Ero yinhîrî Xetarias yaka takî tî mokyakn̂e Ismaew N̂etan̂ias. Erisama pen mumutho mîk xakn̂e N̂etan̂ias. 7-nhîrî nuun̂i po tî mokyakn̂e. Kayaritomo yananî rma tî mîk xakn̂e, kayaritomo maywenî ro komo marha mîk xakn̂e. 10 mokyatken̂e Ismaew yakro kîrkomo. Mispa pona tî mokyatken̂e. Iito tî n̂eseresmetken̂e Xetarias yakro.

2 Ero wa eseresmetaw so rma Ismaew nawomyakn̂e piiri. 10 komo marha nawomyatken̂e noro yakrono komo. Xetarias pen tî paraxketken̂e kacipara imo ke oko, twaihkaxi ro tî paraxketken̂e okwe. Ero wa tî Nabukotonoso n̂iritho pen waihketken̂e okwe, kopenato me yin̂irithîrî pen ha.

3 Iitononhîrî pen komo marha waihketken̂e Xuta pen komo, Xetarias yakrononho pen komo. Kawtew pen komo marha waihketken̂e, sowtatu pen komo, iitono kom ha. Mispa po rma n̂examro pen waihkekn̂e Ismaew.

4-5 Taa, anarî komo tî entara xatken̂e Xetarias pen waihkachonho. Ero yimaw tak asak ro enmapuche kîrkomo mokyatken̂e iina. Siken poi mokyatken̂e, Siiro poi, Samaria poi marha, en̂exa so mokyatken̂e yaake, 80. Esetpokaxapu komo mîkyam xatken̂e, tahyaxkaxi so marha xakn̂e ponon komo. Cecaikaxi so marha xatken̂e oko. Puruma yeperîrî tî n̂ekyatken̂e Kporin komo mîn yaka Noro ya tîmsom me. Kotoporem marha tî n̂ekyatken̂e iina.

6 N̂examro yakro esepotpona tî cekn̂e Ismaew, Mispa poi. Tîwrataro tî cekn̂e. N̂examro yakro ceseporîche on wara kekn̂e yîwya so, Ai oyakno komo, amohcoko Xetarias yaka, Aikan mumuru yaka, kekn̂e tî kica.

7 Ero yinhîrî ewto pona epatakache so mohxapu pen komo takî tî waihketken̂e Ismaew, takrono komo yakro. Okoputhîrî komo tî nar̂metken̂e ewtarî yaka.

8 Xatken̂e tko 10 kîrkomo waikaxa pen yakrononho komo. Ismaew yakro tî nîmtapowatken̂e n̂examro. On wara tî ketken̂e yîwya, Ai oyakno, amna waihkara esko. Mer̂pora ro mak nas amna nîmtorî puruma yeperîrî, sepata yeperîrî, asece, weenu, ero wara. Mînto nasî mararî po, ketken̂e tî yîwya. Ero ke n̂examro waihkara xakn̂e Ismaew akrononhîrî komo waihketaw.

9 Taa, kîrkomo pen waihkache Ismaew ya okoputhîrî komo nar̂mekn̂e ewtarî yaka, Xetarias pen komo yokoputho nar̂mekn̂e ero yaka. Asa pen nahtotho tî mîn xakn̂e ewtarî, kayaritomo pen nahtotho. Baasa pona tî n̂eraswakn̂e Asa, Ixaw Yana komo kayaritomon pona. Ero ke tî ewtarî nahtopekn̂e. Ero yaka tî tînwaikathîrî komo yokoputho nar̂mekn̂e Ismaew N̂etan̂ias, copoyinkekn̂e tak.

10 Ero yinhîrî waihkara ehxapu komo takî tî naatîkekn̂e Ismaew. Mispa pononho komo naar̂akn̂e, kayaritomo yemsîrî komo, ahnoro Mispa po etîmtoxapu komo naatîkekn̂e. Pahxa on wara tî kekn̂e N̂ebusaratan, Nabukotonoso kurun komo yantoman̂e, Xetarias ya tî kekn̂e, Moxam men amaywen komo, kekn̂e tî. N̂examro pen naatîkekn̂e Ismaew tahsîso so okwe. Cetken̂e tak Amon komo cheka.

11 Ero yinhîrî tko waapa me Ismaew yehtoponho n̂encetken̂e Xoanan komo, anarî komo marha sowtatu yantoman̂e kom ha, noro yakrono kom ha.

12 Ero ke kîrkomo naar̂atken̂e ahnoro. Ismaew yakro etar̂maxi tî cetken̂e. Noro takî tî n̂epor̂atken̂e n̂ikitho yecihtaw, Xibeon pono yecihtaw ha.

13 Taa, Xoanan yeen̂ataw, noro sowtatun yantoman̂e komo yeen̂ataw marha tawake ro makî tî xatken̂e Ismaew narîrî komo.

14 Ero ke on wara tî xatken̂e n̂examro, Mispa poi Ismaew narîrî komo, n̂etaknametken̂e takî tî. Xoanan Karea yaka tî cetken̂e.

15 Ismaew takî tî n̂emahciyakn̂e Xoanan yai. 8 kîrkomo yakro ti n̂emahciyatken̂e. Amon yana komo yaka tî cetken̂e. Ero wa tî xatken̂e Ismaew komo.

16 Ero yinhîrî on wara tak xatken̂e Xoanan komo, noro yakrono komo marha sowtatu yantoman̂e komo, Mispa po etîmtoxapu komo naatîketken̂e. Ismaew narîtho komo marha naatîketken̂e, Xetarias pen waihkan̂enho narîtho kom ha. Sowtatu komo naar̂atken̂e, wooxam komo, rikomo komo, ewnuku komo, Xibeon poi yîn̂ekîthîrî komo ahnoro naatîketken̂e.

17 Keruce-Kiman pona takî tî n̂etakriyatken̂e. Beren mîtwono mîn Keruce-Kiman. Iina ka n̂etakriyatken̂e Exitu pona tîcetaw so.

18 Kawtew komo pona tî n̂eraswatken̂e Xetarias pen waihkarî ke Ismaew ya, Nabukotonoso n̂iritho waihkarî ke. Xuta rowon pono komo kopenato me n̂iir̂akn̂e noro pen waihkarî ke n̂eraswatken̂e. Ero ke Exitu pona tîto xe xatken̂e. Ero wa tî xatken̂e.