Ero yinhîrî on wara tak xakn̂e Nabukotonoso, Babiron̂a pono komo kayaritomon, Setekias n̂iir̂akn̂e Xuta yepamtho komo kayaritomon me. Xosias pen mumutho mîk xakn̂e Setekias. Kon̂ias yemtaka n̂iir̂akn̂e noro kayaritomo me, Xeoiakin mumuru yemtaka ha.

2 Wara rma Kporin komo mtapotachonho ponarora ro makî tko xakn̂e noro hara okwe. Iito xakn̂e Xeremias, weronomano rin̂e ha. Kporin komo mtapotarî cma re n̂entamexpekn̂e yîwya. Wara rma ero ponarora xakn̂e. Ero ponarora marha xatken̂e noro maywen kom hara okwe. Ahnoro Xuta rowon pono komo xatken̂e ero ponarora okwe.

3 Ero yinhîrî tak tmaywen komo n̂en̂epekn̂e Setekias yîhyaka, weronomano rin̂e yaka, Xukaw Seremias, Sopon̂ias Maaseias, tîmsom pokono mîkî, n̂examro tî n̂en̂epekn̂e. On wara kacho tî n̂ekatîmyatken̂e kayaritomo mtapotarî yîwya, Apa, oroto rma cma re ka mîmtapowasî Kporin komo yakro, ponaro kehtopo komo yakro ha. Amna cma re mukurunpes Apa, mîîkesî cma re yîwya, kacho tî n̂ekatîmyakn̂e yîwya.

4 Ero yimaw ka tanme ro mak n̂etar̂akn̂e Xeremias ewto pono komo chere. Ahrura rma ka xatken̂e.

5 Ero yinhîrî takî tî Paraw sowtatun komo mokyatken̂e Exitu poi mer̂pono pîn komo. Ero yimaw Kawtew komo xatken̂e Xerusaren twamtoso. Ewto pono komo yar̂ma xe tî xatken̂e. Exitu pono komo mohtopo yencetaw tko Xerusaren wamton̂enhîrî komo cetken̂e hara anana.

6-7 Ero yimaw Kporin komo nîmtapowakn̂e xa hara Xeremias yakro. On wara kekn̂e yîwya, On wara wîîkes Ow Aporin komo, ponaro Ixaw Yana komo yehtopo, on wara kasko Xuta komo kayaritomon ya, Kporin komo yakro cma re mîmtapowas amna poko, kacho yentamexpon̂e komo ya, On wara men naxe Paraw sowtatun komo, Exitu poi mohce awakronomaxi so n̂examro tak cexe hara. Exitu pona n̂etîramexe hara cekenî ro komo pona hara.

8 Ero yinhîrî mokyaxe xa hara Kawtew komo oona. On pono komo yakro n̂etar̂mexe. Ewto tak nahsîyaxe. Mîîmo mko tak nakn̂iyaxe on pononho penî mko okwe.

9 On wara men kesî Kporin komo awya so, esemîknopora ro mak men ehcoko. Eroromero cet ham okre Kawtew komo kîhyai so, kahra ehcoko. Eroromero tohra ro mak men wa naxe okwe.

10 Ahce wa na matu Kawtew sowtatun komo yakro awetar̂metaw so ketaw ha re iyopono me so cehso ro? Iito rma tak na nat ha re paraxkaxapu komo re mak tîmîn komo yaw. Ero wara rma exitaw so ketaw ha re en̂exa rma men mokyaxe noro yipu komo rma ewto yakn̂iso okwe. Ero wa men yîhtînocoko, kasko Xuta yepamtho komo kayaritomon ya, kekn̂e. Ero wa kekn̂e Kporin komo owya.

11 Ero yinhîrî tak on wara xakn̂e hara Xeremias. Kawtew sowtatun komo ka cetken̂e Xerusaren wamton̂enho komo. Paraw sowtatun komo pona tî n̂eraswatken̂e. Ero ke tî cetken̂e hara.

12 N̂examro toche Xerusaren poi cekn̂e cma re Xeremias Benxamin rowon pona. Tmararîn yahsîso cekn̂e Benxamin yepamtho komo chewno yahsîso.

13 Benxamin komo metatan yaro cetaw iito xakn̂e kayaritomo kurunu ro komo yantoman̂e. Xerias tî mîk xakn̂e noro yosotî. Seremias mumuru tî mîk xakn̂e, Anan̂ias parî tî. Xeremias pen tak nahsîyakn̂e Xerias okwe, weronomano rin̂e pen ha. On wara kekn̂e yîwya, Mîîcesî Kawtew komo yakrono me tak ehso kica, kekn̂e yîwya.

14 Pîra ro mak, kekn̂e yîwya. Kawtew komo yakrono me ehso tohra ro mak wasî, kekn̂e. Yîmtapotarî yentara ro makî tko xakn̂e Xerias. Xeremias pen nahsîyakn̂e rma okwe. Antomano rin̂e komo yaka naar̂akn̂e.

15 Xeriasî mtapotarî yentache nîrwonatken̂e antomano rin̂e komo Xeremias poko okwe. N̂etapetken̂e oko. Ero yinhîrî nahruyatken̂e Xonatas mîn yaka, karita mewren̂e ro mîn yaka. Ero rma tî n̂iir̂atken̂e ahruno ritopo me. Ero ke iina Xeremias pen nahruyatken̂e.

16 Iina nahruyatken̂e mîîmo yaka ahtoxapu yaka xa. Iito xakn̂e mer̂pora kaamo okwe.

17 Ero yinhîrî tmaywen komo n̂en̂epekn̂e Setekias Xeremias yahrunkachome. Tîmîn yaka rma tî n̂ekpekn̂e. Iito nîmtapowakn̂e cewyaro noro yakro, en̂epa me mak. On wara kekn̂e yîwya, Ai oyakno, Kporin komo mtapotarî yentara mîxakn̂e kpokono kom ha? kekn̂e owya. Wencekn̂e rma, kekn̂e yîwya. On wara kekn̂e Noro apoko, Babiron̂a pono komo kayaritomon ya tî awahsîpe Noro okwe, kekn̂e yîwya.

18 Ero yinhîrî on wara kekn̂e hara Xeremias kayaritomo ya, Setekias ya, Kicicme ma re wîxakn̂e apoko, amaywen komo poko, tooto komo poko marha? Ahce wa oyehtoponho yanme ow mahrui okwe? kekn̂e yîwya.

19 Ahto wa nat awya aweronoman̂enhîrî kom hara. On wara mexe ketken̂e n̂examro awya, Babiron̂a komo kayaritomon awakro so etar̂mara nas amn̂e, on roowo yahsîra marha nasî, ketken̂e awya. Ahto tak nat ero wa kan̂enho komo oroto?

20 Apa, omtapotarî cma re mencesî. Yiixe oyehtopo cma re wekatîmyasî awya. Xonatas mîn yaka cma re ow en̂epera xa hara mas okwe karita mewren̂e ro mîn yaka ha. Iito oyexitaw kwaihya tak na okwe, kekn̂e yîwya.

21 Ero ke on wara tî kekn̂e Setekias sowtatu komo ya Xeremias poko, Moso ahrucoko okurun komo roron pono yaka mîîmo yaka. Noro iyurmacoko enmar̂atîxera kuuru yain̂e ro komo naitho ke. Ero wa iyurmacoko ewto pono cenatîso ro kuuru komo, kekn̂e. Ero ke iito tak xakn̂e Xeremias kahrutopo roron pono yaw hara, waaca yaw. Ero wara xakn̂e Xeremias pen okwe.