1-2 Taa, Xeremias nîmtapowakn̂e xa hara tooto komo n̂entarî me. On wara kekn̂e ero yimaw, On wara kesî Kporin komo, tanî rma awexitaw so ewto po mîwaiyaxe ha men okwe. Waapa komo men aparaxkexe so anarimaw, rooma yaka mîwaiyaxe anarimaw, eper̂a yaka mîwaiyaxe anarimaw so. Kawtew komo maywen me awcetaw so reha waipîra rma maxe okre. Waipîra awehtopo komo nasî awepethîrî komo me. Kar̂pe rma maxe.

3 On wara men kesî Kporin komo, on ewto men wahsîpesî Babiron̂a pono komo kayaritomon sowtatun komo ya. Tantono komo men nahsîyaxe okwe, kesî Kporin komo, kekn̂e Xeremias iitono komo ya. Yîmtapotarî tko tî n̂encetken̂e kîrkomo. Sepacias Matan, Xetarias Pasu, Xukaw Seremias, Pasu Mawkias, ero wa tî xatken̂e yîmtapotarî yentan̂e komo.

4 Antomano rin̂e komo mîkyam xatken̂e. Ero ke on wara tî ketken̂e n̂examro kayaritomo ya, Apa, Xeremias cma re mîwaikesî kr̂a. Tanî naxe sowtatu komo. N̂examro yahwokamexpon̂e me nasî Xeremias ero wa karî ke. Ahnoro kpoyino komo yahwokamexpon̂e me nasî kica ero wa karî ke. Tantono komo yakronoma xera nai ham noro, yîwîrîmano mak ciri xe nai ham okwe, ketken̂e tî kayaritomo ya.

5 On wara makî tî n̂eyukyakn̂e kayaritomo, Setekias, Amyamro ha tko. Awanme ro so mak ciicoko. Kayaritomo rma re ow, wara rma anarme kahra thakwa was awya so, kekn̂e makî tî Setekias okwe.

6 Ero ke Xeremias pen nahsîyatken̂e n̂examro. Roowo yahtoxapu yaka tak tî noro pen n̂enîhcetken̂e, Mawkias nahtotho yaka, kayaritomo mumuru nahtotho yaka. Ahruno ritopo roron po tî xakn̂e ero. Xeremias pen n̂enîhcetken̂e ruupu ke tawyocke. Tuuna exihra xakn̂e ahtoxapu yaw, apacakrî mak xakn̂e iito kica. Ero ke n̂emihcakn̂e ha re Xeremias pen apacakrî cheka kica. Ero wa noro pen n̂iir̂atken̂e okwe.

7 Taa, ero yimaw kayaritomo mîn yaw tî xakn̂e Ebece-Mereke. Eciopia pononho mîk xakn̂e, ewnuku me cehsom. Kayaritomo yakro cesentaxmu tî mîk xakn̂e. Xeremias yenîhtotoponho tî n̂encekn̂e noro, yuhnawno yaka enîhtotoponhîrî. Ero yimaw kayaritomo tî xakn̂e ceremaxi waaca metatan yaw, Benxamin metatan yaw.

8-9 Ero ke kayaritomo mîn yai tî cekn̂e Ebece-Mereke kayaritomo yenso. On wara tî kekn̂e yîwya, Apa, kayaritomo amoro. On wara wîîkesî awya mîkyam poko kîrkomo poko. Kicicme ro mak Xeremias pen n̂iicow okwe, weronomano rin̂e pen okwe. Ahtoxapu yaka n̂enîhtocow okwe. Iito rma cexitaw noro pen waihyasî men okwe rooma yaka. Iyurumra thakwa tak naxe on pono komo okwe, kekn̂e tî kayaritomo ya.

10 Ero ke on wara tî kekn̂e kayaritomo Ebece-Mereke ya, Eciopia pononho ya ha, Taa, xehxa arko kîrkomo awakro 30. Xeremias anîmcoko hara ahtoxapu yai waipîra rma ka exitaw, kekn̂e tî.

11 Ero ke ero wicakî kîrkomo naar̂akn̂e Ebece-Mereke. Kayaritomo mîn yaka tî cekn̂e, puranta yen makatawno yaka ha. En̂exa tî naar̂akn̂e poonotho. Ero tak n̂enîhcekn̂e ruupu poko Xeremias yaka.

12 On wara kekn̂e Ebece-Mereke, Eciopia pononho yîwya, On poonotho cirko ayahtarî woom me, ruupu yaam me, kekn̂e. Ero ke ero wara rma n̂iir̂akn̂e Xeremias.

13 Ero yinhîrî tak Xeremias nanîmyatken̂e ruupu ke. Ahtoxapu yai nanîmyatken̂e. Ero yinhîrî kayaritomo kurun komo roron pono yaw tak xakn̂e hara Xeremias, mîîmo yaw. Ero wa xakn̂e Xeremias.

14 Ero yinhîrî on wara xakn̂e kayaritomo, Xeremias nan̂ikpekn̂e xa hara tîhyaka. Kporin komo mîn metatan tî xakn̂e osorwaw. Mehxan mîtwo xakn̂e kayaritomo, osorwawnonhîrî mîtwo. Iina nan̂ikpekn̂e Xeremias. On wara kekn̂e yîwya, Ai oyakno Xeremias, kîmtapowasî cma re awakro. Omtapotarî men eyuhko. Aropotaka rma eyamra ro mak men esko ekatîmnî kica, kekn̂e yîwya.

