Ero yinhîrî Kporin komo mtapotarî n̂encekn̂e xa hara Xeremias. Xutew komo pokono mîn n̂encekn̂e, Exitu pono komo pokono marha. Mikitoro po xatken̂e Xutew komo, Tapn̂es po, Menpis po, Patros po, ero po so xatken̂e Xutew komo. N̂examro pokono mîn n̂encekn̂e Xeremias.

2 On wara kekn̂e yîwya, On wara kesî Kporin komo, ponaro Ixaw Yana komo yehtopo, Xerusaren pononho pen komo yîwîrîmacho meen̂atken̂e, ahnoro Xuta komo yewton yîwîrîmacho meen̂atken̂e. On̂ekmexpotho rma mîn xakn̂e yîwîrîmacho komo okwe. Cecahso mak nasî ewtotho mko okwe, pohnî me ro thakwa mak nas okwe. Aweroro so rma ero wa nasî.

3 Kicicme ro mak xatken̂e iitononhîrî komo okwe. Ero poyero kîrwonakn̂e poko so. Kotoporem yakn̂iso cetken̂e, ponaro anarî yana komo yehtopo tawakeretopo yakn̂iso kica. Tînîhtînorî pîn komo tawakeretopo nakn̂iyatken̂e. Anîhtînorî pîn komo ro ma mîkî, aporin pen komo nîhtînorî pîn marha, noro yipu komo tawakeretopo nakn̂iyatken̂e kica.

4 On wara tko wîxakn̂e Ow, oyanton komo wen̂epekn̂e yîhyaka so aweronoman̂e komo. Pahxaxaro so rma wen̂epekn̂e. On wara wîîkekn̂e yîwya so yîn̂ekatîmrî me, Ai, okopuci komo, poxumra ro mak ween̂asî awehtopo komo. Ero pokohra ro mak tak ehcoko, wîîkekn̂e yîwya so.

5 Omtapotarî ponarora ro makî tko xatken̂e kica. Kicicme cehtoponhîrî komo poxunkara ro mak xatken̂e okwe. N̂ex ha ponaro anarî yana komo yehtopo tawakeretopo yakn̂itopo kîwya so. Akn̂ipîra tak cehceri ha, kahra xatken̂e okwe.

6 Ero ke kîrwonakn̂e tak wehto wara ro mak. Xuta komo yewtontho mko wakn̂ipekn̂e. Xerusaren roron po waihkano wiir̂akn̂e. Enko xe cecahso nas oroto, pohnî me marha.

7 Ero ke on wara kesî Kporin komo awya so hara, kantoman̂e ro, ponaro Ixaw Yana komo yehtopo Ow on wara wîîkesî, Ahce kacho kicicme xa marha matu amyamro hara? Awîrîmacho komo yan̂ikn̂e wa xa marha maxe hara okwe. Awanmero so cetwaikaxmu wara rma maxe, Xuta yepamtho pen komo waihkan̂e me ha. Apoyero so rma kîrkomo pen exihra tak men naxe amn̂e, wooxam pen komo, rikomo pen komo, moomo yeen̂e pen komo meero. Exihra ro mak cehso ro mîwaiyaxe okwe.

8 Ow mak mîrwonmekyaxe an̂irithîrî komo ke okwe. On wara maxe tan Exitu po awesekenmacho komo po, kotoporem makn̂iyaxe ponaro anarî yana komo yehtopo tawakeretopo kica. Ero wara awexirî ke so cetwaikaxmu wara maxe amyamro rma. Mîk hak rowon pono komo yîwîrîman̂e me maxe, yînwîrîyakarî me marha maxe okwe.

9 Mîhcamnoce katî kicicme aporin pen komo yehtoponho, kicicme Xuta komo kayaritomon pen komo yehtoponho, kicicme n̂examro pici pen komo yehtoponho, kicicme awehtoponhîrî komo, kicicme apici komo yehtoponho, ero wara awehtoponhîrî komo mîhcamnoce katî? Kicicme ro mak mîxatken̂e Xuta rowon po, Xerusaren roron po marha okwe.

10 Pahxanînhîrî rma, Kicicitho mak ow ha, kahra rma naxe okwe, opoko twerî exihra marha naxe. Owya tpanatanmetopo yewetîra rma naxe okwe. Ero wara ehcoko, wîîkekn̂e awya so, aporin pen komo ya marha. Ero yewetîra rma maxe okwe.

