmtaka so. Kawaru mkaw tîtosom komo, awya so wîîkesî, etakricoko tak awoh komo mkahsî. Epanatacoko, axapikan komo amrucoko. Arahnu komo yusmunkacoko, aponon komo amrucoko kuripara warai.

5 Cerahsom wara ween̂axe so kopi. Ahce kacho hara? Yaw xa marha mak mokyaxe hara okwe. Tîyopono me twaparî komo n̂een̂axe sowtatu komo okwe. N̂emahciyaxe mak okwe. Tîmkai so enîhra ro makî tko naxe cemahciyataw so. Ahnoro mak n̂eraswaxe, kesî Kporin komo.

6 Emahcira rma tko naxe kar̂pe tîtosom komo rma. Emahcira thakwa naxe okwe karitî komo. Nohce yaw roro tîtoche so n̂ehrokexe tak, n̂epîrkexe okwe. Ewpratesî yecihtaw ero wa naxe.

7 Onoke mîkyam roowo yukmanîren̂e warai komo, N̂iiru yepu warai kom ha? Roowo yukmanîren̂e wara ro mak naxe kopi tuuna yepu wara ro mak.

8 Exitu pono komo mîkyam. N̂examro mokyaxe mer̂pono pîn, N̂iiru yepu wara naxe yukmetawno wara. Roowo yukmanîren̂e wara ro mak naxe kopi. On wara kesî n̂examro kayaritomon, Miya so ro mak kîwcesî. Roowo poko hakno komo chere kîwcesî. Tooto komo yewtontho kr̂a wakn̂iyasî. Yiipononhîrî pen komo waihketîkesî, kesî.

9 Kar̂pe amohcoko kawaru komo. Kar̂pe amohcoko amyamro tarara yaan̂e komo marha. Ahtarî komo po amohcoko amyamro sowtatu komo. Ero wa amohcoko amyamro Eciopia pono komo, Ribya pono komo. Awecen̂an komo pokono ro komo amyamro. Rica pono komo, amyamro marha etocoko, krapa yesîn̂e ro komo amyamro hara.

10 Kporin komo kamon me n̂enmayasî, kantoman̂e ro kamon me ha. Noro yesepantopo me n̂enmayasî, yiixatî pîn komo poko esepantopo me ha. Tooto pen pun non̂esî kacipara imo. Tooto kamxuku yeen̂e wara nasî tmaxmitaxi ro. Ero ke marha wenîmxapu wara nasî. Waihkano n̂iir̂asî Kporin komo ero po ha, tîwya tîmsom warai me rma ero wara n̂iir̂asî. Ero wa waihkano n̂iir̂asî nohce n̂ixan po roowo po, Ewpratesî yecihtawno po ha.

11 Ai, Exitu yemsîrî amoro, emasî me cehsom ha. Xireace pona etocoko. Iitono ke ehci ke tak esehcemacoko. Tohnaw rma tko mesehcemexe. Ecpîra rma nasî aweper̂an kom okwe.

12 Cehn̂axmu me awehtopo komo tak n̂encexe mîk hak rowon pono komo. Awratarî komo n̂encexe roowo poko hakno komo. Etpona so rma n̂ehrokexe asowtatun komo. Asakno roro rma tak n̂epîrkexe okwe, yîhrokan̂enhîrî, ehrokaxapu marha, kesî Kporin komo Exitu pono komo ya.

13 Ero yinhîrî nîmtapowakn̂e xa hara Kporin komo Xeremias yakro, weronomao rin̂e yakro. Nabukotonoso mohtopo n̂ekatîmyakn̂e yîwya, Babiron̂a kayaritomon mohtopo Exitu pono komo waparî me. On wara kekn̂e yîwya,

14 Ai Xeremias, omtapotarî wekatîmyasî xa hara awya. Ero tak entamexpoko Exitu pono komo ya, Mikitoro pono komo ya xa entamexpoko, Nope pono komo ya, Tapn̂es pono komo ya, ero pono komo ya entamexpoko. On wara kasko yîwya so, Ai, Exitu pono komo, epanatacoko, akurun komo ahsîcoko. Amîtwono komo tonon̂e wara ro mak naxe kacipara imo ke tukuruyem komo kopi.

15 Ahce wa exirî ke so asowtatun pen komo nar̂mekn̂e waapa komo? Waapa yopo exihra thakwa n̂ehce okwe. Kporin komo rma asowtatun pen komo nar̂mekn̂e.

