Taa, on wara xakn̂e Xerusaren pona xa sowtatu komo yepatakachonho, 9 cimn̂ipu ka xakn̂e Xuta komo kayaritomon me Setekias yehtoponho, 10-nhîrî nuun̂i po. Ero po mokyakn̂e Nabukotonoso, Babiron̂a pono komo kayaritomon Xerusaren pono komo waparî me. Tmokuche so Xerusaren wamcetken̂e epatakara ro mak ehtome so ero pono komo.

2 Ero yinhîrî 11 cimn̂ipu takî xakn̂e kayaritomo me Setekias yehtoponho. 4-nhîrî nuun̂i po, 9-nhîrî kaamo po, ero po ewto wacan nawketken̂e sowtatu komo.

3 Ero yinhîrî tak Babiron̂a kayaritomon maywen komo mokyatken̂e waaca potaka, antomano rin̂e kom ha. Waaca metatan yaw rma n̂eremetken̂e, rakatawno yaw. On wara xakn̂e osotî komo, N̂ekaw-Sarese, Sanka-N̂ebo, Sasekin, Habe-Saris, N̂ekaw-Sarese, Habe-Make, miya rma xatken̂e Nabukotonoso maywen komo, antomano rin̂e kom ha. N̂examro tî n̂er̂emetken̂e waaca metataw rma kopi.

4 On wara tî xakn̂e Setekias, Xuta komo kayaritomon, Babiron̂a pono komo tî n̂een̂akn̂e ceremaxi waaca potaw rma. Ahnoro noro sowtatun komo marha n̂examro n̂een̂atken̂e. Ero ke n̂emahciyatken̂e tak ewto poi kosope. Kayaritomo natîrî yecento n̂epataketken̂e ewto poi. Iito xakn̂e asakî waaca etantaw re. Iito marha xakn̂e metata. Ero yaro n̂epatakekn̂e Setekias. Miya tak n̂emahciyakn̂e woskara pore.

5 Noro wenari tko tî cetken̂e Kawtew sowtatun komo. Setekias pen takî tî nahsîyatken̂e Xer̂ko woskaran po. Noro pen yahsîche Nabukotonoso yaka tî naar̂atken̂e. Hibra po tî xakn̂e noro, Amace pono po. Iito takî tî Setekias pen n̂en̂ekekn̂e Nabukotonoso.

6 Ero yinhîrî Setekias mumutho komo waihkapekn̂e yîîm wero ro rma okwe. Hibra po rma waihketken̂e. Ahnoro Xuta yepamtho yantoman̂e pen komo marha waihkapekn̂e Babiron̂a komo kayaritomon.

7 Ero yinhîrî Setekias pen takî tî n̂ewkekn̂e oko. Nîhraknumiyakn̂e marha bronse ke aatome tak Babiron̂a pona.

8 Ero yimaw marha kayaritomo mîntho mkko nakn̂iyatken̂e Kawtew komo, miyan komo mîntho rma nakn̂iyatken̂e. Xerusaren wacantho marha macaketken̂e cewakrokaxi ro.

9 Xerusaren po rma etîmtoxapu komo tak naar̂akn̂e N̂ebusaratan Babiron̂a pona. Nabukotonoso maywen me etowxapu komo marha naar̂akn̂e. Kayaritomo kurun komo yantoman̂e mîk xakn̂e N̂ebusaratan.

10 Iito rma tko tî emyawnomnî ro komo nînomyakn̂e N̂ebusaratan. N̂examro ya tî nîmyakn̂e naatî, uupa yatî, mararî mko marha. Ero yimaw rma tî nîmyakn̂e yîwya so.

11-12 N̂ebusaratan tko tî nantomekn̂e Nabukotonoso Xeremias poko. Pahxa n̂he tî kekn̂e yîwya on wara, Xeremias cirko ahyaka. Noro yemetanmekîra esko. Ero wa oyexi xe wasî, ketaw awya ero wara rma noro cirko, kekn̂e.

13-14 Ero ke kayaritomo maywen komo takî tî n̂en̂epekn̂e N̂ebusaratan Xerusaren pona. Habe-Sarisi, N̂ekaw-Sarese, Habe-make, ero wa xakn̂e en̂epexapu komo osotî. Ahnoro tî kayaritomo maywenî ro komo tî n̂en̂epekn̂e iina. N̂examro takî tî sowtatu komo n̂en̂epetken̂e Xeremias wece. Ero ke noro tî naar̂atken̂e kahrutopo yai. Xetarias yaka tî naar̂atken̂e. Aikaw mumuru tî mîk xakn̂e Xetarias, Sapan parî ha. Moso men arko yîmîn yaka, ketken̂e tî yîwya. Ero ke tîyanan komo chew tak xakn̂e Xeremias.

15-16 Taa, pahxa n̂he, iito rma ka exitaw Xeremias kahrutopo yaw Kporin komo mtapotarî tî n̂encekn̂e hara noro. On wara kekn̂e yîwya, Ai Xeremias, etoko Ebece-Mereke yaka, Eciopia pononho yaka. On wara kasko yîwya, Ai oyakno, on wara kesî Kporin komo awya, kantoman̂e ro Mîk kesî, ponaro Ixaw Yana komo yehtopo ha, Omtapotachonho yaw roro rma on pono komo yîwîrîmacho wekmexpesî. N̂examro yahworetopo yekmexpora ro mak was okwe. Yîwîrîmatopo me enmayataw ero po rma yîwîrîmacho komo meen̂asî.

17 Ero po tko amoro kukurunpesî. Waapa nahsîtorî me masî ero yimaw, pona awerahtîmtopo komo nahsîtorî me ha.

18 Yaaro tan wîîkesî, kukurunpesî, wîîkesî. Waipîra masî kacipara imo ke. Waipîra awehtopo nasî awepethîrî me. Ero wara kukurunpesî opona enîn̂e me awexirî ke okre, kesî Kporin komo, kasko yîwya, kekn̂e. Ero wa kekn̂e Kporin komo Ebece-Mereke ya.