Ero yinhîrî tak Xeremias yaka mokyatken̂e sowtatu yantoman̂e komo, weronomano rin̂e mîk noro yaka. On warai komo mokyatken̂e, Xoanan Karea, Xesan̂ias Osaias, ahnoro yîmtoxapu komo mokyatken̂e yîhyaka, emyanowmnî komo, cemyawnoyem komo marha.

2 On wara ketken̂e yîwya, Ai oyakno, on wara kes amna awya, amna mtapotarî cma re mencesî. Kporin komo yakro cma re mîmtapowasî, ponaro awehtopo yakro. Amna poko cma re mîmtapowasî asak mak yîmtoxapu komo poko. Enko xe asak mak taxe mer̂pono pînînhîrî komo okwe.

3 On wara cma re mîîkesî Kaan ya, Apa kah yawno, pona amna totopo cma re mekatîmyasî amna ya. Poko amna yehtopo marha cma re mekatîmyasî amna ya, mîîkesî cma re yîwya, ketken̂e.

4 On wara tî Xeremias n̂eyukyakn̂e, Amtapotarî komo wenta. Ero ke kîmtapowasî Kporin komo yakro, ponaro awehtopo komo yakro. Mîîkacow owya ero wara wîîkesî yîwya. Ahce wa na nîîke Noro owya ero rma wekatîmyasî awya so. Watohnî me ro mak wekatîmtîkesî yîmtapotachonhîrî awya so, kekn̂e.

5 Ero yinhîrî on wara ketken̂e xa hara Xeremias ya, Taa, Kporin komo Kaan kes awya ero rma amna n̂ewehcasî. Ero yewetîra exitaw amna kicicme amna yehtoponho yekatîmn̂e me tak n̂expe Kporin komo rma, yaaro ekatîmn̂e me n̂expe.

6 Amna n̂entarî mexan me aweyukyataw, amna n̂entarî mexan pîn me aweyukyataw, ahce wa na aweyukyataw Kporin komo mtapotarî n̂ewehcas amna. Ero wara amna n̂ewehcasî ehn̂an me tak amna yehtome ahce na poko, ketken̂e yîwya. Ero wa ketken̂e Xeremias ya.

7 Ero yinhîrî 10 ro enmapuche tak Kporin komo mtapotarî n̂encekn̂e Xeremias.

8 Ero ke Xoanan nan̂ikyakn̂e, ahnoro sowtatu yantoman̂e komo marha nan̂ikyakn̂e noro yakrono komo. Ahnoro etîmtoxapu komo nan̂ikyakn̂e emyawnomnî komo, cemyawnoyem komo marha.

9 On wara kekn̂e Xeremias yîwya so, On wara mîîketken̂e owya, Kporin komo yakro cma re mîmtapowasî, ponaro Ixaw Yana komo yehtopo yakro, amna poko cma re mîmtapowasî, mîîketken̂e owya. Taa, on wara nîîkai Noro owya,

10 On roowo po rma awexitaw so awin̂e komo me wasî, mîîmo miir̂axe ero wara. Axkan̂e komo mera ro mak wasî. Naatî ciin̂e wara marha wasî awin̂e komo me. Amohkan̂e komo mera ro mak wasî. Ahwora tak was okwe awîrîmacho komo poko, on̂ekmexpotho poko.

11 Ero ke Babiron̂a kayaritomon pona erasîra ehcoko, pona meraswaxe noro pona erasîra tak ehcoko, kesî Kporin komo. Awakrono komo rma Ow ha. Kukurunpexe so tak awîrîmara so ro mak tak noro yehtome.

12 Apînîn yaw so wasî. Ero ke noro xa marha tak nasî apînîn yaw so hara. Noro rma awen̂epexe so awekenhîrî komo pona hara.

13 On wara tko na mîîketu anarimaw, On roowo po rma exihra tak nas amna, mîîketu na. Ero wa ketaw awya so Aporin komo yanwekn̂e me men maxe okwe, ponaro awehtopo komo yanwekn̂e me rma kica.

