Taa, pahxa n̂he Baruke yakro nîmtapowakn̂e Xeremias, N̂erias mumuru yakro. 4 cimn̂ipu xakn̂e kayaritomo me Xeoiakin yehtoponho, Xosias pen mumutho yehtoponho. Ero yimaw Xeremias mtapotarî mewrekn̂e Baruke karita yaka, ero yimaw rma noro yakro nîmtapowakn̂e Xeremias, weronomano rin̂e.

2-3 On wara kekn̂e yîwya, Ai, Baruke, on wara kesî Kporin komo awya, ponaro Ixaw Yana komo yehtopo, On wara mîîkekn̂e, Okwe, okwe. Ahwora rma ka wîxakn̂e. Ero yinhîrî oyahwokacho xa hara n̂ekmexpekn̂e Kporin komo. Kekar̂ken̂e mak, Okwe, okwe, karî ro ya thakwa owya. Oyepokaretopo exihra ro thakwa mak nas okwe, mîîkekn̂e.

4 On wara kasko yîwya, On wara kesî Kporin komo, On̂iritho tak wixkes hara okwe. Onatîrî warai wiir̂akn̂e ero rma tko Ow mohkes hara, ahnoro ro mak on roowo pononho pen komo mohketîkesî.

5 Anarî komo yopono me awexi xe na mai? Ero wara awexi xera tak esko. Ahnoro roowo pono komo yîwîrîmacho men wekmexpes amn̂e, kesî Kporin komo. Wara rma waipîra rma kiir̂asî amoro reha awepethîrî warai me. Ero wara kiir̂asî ahna na awcetaw, kesî. Ero wara kesî Kporin komo awya, kasko Baruke ya, kekn̂e. Ero wara kekn̂e Kporin komo Xeremias ya.