1-2 Ero yinhîrî Kporin komo mtapotarî n̂encekn̂e xa hara Xeremias. 4 cimn̂ipu xakn̂e kayaritomo me Xeoiakin yehtoponho. Xuta komo kayaritomon mîk xakn̂e Xeoiakin, Xosias pen mumutho. On wara kekn̂e Kporin komo yîwya ero yimaw, Ai, Xeremias, karita ahsîko. Ero yaka tak mewreko omtapotarî, awya wîîkekn̂e ero ahnoro mewreko. Ixaw Yana komo yen̂ekacho pokono mîn omtapotarî, Xuta komo yen̂ekacho pokono marha, mîk hak rowon pono komo yen̂ekacho pokono marha. Ahnoro omtapotarî mewreko, wîîkekn̂e awya pahxa Xosias pen yehtoponho n̂ixa rono rma mewreko.

3 On wara tko na natu Xuta komo, ahnoro tîwîrîmacho komo n̂encetu, ero rma ekî xe wasî iipo so. Ero yentache tak kicicme cehtoponhîrî komo yai na n̂etowyatu. Ero yai etowche so kicicme ehtoponhîrî komo tak wîhcamnoyasî, akpîra ehtoponhîrî komo marha, kekn̂e Kporin komo owya.

4 Ero ke Baruke nan̂ikyakn̂e Xeremias, N̂erias mumuru. Tmokuche noro tak mewrekn̂e karita poko. Xeremias ya kekn̂e Kporin komo ero rma mewrepekn̂e noro Baruke ya.

5 Ero yinhîrî tak on wara wîîkekn̂e Baruke ya, Tahruso thakwa was tan okwe. Kporin komo mîn yaka tohra thakwa was okwe.

6 Ero ke amoro cma re mîîcesî iina on yîmtapotareso karita, oyanme anmewrethîrî yîmtapotareso ha. Kporin komo mtapotarî rma on ha. Amn̂e eseresmara kehtopo komo me tak n̂enmayasî. Ero po tak iina etoko Kporin komo mîn yawno komo n̂entarî me yîmtapotareso. Ero yîmtapotareko ahnoro Xuta komo n̂entarî me. Mîn hak ewto pono komo mokyaxe iina n̂examro n̂entarî me yîmtapotareko.

7 Anarimaw Kporin komo yakro na nîmtapowatu tîpînîn yaw so cehtopo komo poko. Kicicme cehtoponhîrî komo yai tak na n̂etowyatu. Mer̂pora ro mak tîrwon n̂ekatîmyakn̂e Kporin komo on roowo pono komo yîwîrîmacho poko, kekn̂e Baruke ya.

8 Ero ke Xeremiasî mtapotachonho yaw roro rma tak tî n̂iir̂akn̂e Baruke. Kporin komo mîn yaw rma tî nîmtapotarekn̂e karita, Kporin komo mtapotarî. Ero poko tî xakn̂e Baruke ero yimaw iito.

9 Ero yimaw 5 cimn̂ipu xakn̂e kayaritomo me Xeoiakin yehtoponho, Xosias pen mumutho yehtoponho ha. 9-nhîrî nuun̂i po eseresmara ehtopo komo me tak xakn̂e, Kporin komo ponaro xa cehtome so eseresmara xatken̂e. Ero wa xatken̂e ahnoro Xerusaren pono komo, Xuta yewton pono komo marha, Xerusaren pona mohxapu kom ha.

10 Ero po tak karita nîmtapotarekn̂e Baruke, Xeremiasî mtapotarî. Kporin komo mîn yaw rma nîmtapotarekn̂e, Xemarias Sapan mumuru yamtakpon yaw. Kaan karitan mewren̂e ro mîk xakn̂e Sapan. Kaan mîn roron pono mîn xakn̂e Xemarias yamtakpon, îh po ha. Kaan mîn metatan mîtwono marha mîn xakn̂e. Iito karita nîmtapotarekn̂e Baruke ahnoro mohxapu komo n̂entarî me. Ero wa tî xakn̂e Baruke ero yimaw.

11 Ero yimaw Mikaias tak n̂encekn̂e Kporin komo mtapotachonho, karita yaw tmewreso xakn̂e ero. Xemarias mumuru mîk xakn̂e Mikaias, Sapan parî ha.