14 On wara na mîîketu, Pîra, Exitu pona xa matko amna cesî. Iitono ro me tak nas amna. Iito tak waapa komo yenîhra ro mak nas amna. Tuu kacho yentara marha nas amna iito, Amohcoko etar̂maxi, kacho yentara. Iyurumra exihra marha nas amna iito okre, mîîketu na.

15 Ero wara ketaw awya so entacoko men Kporin komo mtapotarî awakro so. Xuta poyino yîmtoxapu cik amyamro awya so wîîkesî. On wara men kesî Kporin komo awya so, ponaro Ixaw Yana komo yehtopo, awantoman̂e kom ha, On wara na mîîketu, Pîra, Exitu pona amna totopo nîhtînoyasî xa amna anarme yîhtînon̂e pîn me ro mak, mîîketu na. Ero wa kan̂enho mîîcetu rma na iina esekenmaxi.

16 Iina awcetaw so iito tak aparaxkexe so rma kacipara imo, pona meraswaxe ero rma. Exitu pona roro mokyasî rooma awenari so, pona meraswaxe ero hara. Iito tak mîwaiyaxe okwe Exitu po rma.

17 On wara na mîîketu, Pîra, Exitu pona amna totopo mak amna nîhtînoyasî, iina amna yesekenmacho marha amna nîhtînoyasî, mîîketu na. On wara maxe ero wa kan̂e komo ahnoro, iito tak mîwaiyaxe kacipara imo ke oko, rooma ke marha okwe, eper̂a yaka marha. Ero wara mîwaiyaxe. Awîrîmacho komo wekmexpesî iina. Ero ke iito rma waipîn me exihra ro mak maxe, cewn̂e n̂hema etîmton me maxe okwe. Metwîrîmexe emahcin me ro mak okwe, kesî Kporin komo awya so.

18 On wara men wîîkes Ow Aporin komo, ponaro Ixaw Yana komo yehtopo, Kirwonakn̂e xa Xerusaren pononho pen komo poko yîwîrîmachome, ero wa xa marha tak kîrwonasî apoko so hara Exitu pona awcetaw so. Okwe ro mak okwe, kacho me mak maxe iitono komo ya. N̂eserepokexe ro mak apoko so. Aweremkexe so marha iitono komo, awîrîyakexe so marha okwe. On arowonthîrî komo yenîhra ro mak tak maxe hara okwe, kesî Kporin komo awya so.

19 Xuta yepamtho yakwenho komo cik amyamro, on wara men nîîka Kporin komo apoko so, Exitu pona tohra ro mak ehcoko, nîîka. Kweronomacow so men oroto yîmtapotarî yaw roro.

20 Yaarono mera ro mak mesehtînoyatken̂e aropotaw so oyantometaw awya so Kporin komo mtapotarî yentacho poko. On wara mîîketken̂e owya, Amtapotakî Kporin komo yakro, ponaro kehtopo komo yakro. Amna poko amtapotakî Noro yakro. Yîmtapotachonhîrî ekatîmko amn̂e amna ya. Ero tak amna n̂ewehcasî. Ahnoro yîmtapotachonhîrî amna n̂ewehcasî, mîîketken̂e cma re owya.

21 Yîmtapotachonhîrî rma re wekatmo awya so. Ero yewetîra rma tko mehcow okwe. Ahnoro omtapotarî yewetîra mehcow okwe, awya so kekn̂e Noro ero.

22 Ero ke on wara kacho men yîhtînocoko awero ro so xa, Iito awexitaw so tak awto xe awehtopo komo pona iito rma mîwaiyaxe okwe kacipara imo ke, rooma ke marha, eper̂a ke so marha okwe, kacho yîhtînocoko yaaro xa ha, kekn̂e. Ero wara kekn̂e Xeremias yîwya so.