Ero yinhîrî nîmtapowakn̂e xa hara Kporin komo Xeremias yakro. On wara tî xatken̂e Nabukotonoso komo tîsowtatun komo yakro, n̂etar̂metken̂e Xerusaren pono komo yakro. Babiron̂a pono komo kayaritomon n̂etar̂mekn̂e, noro sowtatun komo marha n̂etar̂metken̂e. Yaake kayaritomo komo xatken̂e noro maywen me rma ha re anarî yana kom ha. N̂examro maywen komo marha n̂etar̂metken̂e ahnoro Xerusaren pono komo yakro. Xuta komo yewton pono komo yakro marha n̂etar̂metken̂e. Ero yimaw rma nîmtapowakn̂e Kporin komo Xeremias yakro.

2 On wara kekn̂e yîwya, Ai Xeremias, etoko Setekias yaka, Xuta komo kayaritomon yaka. On wara kasko yîwya, On wara men kesî Kporin komo awya, On ewto pono komo men war̂mapesî Babiron̂a komo kayaritomon ya. Ahnoro mîîmo pen nakn̂itîkes okwe tantono mko.

3 Emahcira mas amoro. Awahsîyaxe, awar̂axe Nabukotonoso yaka. Noro yewru rma meen̂asî, Babiron̂a pono komo kayaritomon yewru ha. Awakro xa nîmtapowasî. Ero yinhîrî Babiron̂a pona mîîces okwe.

4 Omtapotarî rma tko entakî amoro Setekias, Xuta yepamtho kayaritomon, on wara wîîkes Ow Aporin komo apoko, kacipara imo nparaxkatho me waipîra reha mas amoro.

5 Eserepokara mak mîwaiyasî. Awaipuche kotoporem nakn̂iyaxe aponaro cexirî ke so. Apînîn yaw nîwracexe, Apapa pen okwe, kexe. Ero wa men kexe. Owî rma ero wara kîmtapowas apoko, kesî Kporin komo, kata Setekiasî ya, kekn̂e Kporin komo Xeremias ya.

6 Ero ke tak Setekias yaka cekn̂e Xeremias, weronomano rin̂e mîk cekn̂e. Kporin komo mtapotarî n̂ekatîmtîkekn̂e yîwya. Xerusaren po rma kekn̂e yîwya.

7 Ero wa kekn̂e Xeremias Setekias ya Xerusaren pono komo yakro etar̂metaw Nabukotonoso sowtatun komo. Xuta yewton pono komo yakro marha n̂etar̂metken̂e etîmtoxapu komo yakro. Rakis pono komo yahsîra ka xatken̂e, Aseka pono komo marha ahsîra. Twacayem mîn xakn̂e ewto mko. Ero mko mak tak xakn̂e Babiron̂a pono komo nahsîtho pîn ha ka. Ero yimaw ero wa kekn̂e Xeremias Setekias ya.

8 Ero yinhîrî tak nîmtapowakn̂e xa hara Kporin komo Xeremias yakro. Pahxa n̂he ka nîmtapowakn̂e Setekias Xerusaren pono komo yakro. Tanton komo yahsîpînkacho poko nîmtapowakn̂e.

9 On wara kekn̂e yîwya so, Ai oyakno komo, awanton komo naxe okwe Ebrew komo rma. Kîrkomo naxe, wooxam komo marha naxe. Ero wa naxe awanton komo Xutew komo rma, apoyino kom ha. Noro yipu komo exihra ro mak cexpore nasî ahyaw so etowîn me ro mak. Ero ke noro yipu komo ahsîpînkacoko, kekn̂e yîwya so.

10 Ero ke yîmtapotarî n̂encetken̂e antomano rin̂e komo, ahnoro Xerusaren pono komo. Ahsîpînkacoko awantonînhîrî komo. Kîrkomo ahsîpînkacoko, wooxam komo marha, kacho n̂encetken̂e, etowîn me ro mak antomara tak ehcoko, kacho ha. Taa, ero wa ham, noro yipu komo nahsîpînkes amna, ketken̂e. Ero ke nahsîpînketken̂e tantonînhîrî komo, kîrkomo, wooxam komo marha.

11 Ero yinhîrî tko anarme n̂esehtînoyatken̂e hara okwe. Tantonînhîrî komo nahsîyatken̂e xa hara kica kîrkomo, wooxam komo marha. Ahsîpînkaxapunhîrî komo nahsîyatken̂e hara okwe. Etowîn me ro mak nantometken̂e xa hara kica.