12 Entache kayaritomo yaka takî tî cekn̂e. Karita mewren̂e ro yamtakpon yaka tî n̂ewomyakn̂e. Iito tî xatken̂e antomano rin̂e komo ahnoro. Ceremaxi so tî xatken̂e. Iito xakn̂e Erisama, karita mewren̂e ro mîk, Teraias Semaias, Ewnatan Akbo, Xemarias Sapan, Setekias Anan̂ias, ahnoro xatken̂e iito re antomano rin̂e kom ha.

13 Iina cewomuche tîn̂entathîrî n̂ekatîmtîkekn̂e Mikaias yîwya so. Baruke nîmtapotarekn̂e karita Kaan mîn yawno komo n̂entarî me ero n̂ekatîmtîkekn̂e yîwya so.

14 Ero wa entache Xewci takî tî n̂en̂epekn̂e antomano rin̂e komo, N̂etan̂ias mumuru. Seremias mumuru tî mîk xakn̂e N̂etan̂ias, Kuusi parî ha. Baruke yaka tî noro n̂en̂epekn̂e. On wara kacho tî n̂entamexpekn̂e yîwya, Karita eeko awemyaw, mohxapu komo n̂entarî me mîmtapotarew ero eeko amna yaka hara, kacho tî n̂entamexpekn̂e. Ero ke karita nahsîyakn̂e Baruke, yîhyaka so tak naar̂akn̂e.

15 Mokuche on wara tî ketken̂e antomano rin̂e komo yîwya, Ai oyakno, oona cma re ka meremesî. Ero karita cma re mîmtapotaresî amna n̂entarî me hara, ketken̂e tî yîwya. Ero ke karita nîmtapotarekn̂e Baruke yîn̂entarî komo me.

16 Karita yawno yentatîkache etwece takî tî n̂een̂atken̂e iitono komo. N̂eraswatken̂e takî tî. On wara tî ketken̂e Baruke ya, On karita yaw nasî tmewreso ero men amna n̂ekatîmyasî kayaritomo ya, ketken̂e tî.

17 On wara tko ketken̂e hara Baruke ya, Ahce wa ero wa mîhtînoi karita yaka mewretopo awya kopi? Xeremiasî mtapotachonho xa mîn ha? ketken̂e tî Baruke ya.

18 Nhnk, kekn̂e tî Baruke yîwya so, Xeremiasî mtapotachonho rma on. N̂ekatîmyakn̂e owya. Ero ke on karita yaka ow mewrekn̂e mewretopo ke mak, kekn̂e tî yîwya so.

19 Ero yinhîrî on wara tî ketken̂e antomano rin̂e komo Baruke ya, Amyamro eseyamtatko Xeremias yakro. Anarî komo ya ekatîmra ro mak men ehcoko aweseyamtopo komo yîhtînopîra ahtome so, kekn̂e tî yîwya. Ero wa tî ketken̂e Baruke ya.

20 Ero yinhîrî karita tî n̂iir̂akn̂e Erisama yamtakpon yaka, karita mewren̂e ro yamtakpon yaka. Iina ciriche cetken̂e takî tî antomano rin̂e komo kayaritomo yaka, tamtakpon yaw exitaw. Yîwya tî n̂ekatîmyatken̂e Xeremias karitan yîmtapotarechonho Baruke ya.

21 Ero ke Xeuci tî n̂en̂epekn̂e kayaritomo karita wece. Ero ke n̂ekyakn̂e takî tî noro Erisama yamtakpon yawnonho. Ekîche kayaritomo n̂entarî me takî tî nîmtapotarekn̂e. Ero yencetaw kayaritomo ya noro panaw tî n̂ecececetken̂e antomano rin̂e komo.

22 9-nhîrî nuun̂i po tî ero wa xatken̂e. Cwotu yimawno yaw tî xakn̂e kayaritomo ceremaxi mîîmo yaw. Wehto tî xakn̂e ero yekenî ro po kayaritomo yeepataw.

23 On wara tko tî n̂iir̂akn̂e kayaritomo, karita yîmtapotaretopo ka n̂encekn̂e, 3 yîraconhîrî wicakî mak ha ka, 4 yîraconhîrî wicakî anarimaw. Ero wicakî so entache entaxapu nawocekn̂e kayaritomo mewren̂e ro cayin ke. Awotoche nar̂mekn̂e kr̂a wehto cheka okwe. Ero yinhîrî ero wa xa marha tî n̂iir̂akn̂e roro karita pen takn̂itîkaxi ro okwe.