11 Ero ke on wara wîîkes Ow Aporin komo, kantoman̂e ro, ponaro Ixaw Yana komo yehtopo, Awîrîmacho komo men wîhtînoyasî anarme yîhtînon̂e pîn me ro mak. Awîrîmacho komo men wekmexpesî aapo so. Ahnoro Xuta pen komo waihketîkesî.

12 Xuta yepamtho komo yakwenho poko meero wîîkesî, Exitu pona tmohtopo komo nîhtînoyatken̂e n̂examro anarme esehtînopîn me. Esekenmaxi mokyatken̂e. N̂examro pen marha wîhcamnoyasî, Exitu po rma waihyaxe. Kacipara imo ke waihyaxe anarî komo, rooma ke waihyaxe anarî kom hara. Waihyaxe emyawnomnî pen komo, cemyawnoyem pen komo meero. Apoko so n̂eserepokexe ro mak tantono komo. Okwe ro mak okwe, kacho me xa maxe yîwya so, Kicicitho ro mak mîkyam ham, kacho me marha. Eremkaxapu me marha naxe, tîwîrîyakaxmu me marha okwe. Ero wa men kexe amn̂e okwe tantono komo apoko so.

13 Exitu pona esekenmaxapu komo waihkan̂e me tak was Ow, Xerusaren pono komo waihkekn̂e ero wa xa marha. Kacipara imo ke waihkesî, rooma ke, eper̂a ke, ero yipu ke so waihkesî.

14 Cewn̂e n̂hema etîmtora ro mak maxe amyamro, Xuta yepamtho yakwenho komo, Exitu Yana cheka mohxapu komo poyinonho ha. Tîwîrîmacho komo yai emahcira ro mak naxe. Xuta rowon pona tîto xe maxe, iina cesekenma xe xa hara naxe. Iina tohra naxe okwe. Asakî cik mak n̂etîramexe iina waapa yai emahcixapu komo cik mak, kesî. Ero wa kesî Kporin komo, kekn̂e. Ero wara kekn̂e Xeremias yîwya so.

15 Taa, iito xatken̂e kîrkomo yaake, On wara ketken̂e anarî komo tîropotaw so mak, Opici meero nakn̂iyasî ponaro anarî yana komo yehtopo tawakeretopo kotoporem, ketken̂e tîropotaw so. Iito marha xatken̂e mer̂pono pîn wooxam komo cececetoso. Ahnoro Xuta yepamtho komo xatken̂e iito Exitu pona esekenmaxapu komo, Patros pona esekenmaxapu kom ha. N̂examro tak n̂eyukyatken̂e Xeremias mtaka.

16 On wara ketken̂e yîwya, Amtapotarî yewetîra ro mak nas amna, Ero wara kesî Kporin komo, kacho yewetîra.

17 Tîmtapotachonhîrî yaw roro mak nas amna. Kotoporem nakn̂iyasî rma amna kaapu kayaritomon tawakeretopo, wooxam tawakeretopo ha. Noro ya tîmsom marha amna nukmamyasî wooku. Pahxa ero wara amna xakn̂e, amna porin pen komo marha, amna kayaritomon komo marha, amna yantoman̂e komo marha. Ero yimaw tînahke xa xakn̂e amna okre, tahwokacho chewra xakn̂e amna, tîwîrîmacho chewra marha.

18 Kokon̂oro n̂he takî kotoporem yakn̂ipîra amna xakn̂e kaapu kayaritomon tawakeretopo, wooxam tawakeretopo ha. Wooku yukmamra marha amna xakn̂e. Ero yimawno n̂ixa ro rma n̂esemetanmekyasî ro mak amna. Amna marha waihyasî kacipara imo yaka, rooma yaka marha, ketken̂e yîwya okwe.

19 On wara ketken̂e wooxam kom hara, Kaapu kayaritomon tawakeretopo kotoporem nakn̂iyakn̂e amna. Noro ya tîmsom marha wooku amna nukmamyakn̂e. Kaapu kayaritomon ya tîmsom me puruma amna naayasî, wooku marha amna nukmamyasî noro wokru. Ero poko ma re amna xakn̂e amna yin̂o wen̂ekarî, ketken̂e. Ero wara ketken̂e wooxam komo yîwya.

20-21 On wara tko n̂eyukyakn̂e Xeremias kîrkomo mtaka, wooxam komo mtaka marha, Kicicme awehtoponhîrî komo ponarora ma re xakn̂e Kporin komo awya so? Kotoporem makn̂iyatken̂e Xuta komo yewton po so, Xerusaren roron po marha. Aporin pen komo marha kotoporem nakn̂iyatken̂e, akayaritomon pen komo, awantoman̂enhîrî pen komo, apoyino pen komo, ero warai pen komo xatken̂e ero yipu poko okwe. Ero wa awehtopo komo ponarora ma re xakn̂e Kporin komo awya so?