12-13 Ero ke nîmtapowakn̂e xa hara Kporin komo Xeremias yakro. On wara kekn̂e yîwya, On wara wîîkes Ow Aporin komo, pahxa kîmtapowakn̂e aporin pen komo yakro. Oyewehcataw awya so kakronomexe so, kacho poko kîmtapowakn̂e. Exitu poi n̂examro pen wekyakn̂e, Exitu pono komo yanton me ehxapunhîrî n̂examro wowyakn̂e, etowîn me ro mak antomaxapunhîrî ha. Ero yimaw rma kîmtapowakn̂e n̂examro pen yakro.

14 On wara wîîkekn̂e yîwya so, Anarimaw apoyino komo rma na mahsîyatu awanton komo me. Ebrew rma na mahsîyatu, epethîrî pona na mahsîyatu. Noro yipu yahsîyataw, 6 cimn̂ipu yenatîche tak awanton me ehtoponhîrî tahsîpînkapore nas hara. 7-nhîrî po tahsîpînkapore nasî cimn̂ipu po, wîîkekn̂e cma re yîwya so. Omtapotarî tko ewetîra xatken̂e aporin pen komo okwe. Omtapotarî ponarora ro mak xatken̂e okwe.

15 Kokon̂oro tak amyamro mesehtînoyatken̂e anarme. Takîhso ka keen̂atken̂e so. Etocoko tak awanme ro so, mîîketken̂e apoyino komo ya okre. On wara marha mîîketken̂e omîn yaw, oyosoken yaw rma. Oyepatai rma mîîketken̂e. Tpoyino komo yahsîra ro mak tak nas amna tanton me, mîîketken̂e okre.

16 Ero yinhîrî metaknametken̂e hara okwe. Oyosotî mîwîrîyakamexpetken̂e hara kica tooto komo ya. Awantonînhîrî komo mahsîyatken̂e xa hara kica kîrkomo, wooxam komo marha. Awanme ro so mak tak etocoko, awantomara so tak nas amna, mîîketken̂e cma re ka. Ero yinhîrî mahsîyatken̂e xa hara kica etowîn me ro mak ehtome so awanton me so xa hara. Kîrkomo mahsîyatken̂e hara, wooxam komo marha kica.

17 Ero ke on wara kesî Kporin komo awya so, Omtapotachonho yewetîra mîxatken̂e kica. Awanme ro so mak etocoko, kahra mîxatken̂e awakno komo ya, amîtwono komo ya marha. Ero ke Ow tak kahsîpînkexe so kacipara imo nparaxkarî me awehtome so, eper̂a nahsîrî me awehtome so, rooma pokono me awehtome so marha, ero yipu nahsîrî me awehtome so kahsîpînkexe so okwe. Mîk hak kayaritomo komo nahsîrî me ken̂epexe so, roowo poko hakno komo nahsîrî me. Iito awexitaw so awahwokacho komo chewno ro me kiir̂axe so okwe.

18-19 Owya apanatanmetopo komo yanwekn̂e amyamro kica. Amyamro rma re ka mîmtapowatken̂e awantonhîrî komo yahsîpînkacho poko. Ow metahcatken̂e yaaro xa entamexpotome amtapotarî komo. Paaka xîkrî marha mîraconketken̂e. Yîraconhîrî yotari mîîcetken̂e, Yaaro xa tan kîmtapowasî towîhnî me ro mak, kachome ero wa mîîcetken̂e. Ero wa mîîketken̂e antomano rin̂e komo, ewnuku komo, tîmsom pokono komo, ahnoro on roowo pono komo.

20 Ero ke kahsîpexe so ero wara kan̂enhîrî komo, aaxatî pîn komo ya kahsîpexe so, awaparî komo ya. Kwacinama yotî me tak nas apunthîrî komo, kamara komo yotî me marha.

21 Setekias pen marha wahsîpesî yiixatî pîn komo ya, Xuta komo kayaritomon pen. Ero wara marha wiir̂asî noro maywen komo, antomano rin̂e kom ha. Waparî komo ya wahsîpesî. Babiron̂a pono kayaritomon sowtatun komo ya wahsîpesî, ahyai so toxapunhîrî komo ya ha.

22 On wara tko kesî Kporin komo, N̂examro wan̂ikyas hara. On ewto pona wekmexpes hara. Tantono komo yakro n̂etar̂mexe. Awewtonthîrî komo nahsîyaxe. Amînthîrî komo nakn̂iyaxe. Wermonho me ro mak tak wiir̂asî ahnoro Xuta yepamtho komo yewtontho pen. Pohnî me ro mak wiir̂asî, kesî. Ero wara kesî Kporin komo awya so, wîîkekn̂e iitono komo ya.