Ero wa kekn̂e Xeremias, Kporin komo mtapotachonho n̂ekatîmtîkekn̂e tpoyino komo ya. On wara men kasko yîwya so, kekn̂e Kporin komo Kaan yîwya, ero wa kacho rma n̂ekatîmtîkekn̂e yîwya so.

2 On wara tko n̂eyukyatken̂e entan̂e komo. Asarias Osaias, Xoanan Karea, ahnoro ehcoyopono me cesehtînosom komo n̂eyukyatken̂e. On wara ketken̂e yîwya, Mîcemaronwasî mak kica. Ero wara kahra ro mak xakn̂e Kporin komo awya, On wara men kasko yîwya so, Exitu pona men tohra ro mak ehcoko, kahra ro mak wa xakn̂e awya.

3 Baruke N̂erias xa matko ero wa kekn̂e awya amna xatî pîn me awehtome. Kawtew komo ya amna waihkapo xe mak nai ham kica, anarimaw amna yarpo xe nai yîwya so Babiron̂a pona okwe, ketken̂e yîwya.

4 Ero wa kekn̂e Xoanan okwe, sowtatu yantoman̂e komo, etîmtoxapu komo marha, ahnoro mak ero wa ketken̂e, Kporin komo yewetîra xatken̂e, On po rma ehcoko Xuta rowon po, kachonho yewetîra.

5-6 Ero ke on wara xatken̂e Xoanan komo, ahnoro sowtatu yantoman̂e komo, Xuta yakwenho komo tak naar̂atken̂e Exitu pona. Yaake rma re xatken̂e etîmtoxapu komo. Mehxa mokyatken̂e anarî yana chewnonho komo, mîk hak rowon pona so en̂epexapunhîrî kom ha. Noro yipu komo ahnoro naar̂atken̂e, kîrkomo, wooxam komo, rikomo komo, kayaritomo yemsîrî komo. N̂ebusaratan nînomtho komo ahnoro naar̂atken̂e, Xetarias yaw yînînomthîrî komo. Xeremias marha naar̂atken̂e, weronomano rin̂e ha. Baruke N̂erias marha naar̂atken̂e.

7 Ero wa cetken̂e Exitu pona. Kporin komo mtapotarî nanwekyatkekn̂e okwe. Miya cetken̂e Tapn̂es pona roro.

8-9 Taa, Tapn̂es po exitaw so on wara kekn̂e Kporin komo Xeremias ya, Ai Xeremias, on wara esko Xutew komo wero ro. Toopu arko Paraw mîn potaka, Tapn̂es pono potaka. Porin komo arko. Iito nasî cixoru, noro roron me ciixapu. Iina tak toopu mko eyamko kawau cheka.

10 Eyamuche on wara kasko Xutew komo ya, Ai oyakno komo, on wara kesî Kporin komo, kantoman̂e ro, ponaro Ixaw Yana komo yehtopo, Amn̂e oyanton wekmexpesî oona Nabukotonoso, Babiron̂a kayaritomon. On toopu pona rma tapon n̂iir̂asî kayaritomo me cesenpotopo. Tîmîn marha n̂iir̂asî on toopu yepoi.

11 Exitu pono komo yar̂maxi mokyasî noro. Twaihkaxmu komo mîkyam, kacho komo waihkesî, cemeknumisom me taasom komo mîkyam, kacho komo naar̂asî cemeknumiso so, kacipara imo ke tparaxkaxmu komo mîkyam, kacho komo paraxkesî kacipara imo ke oko.

12 Ponaro Exitu pono komo yehtopo mîntho mko nakn̂iyasî. Akn̂ipuche ponaro ehtopo komo tak naar̂asî takro. Tponon karamiyasî oper̂a yosom tupun pore ero wara xa marha Exitu pono komo karamin̂e wara nasî Nabukotonoso, tupun pore karamin̂e wara. Ero yinhîrî cerepore tak ces hara.

13 Mapata warai marha nakuhr̂apesî Bece Semes pono, Exitu pono pen ha. Ponaro Exitu pono komo yehtopo mînî mko nakn̂iyasî kr̂a. Ero wa n̂iir̂asî amn̂e Nabukotonoso, kesî Kporin komo, kasko Xutew yepamtho komo ya, kekn̂e. Ero wara kekn̂e Kporin komo Xeremias ya.