22 Pahkî exiche kicicme awehtoponhîrî komo yînmîra takî tî xakn̂e Kporin komo, poxumnî ro poko awehtoponhîrî kom ha. Ero ke tîwîrîmaxmu me tak arowonthîrî komo n̂iir̂akn̂e. Wermonho me mak nasî oroto, pohnî me ro mak okwe, tîwîrîmaxi ro mak nasî. Ero poko n̂eserepokexe ro mak amîtwononhîrî komo.

23 Kotoporem makn̂iyatken̂e kica, kicicme ro mak mîxatken̂e kica Kporin komo poko. Noro yewetîra ro mak mîxatken̂e. Yîwya apanatanmetopo komo yewetîra mîxatken̂e, Ero wa ehcoko, kachonho yewetîra ha. Ero wa awexirî komo poyero mak awîrîmacho komo awepor̂atken̂e so, enko xe awexirî komo oroto okwe, kekn̂e tî.

24-25 On wara marha kekn̂e Xeremias tpoyino komo ya, wooxam komo ya meero, Ai oyakno komo, aaci komo, Xuta yepamtho komo amyamro, Exitu Yana cheka mohxapu kom ha, on wara kes hara Kporin komo awya so, kantoman̂e ro, ponaro Ixaw Yana komo yehtopo, On wara mîîketken̂e amyamro, apici komo marha, Pahxa rma amna nîmtapowakn̂e kotoporem yakn̂itopo poko kaapu kayaritomon tawakerecho me, noro wokru yukmamtopo poko marha. Yaaro amna kekn̂e ero pokono ro me amna yehtopo poko. Ero ke ero wara rma nas amna oroto etowra ro mak, mîîketken̂e. Yaaro mîîketken̂e ham. Enko xe awexirî komo, entakî marha amtapotarî komo. Ero ke ero wara rma mat ham amtapotachonhîrî komo yaw roro rma ham, kesî Kporin komo awya so.

26 Kporin komo mtapotarî tko entacoko xa hara. Ahnoro amyamro Xutew komo, Exitu po esekenmaxapu komo, on wara men kesî Kporin komo awya so, On wara exihra ro mak naxe Xuta komo, Exitu pona mohxapu komo, oyosotî yetacira ro mak tak maxe amyamro yaaro amtapotachonhîrî yentamexpotopo me. Yaaro xa nasî Kporin komo waipîn me ero wara xa marha yaaro wîîkesî, kahra tak men maxe. Yaaro men wîîkesî. Oyosotî tan wetahcasî yaarono me yîhtînomexpotome omtapotarî. Cekaiporem xa oyosotî. Ero warai me oyetacira ro mak tak naxe.

27 Awenîn̂e komo me mak wasî awîrîmachome so, awakronomara so oyehtome. Mîwaitîkexe tak okwe Xuta komo, Exitu pono komo. Kacipara imo ke mîwaiyaxe, rooma ke marha, mîwaitîkexe okwe.

28 Asakî cik mak n̂emahciyaxe Exitu poi tîtotome so, Xuta rowon pona cetîramachome so hara. Ero yimaw tak kîmtapotarî komo mîhtînoyaxe amyamro Xuta yakwenho komo, Exitu pono komo cheka mohxapunhîrî komo. Omtapotarî yaw roro kati n̂ehtîkace, yîmtapotarî komo yaw roro katî n̂ehtîkace? Ero tak nîhtînoyaxe yaaro.

29-30 On wara marha kesî Kporin komo awya so, On wara ciino wiir̂asî amn̂e yaarono me omtapotachonho yîhtînotome awya so. Kîwîrîmacho xa n̂ekpe ham okwe Kporin komo, mîîkexe tak. On wara Paraw-Opra pen wiir̂asî, Exitu Yana kayaritomon pen, yiixatî pîn komo ya war̂mapesî, waihka xatî komo ya. Pahxa Setekias pen war̂mapekn̂e Nabukotonso ya, yiixatî pîn ya, waihka xatî ya ha. Ero wara Xuta komo kayaritomon pen wiir̂akn̂e. Ero wa xa marha Exitu pono komo kayaritomon wiir̂as hara owya awîrîmacho komo xa marha yîhtînotome xa tak awya so, kesî. Ero wa kesî Kporin komo awya so, kekn̂e Xeremias Xutew komo ya.