Ero yinhîrî tak Kporin komo mtapotarî n̂encekn̂e xa hara Xeremias. On wara exitaw n̂encekn̂e, Xeremias n̂een̂akn̂e N̂ebusaratan, Nabukotonoso kurun komo yantoman̂e. Xuta komo yakro xakn̂e Xeremias, Xerusaren pononho yînarîrî komo yakro. Tapomiso tî noro xakn̂e n̂examro yakro, Babiron̂a pona taasom komo yakro.

2 Xeremias yenîche N̂ebusaratan ya on wara kekn̂e yîwya, Ai oyakno, Kporin komo mtapotarî yanme rma on warai awîrîmacho komo awepor̂atken̂e so tan, ponaro awehtopo komo mtapotarî yanme ham.

3 Oroto tak awîrîmacho komo n̂ekmexpo tîmtapotachonhîrî yaw roro rma. On warai awepor̂atken̂e so kicicme awexirî komo poyero Kporin komo ya. Yîmtapotarî yewetîra mîxatken̂e okwe.

4 Oroto tko kîmhokesî, awemeknumitoponhîrî wîmhokesî. Oyakro tak amok ha Babiron̂a pona amoku xe awexitaw mak. Iina amokuche kakronomesî. Amoku xera awexitaw mokuhra esko. Enko xe, ahnoro roowo nasî anmen̂ekarî me. Aweken men̂ekakî awanme ro mak, kekn̂e. Ero wa kekn̂e Xeremias ya.

5 Ero ke tak cekn̂e Xeremias. Tohra rma ka exitaw cokorî on wara kekn̂e N̂ebusaratan yîwya, Etok hara Xetarias yaka, Aikaw mumuru yaka, Sapan parî yaka ha. Xuta komo kopenaton me noro n̂iir̂akn̂e Nabukotonoso, ewto pono komo yenîn̂e me. Xetarias mîtwo esko etîmtoxapu komo chew yiixe awexitaw. Awanme ro mak etoko ahna ha na, kekn̂e. Ero yinhîrî Xeremias nahrî nîmyakn̂e yîwya, cepethîkem marha nîmyakn̂e yîwya ahce na. Ero yinhîrî n̂en̂epekn̂e tanme ro totohme. Ero wa xakn̂e sowtatu yantoman̂e Xeremias poko.

6 Ero ke Xetarias yaka tak cekn̂e Xeremias Mispa pona. Noro mîtwono me xakn̂e iito rma etîmtoxapu komo chewno me. Ero wa xakn̂e Xeremias.

7 Taa, iito rma Ixaw Yana komo rowon po rma xatken̂e sowtatu komo, sowtatu yen̂în̂e komo marha. Woskara po makî tî xatken̂e ewto po exihra. Iito cexitaw so Xetarias yehtoponho tî n̂encetken̂e. Xetarias tî n̂iir̂akn̂e Nabukotonoso on roowo pono komo kayaritomon me. Yupurantamnî komo xatken̂e iito rma, kîrkomo, wooxam komo, rikomo komo. N̂examro yarîhra xatken̂e Babiron̂a pono komo. N̂examro kopenato me takî tî Xetarias n̂iir̂akn̂e, Aikaw mumuru, kacho tî n̂encetken̂e.

8 Ero wa kacho yentache sowtatu komo ya n̂examro takî tî mokyatken̂e Xetarias yaka Mispa pona. On wara xakn̂e mohxapu komo yosotî, Ismaew N̂etan̂ias, Xoanan, Xonatas komo, Karea mumuru komo, Seraias Tanumece, Epai mumuru komo, N̂etopace pono mumuru kom ha, Xesan̂ias, Maaka pono mumuru. N̂examro mokyatken̂e Xetarias yaka tîsowtatun komo yakro.

9 Ero ke on wara kekn̂e Xetarias yîwya so, Yaaro xa tak amtapotacoko Kaan n̂entarî me, Amaywenî ro me tak nas amna, kacoko yaaro xa. Erasîra ro mak ehcoko Kawtew komo pona. N̂examro mamawno me cehcerî erasîn me ro mak. Aweken komo encoko on roowo pono. Babiron̂a kayaritomon yewetîn̂e me ehcoko. Ero wa awexitaw so kir̂wan̂he tak maxe ahce na poko ehn̂an me okre.

10 Owî reha Mispa pono me wasî. Iito Kawtew komo mamawno me was ow hara kîhyaka so mohxapu komo maywen me. Mararî pono yeperîrî potucoko anahrî komo me. Uupa yeperîrî marha potucoko awokru komo me so ciisom. Oripa yeperîrî marha potucoko katî me ciisom hara. Ero wara ehcoko amyamro. Anmen̂ekathîrî komo po ehcoko ewto mko po so ha, kekn̂e. Ero wa kekn̂e Xetarias tîhyaka mohxapu komo ya.

11-12 Anarî komo marha tî n̂encetken̂e Xetarias ciitoponho kayaritomo me. Xuta rowon po yîmtoxapu komo kayaritomon me noro n̂iir̂akn̂e Nabukotonoso, kacho tî n̂encetken̂e. Moabe chewno komo, Amon chewno komo, Eton pono chewno komo, mîk hak rowon pono komo, ero warai komo tî n̂encetken̂e Xetarias ciitoponho. Iina so emahcixapu komo mîkyam xatken̂e waapa pona erahtîmrî ke so. Noro ciitoponho yentache mokyatken̂e hara Xuta rowon pona hara. Xetarias yaka tî mokyatken̂e Mispa pona. Iina mokuche so uupa yeperîrî pohcatken̂e twokru komo me. Mararî pono yeperîrî marha pohcatken̂e mer̂pora ro mak.

13-14 Ero yimaw takî Xetarias yakro tî nîmtapowakn̂e Xoanan, Karea mumuru. Ahnoro sowtatu komo marha tî nîmtapowatken̂e noro yakro yîhyaka mokuche so, woskara po ehxapunhîrî. On wara tî ketken̂e yîwya, Ai, oyakno Ismaew yehtoponho yentara ma mai, N̂etan̂ias mumuru yehtoponho? Baaris n̂en̂epetho men mîkro Amon komo kayaritomon n̂en̂epetho. Awaparî me tî n̂en̂epekn̂e okwe, ketken̂e tî yîwya.

15 Ero yinhîrî cewyaro takî tî nîmtapowakn̂e Xoanan Xetarias yakro. Mispa po rma tî nîmtapowakn̂e. On wara tî kekn̂e yîwya, Ai oyakno, owî cma re men̂epesî Ismaew waihkaxi. En̂epa me mak waihkesî. Awaikache ahnoro Xuta yepamtho komo tak n̂etakpayaxe okwe ahyaka mohxapunhîrî komo. Xuta komo yakwenho ciki tak waihtîkexe okwe. Ero wara men naxe awaikache, kekn̂e tî yîwya.

16 On wara tko tî kekn̂e Xetarias yîwya, Ero wa kahra ro mak esko. Tohnaw ro mak mîmtapowasî Ismaew poko okwe, kekn̂e tî. Ero wa tî kekn̂e Xetarias Xoanan ya.