24 Erasîra ro makî tko tî xakn̂e kayaritomo karita yakn̂iyataw. Erasîra marha tî xatken̂e noro maywen komo. Encetaw so rma erasîra tî xatken̂e. Tponon komo tî ahxaikara xatken̂e.

25 On wara tko tî kekn̂e Ewnatan kayaritomo ya, Apa, karita cma re akn̂ipîra masî, kekn̂e tî. Ero wa xa marha tî ketken̂e Teraias, Xemarias komo. Yîmtapotarî komo yentan̂e pîn wara rma tko tî xakn̂e kayaritomo okwe.

26 Nîmtapowakn̂e xa matko kayaritomo Xerameew Amareke yakro. On wara tî kekn̂e yîwya so, Baruke ahsîtatko karita mewren̂e ro. Xeremias yakro rma ahsîtatko, weronomano rin̂e mîk noro ahsîtatko, kekn̂e tî yîwya. Seraias Asîriew kkomo marha tî nantomekn̂e Xerameew yakronomacho poko, Seremias Abtew marha. Ero ke tî cetken̂e n̂examro Xeremias komo yahsîso. Enîhra rma tko tî xatken̂e. N̂examro tî n̂eyamyakn̂e Kporin komo. Ero wa tî xatken̂e.

27 Ero wa tî karita nakn̂iyakn̂e kayaritomo. Baruke nmewretho mîn nakn̂iyakn̂e, Xeremias mtapotachonho mewrexapu ha. Ero yinhîrî Xeremias yakro tak nîmtapowakn̂e xa hara Kporin komo.

28 On wara kekn̂e yîwya, Ai, Xeremias, anarî tak ahsîko hara karita. Ero yaka mewreko ahnoro omtapotarî yihcithîrî yaw xakn̂e ero wa kacho. Xeoiakin nakn̂iyakn̂e, Xuta komo kayaritomon, ero retawno yaka mewreko xa hara ero wa kachonho xa marha.

29 On wara marha kasko Xeoiakin ya, Xuta yepamtho kayaritomon ya, On wara kesî Kporin komo awya, Karita makn̂iye okwe. On wara mîîkekn̂e owya, Ahce kacho ero yipu mîmewrekn̂e karita yaka kica? On wara mîmewrekn̂e, Mokyasî men Babiron̂a komo kayaritomon. On roowo nîwîrîmesî ro mak okwe. Tooto yeken pînî ro me tak on n̂iir̂asî, okno yeken pîn me marha, kacho mîmewrekn̂e kica, mîîkekn̂e owya, kasko yîwya, kayaritomo ya.

30 Ero ke on wara kesî Kporin komo Xeoiakin poko, Xuta komo kayaritomon poko, Tapi pen retawno me exihra ro mak tak naxe noro yepamtho komo. Cewn̂e n̂hema exihra nasî kayaritomo me. Noro pen yokoputho nar̂mexe kr̂a amn̂e waapa komo roowo pona. Kaamo n̂ipikarî me kr̂a nasî katpanaw, cicakî yapon me nasî kosope hara.

31 Noro pen wemetanmekyasî, yîhyawno komo poko marha, noro maywen komo poko marha. Kicicme ehtoponhîrî komo yanme wemetanmekyasî. N̂examro ya cma re wîîkekn̂e, Awîrîmacho komo men wekmexpesî, Xerusaren pono komo yîwîrîmacho, ahnoro Xuta komo yîwîrîmacho, wîîkekn̂e. Omtapotarî ponarora ro makî tko xatken̂e okwe. Ero ke omtapotachonho yaw roro rma tak men wekmexpetîkesî yîwîrîmacho komo okwe, kesî Kporin komo.

32 Ero yinhîrî anarî tak nahsîyakn̂e xa hara Xeremias karita. Baruke ya tak nîmyakn̂e, karita mewren̂e ro ya. Ero poko tak mewrekn̂e noro yîmtapotarî xa hara. Ahnoro mewrekn̂e Xeoiakin nakn̂iputho yaw xakn̂e ero yaw roro rma mewrekn̂e. Ero wa kacho nîhremekn̂e hara mer̂pono pîn ke hara. Ero wa mewrekn̂e Baruke, Xeremiasî mtapotachonho xa hara.