15 On wara tko kekn̂e Xeremias Setekias ya, On wara mak wîîkes awya Apa, amtapotarî yeyukyataw owya, ow mak na mîwaike okwe. Awakîretopo yekatîmyataw awya omtapotarî ponarora ro mak mas okwe, kekn̂e Xeremias kayaritomo ya.

16 On wara tko kekn̂e Setekias yîwya, On wara wîîkes awya, waipîn me nasî Kporin komo, kesesîtopo tîmn̂e ro, kacho wara rma nasî omtapotarî. Awaikara ro mak was ow. Amîhra marha was awaika xatî komo ya. Yaaro tan wîîkes awya, kekn̂e kayaritomo Xeremias ya.

17 Ero ke on wara kekn̂e Xeremias Setekias ya, On wara men kesî Kporin komo, kantoman̂e ro, ponaro Ixaw Yana komo yehtopo ha, Babiron̂a pono komo yantoman̂e komo yaka awcetaw n̂examro mamawno me waipîra mas amoro, on ewto yakn̂ipîra marha naxe, ayanan komo marha waipîra naxe.

18 Babiron̂a pono yantoman̂e komo mamawno me tohra awexitaw reha Kawtew komo ya rma ewto nîmyasî Kporin komo. On pononho tak nakn̂itîkesî mîîmo pen. Emahcin me thakwa mas amoro okwe, kekn̂e Xeremias.

19 On wara tko kekn̂e Setekias Xeremiasî ya, Keraswasî Xutew komo pona, Kawtew komo mamawno me etowxapu komo pona. Noro yipu komo na omya Kawtew komo ya. N̂examro tak na oyemetanmekyat oko, kekn̂e.

20 Pîra Apa, kekn̂e Xeremias, amîhra ro mak naxe Kawtew komo ya. Kporin komo mtapotarî tan wekatîmyas awya, ero men ewetko. Ero yewehcataw awya esemetanmekîra tak masî, waipîra marha masî.

21-22 N̂examro mamawno me tohra awexitaw reha, on wara awehtopo n̂enpekn̂e Kporin komo owya, ahnoro wooxam komo, Xuta kayaritomon mîn yaw etîmtoxapu komo, nahsîyaxe amn̂e Babiron̂a pono komo, antomano rin̂e kom ha. On wara tak kexe n̂examro komo apoko, Awemîknoyatken̂e yiixe awehtoponhîrî komo rma. Ayopo xatken̂e ham okwe. Apacakrî cheka tak ahtarî n̂emihce okwe. Awakrononhîrî komo tak awahsîpînketken̂e okwe, kexe. Ero wa kexe wooxam komo apoko.

23 Ahnoro ahcinhîrî komo naar̂axe Kawtew komo yaka, amxîkîthîrî komo marha naar̂axe yîhyaka so. Amoro meero emahcira masî. Awahsîyasî rma Babiron̂a pono komo kayaritomon. On ewto pen nakn̂itîkexe apoyero rma okwe, kekn̂e Xeremias. Ero wa kekn̂e Setekiasî ya.

24 Ero yinhîrî on wara kekn̂e Setekias Xeremias ya, Taa, n̂ex ha, oroto tîtkacow ero men ekatîmra ro mak esko waipîra awehtome.

25 Anarimaw, on wara na n̂encetu antomano rin̂e komo. Xeremias yakro nîmtapota kayaritomo, kacho na n̂encetu. Ero ke ahyaka na mokyatu on wara kaxi, Ai oyakno, ahce wa mîîka kayaritomo ya? Ahce wa noro nîîka awya hara? Ahnoro rma ekatîmko amna ya. Eyamra ro mak esko amtapotachonhîrî komo awaikara amna yehtome, ketu na awya.

26 Ero wa ketaw awya on wara mak kasko yîwya so, Xonatasî mîn yaka cma re ow ahrura masî. Iito oyexitaw kwaihyas okwe, wîîkekn̂e yîwya, kasko yîwya so, kekn̂e kayaritomo. Ero wara kekn̂e Xeremias ya.

27 Ero yinhîrî tak mokyatken̂e rma antomano rin̂e komo Xeremias yaka. On wara ketken̂e yîwya, Ahce wa mîîka kayaritomo ya? Ahce wa noro nîîka awya hara? ketken̂e yîwya. Ero ke kayaritomo kekn̂e yîwya ero wa kachonho yaw roro mak kekn̂e Xeremias yîwya so. Miyan poko rma kahra xatken̂e yîwya. Kayaritomo yakro yîmtapotachonhîrî yentan̂e exihra ro mak xakn̂e anarî komo.

28 Ero yinhîrî iito rma xakn̂e Xeremias kayaritomo kurun komo roron pono yaw, mîîmo yaw. Iito xakn̂e Xerusaren pona xa sowtatu komo mohtopo pona roro. Iito rma xakn̂e Babiron̂a pono komo mokyataw iina. Ero wa xakn̂e Xeremias.