16 Mer̂pono pîn nîhrokai Noro. Etpo so rma n̂ehrokexe cepîrkaxi ro. Ero yimaw tak on wara kexe, Awomcoko hara, kaikatko kyanan komo yaka hara, kekenî ro komo pona so hara. Miya kaikatko kacipara imo yai ro mak, waapa yai ha, kexe.

17 Iito rma cexitaw so on wara kexe, On wara mak nasî Paraw Exitu pono kayaritomon, Panapickano rîn̂e me kyam mak nasî tohnaw. Iyopono komo me noro yehtoponho tak n̂enahce, kexe.

18 Kporin komo, Kantoman̂e ro, kacho Mîkî Noro yosotî. On wara kesî Noro, Yaaro xa wasî waipînî ro me, ero wa xa marha yaaro wîîkes on wara, mokyas amn̂e kayaritomo îîpî warai ro mak. Yaaro, Tabo nasî anarî îîpî mko chew, Kahmeru wara marha nasî tuuna imo yecihtaw. Ero wa xa marha yaaro wîîkesî kayaritomo mohtopo poko hara.

19 Ai, emasî warai amyamro Exitu pono komo, on wara men ehcoko, awemyawno komo enkacoko kumixi yaka awtotome so waapa narîrî me, tapomiso so awtotome so. Nope pono pen nakn̂iyaxe okwe mîîmo pen. Wermonho me mak tak nasî, pohnî me ro mak okwe.

20 Paaka wara nasî Exitu rowon, cenporem wara. Waapa tko mokyasî noro wece kopi, nohce n̂ixa mokyasî.

21 Naxe marha re sowtatu komo Exitu pono komo cheka mohxapu komo, epethîrî pona cetar̂maxmu komo. Bui komo wara naxe n̂examro hara, tupurukyem wara. N̂examro meero n̂emahciyaxe, iito re n̂emahciyaxe. Twaparî komo yopono me exihra ro mak naxe. N̂examro yîwîrîmacho me meero n̂enmayasî ero yimaw, poko so epantopo me ha.

22-23 On wara kexe Exitu sowtatun komo twaparî komo mokyataw, sss, kexe okoyi wara, cemahcisom wara. Yawaka ke cemyarke mokyaxe n̂examro waparî komo wehto yîrakan̂e wara. Exitu pono namexe comotanhîrî, iito re cehsomu rma namexe weewe pen. Mer̂pora rma re naxe Exitu pono komo, makaka warai komo wara mak naxe, yukuknomarî yopo ro mak.

24 On wara nasî Exitu yemsîrî, cehn̂axmu me mak nasî nohce n̂ixa mohxapu komo mokuche. N̂examro ya Exitu pono pen komo nar̂mapesî Kaan.

25 On wara kesî Kporin komo, kantoman̂e ro, ponaro Ixaw Yana komo yehtopo, Amon yîwîrîman̂e komo wekmexpesî, ponaro Noo pono komo yehtopo yîwîrîman̂e. Yohno rma wekmexpesî. Paraw yepantopo marha wekmexpesî, ahnoro Exitu pono komo yîwîrîmacho, ponaro n̂examro yehtoponho komo yîwîrîmacho marha, n̂examro kayaritomon komo yîwîrîmacho marha, Paraw pona enîn̂e komo yîwîrîmacho marha, ero warai komo yîwîrîmacho wekmexpes amn̂e.

26 N̂examro pen war̂mapesî waihka xatî komo ya, Nabukotonoso ya, noro maywen komo ya marha. Pahxaro tko tooto yeken me nasî xa hara Exitu, pahxa xakn̂e ero wara xa marha hara, kesî Kporin komo.

27 Taa, Ixaw Yana komo ya wîîkesî xa hara, erasîra tak ehcoko amyamro Xako yepamtho komo, ahwokara ehcoko amyamro Ixaw Yana komo. Mooxe awexitaw so rma kukurunpexe so. Awepamthîrî komo wekyas hara oona, ahsîxapu me ehxapunhîrî komo. Cerepore tak naxe Xako yepamtho komo ero yimaw, waapa ponarora ro mak. Eraspen̂e exihra ro mak tak nasî.

28 Erasîra ehcoko amyamro Xako yepamtho komo. Oyanton komo xa amyamro. Awakro so rma wasî, kesî Kporin komo. Mîk hak rowon pono komo cheka rma ken̂epetken̂e so. Amn̂e tak n̂examro pen waihketîkesî, yîchew so awehtoponhîrî pen komo. Wara rma awaikatîkara so wasî amyamro reha. Kpanarexe so rma tko takîhso mak. Panaren me ro mak n̂ehcowpe, kahra rma wasî apoko so, kesî. Ero wa kesî Kporin komo apoko so.