1-2 Taa, pahxa n̂he Kporin komo mtapotarî n̂encekn̂e Xeremias. Xeoiakin xakn̂e Xuta komo kayaritomon me, Xosias pen mumutho, ero yimaw wencekn̂e. On wara kekn̂e yîwya, Ai, Xeremias, etoko Hekabe pen yepamtho komo yaka. N̂examro yakro amtapotakî. Aporin komo mîn yaka n̂examro eeko, amtakpo yaka. Iito tak n̂examro wokpakî uupa yukun ke, kekn̂e Kporin komo owya.

3 Ero ke Xasan̂ias waar̂akn̂e oyakro. Xeremias mumuru mîk xakn̂e Xasan̂ias, Abasin̂ias parî. Xasan̂ias yakno komo marha waar̂akn̂e, yumumuru komo ahnoro, Hekabe pen yepamtho komo ahnoro waar̂akn̂e.

4 Kporin komo mîn yaka waar̂akn̂e, Anan mumuru komo yamtakpon yaka. Kaan ponarono xa mîk xakn̂e Anan, Xiktarias mumuru ha. Antomano rin̂e komo yamtakpon mîtwono mîn xakn̂e amtakpo. Maaseias yamtakpon yepoi xakn̂e. Kaan mîn metatan yenîn̂e mîk xakn̂e Maaseias, Sarun mumuru ha.

5 Iito exitaw so amna Hekabe yepamtho komo wokru wetakekn̂e uupa yukun. Parakwe yaw so wetakekn̂e. Parakweci marha wetakekn̂e eetopo yîwya so. Ehe, on ha awokru komo uupa yukun, wîîkekn̂e yîwya so.

6 On wara tko oyeyukyatken̂e, Uupa yukun yerîhra ro mak nas amna. On wara kekn̂e apapa pen Xonatabe, Hekabe pen mumutho, amna ya, Uupa yukun yerîhra ro mak men ehcoko amyamro, amumuru komo marha erîhra n̂ehcowpe amn̂e miya roro ha.

7 Amîn komo marha cirihra ehcoko, ayporî komo marha cirihra ehcoko, anatîrî komo marha cirihra ehcoko uupa yatî. Ero yipu yosom me exihra ro mak men ehcoko. Roona warai yaw so mak ehcoko pahkî ro mak awehtome so waipîn me, on roowo po awehtome so pawana warai me pahkî, kekn̂e amna ya.

8 Ero ke apapa penî mtapotachonho n̂ewehcas amna. Xonatabe pen mîk xakn̂e, Hekabe pen mumutho ha. Yîmtapotachonhîrî rma n̂ewetîtîkes amna. Uupa yukun yerîhra ro mak nas amna tîmrenai ro rma. Amna, amna pici komo, amna mumuru komo, amna yemsîrî komo, ahnoro amna erîhra nasî uupa yukun.

9 Tîmîn marha amna cirihra nasî yaw amna yehtopo. Amna natîrî exihra marha nasî uupa yatî, amna mararîn exihra ro mak nasî. Naatî yatho exihra ro mak nas amna yaw.

10 Roona warai mak nas amna mîn me. Apapa penî mtapotachonho amna n̂ewetîtîkesî, Xonatabe penî mtapotachonho ha.

11 On wara tko kekn̂e amna Nabukotonoso mokuche oona, Kaikatko Xerusaren pona. Kwaparî komo men mîkyam sowtatu komo kopi, Kawtew komo, Siriu komo marha. Ero ke tantono me tak nas amna Xerusaren pono me, ketken̂e.

12-13 Ero yinhîrî Kporin komo mtapotarî n̂encekn̂e xa hara Xeremias. On wara kekn̂e yîwya, On wara wîîkes Ow Aporin komo, ponaro Ixaw Yana komo yehtopo ha, On wara kata Xuta yepamtho komo ya, Xerusaren pono komo ya marha, Ai oyakno komo, on wara kesî Kporin komo awya so, Owya apanatanmetopo komo yenta xera ma matu amyamro reha okwe? Omtapotarî yewetîra ro mak mat okwe, ahce kacho hara?

14 Pahxa tumumuru komo nîtwermekn̂e Xonatabe, Hekabe pen mumutho. Uupa yukun yerîhra ro mak ehcoko, kekn̂e tî yîwya so. Yîmtapotachonhîrî yaw roro rma naxe okre. Tîîmînhîrî penî mtapotachonho n̂ewehcaxe. Owî tko kîmtapotai awakro so. Pahxaxaro so kîwcekn̂e awakro so omtapotachome. Omtapotarî yewetîra rma tko maxe okwe amyamro reha.

15 Emapona roro oyanton komo ahnoro wen̂epekn̂e ahyaka so aweronoman̂e komo. On wara kacho wentamexpekn̂e awya so, Kicicme awehtoponhîrî komo yai etowcoko. Kir̂wan̂he mak tak ehcoko. Ponaro anarî yana komo yehtopo pokohra ro mak ehcoko. Noro yipu komo ya tîmsom tîmîhra ehcoko. Ero wa exihra awexitaw so tak on pono ro me tak maxe okre. Awya so on wîmyakn̂e roowo, aporin pen komo ya marha, ero pono ro me tak maxe. Omtapotarî ponarora ro makî tko mîxatken̂e. Oyewetîra marha mîxatken̂e okwe.

16 Tîîm penî mtapotachonho n̂ewehcaxe reha Xonatabe Hekabe pen mumutho komo mtapotachonho. Ero wa exihra ehcoko, kachonho n̂ewehcaxe. Omtapotachonho tko ewetîra reha maxe amyamro oyanan komo.

17 Ero ke on wara kesî Kporin komo, kantoman̂e ro, ponaro Ixaw Yana komo yehtopo, Xuta yepamtho pen komo yîwîrîmacho wekatîmyakn̂e yîwya so, Xerusaren pono komo yîwîrîmacho marha. Ero ke ero wara omtapotachonho yaw roro rma men wiir̂as amn̂e okwe. Ero wara rma wiir̂asî omtapotarî yentara exirî ke so. Ai, oyanan komo, kîmtapowasî awakro so, wîîkekn̂e roro yîwya so. Oyeikura ro makî tko xatken̂e kica. Ero ke yîwîrîmacho komo wekmexpesî, kesî Kporin komo awya so, kata yîwya so, kekn̂e Kporin komo Xeremias ya.

18 Ero yinhîrî on wara kekn̂e Xeremias Hekabe yepamtho komo ya, On wara kes awya so Kporin komo, kantoman̂e ro, ponaro Ixaw Yana komo yehtopo, Kir̂wan̂he ween̂asî awya so apapa penî mtapotachonho yewetîtopo awya so, Xonatabe mtapotachonho yewetîtopo. Ahnoro yîmtapotachonhîrî mewetîtîkexe okre.

19 Ero ke on wara kesî Kporin komo awya so, Xonatabe pen yepamtho komo yehcamnopîra ro mak naxe miya roro. Omîtwo roro naxe noro pen yepamtho komo miya roro, kesî. Ero wara kesî Kporin komo.