Ero yinhîrî tak Xeremias yakro nîmtapowakn̂e xa hara Kporin komo tahruso exitaw, kahrutopo roron po exitaw. Asakî ro tak xakn̂e noro yakro yîmtapotachonhîrî iito exitaw.

2 On wara kekn̂e yîwya, On wara wîîkes Ow Aporin komo, Owî rma ero wara ciino rin̂enho. Omtapotachonho yaw roro rma ciino wiir̂akn̂e. Aporin komo, kacho Ow oyosotî.

3 Oyakro amtapotakî yiixe awehtopo poko. Keyukyasî rma. Awya wenpesî aweserepokacho, enîhnînhîrî mko tak wenpes awya, anîhtînorî pîn ha.

4 On wara wîîkes Ow Aporin komo, ponaro Ixaw Yana komo yehtopo ha. Mîîmotho yixkaxapu mko poko wîîkesî, on ewto pononho poko. Xuta kayaritomon mîntho mko poko marha wîîkesî yixkaxaputho poko. Erotho mko n̂ixketken̂e ewto wacan kawnoretome, ero pore kain̂em komo wahkototopo me. Kacipara ke cemyarkem komo yewomrî pona marha ewto wacan n̂ecehcetken̂e.

5 Kawtew komo yakro etar̂maxi mokyaxe ha re. Ewto mak tko nawronohkexe tokoputhîrî komo ke rma okwe. Owî rma Xuta pen komo waihkesî. N̂examro poko kîrwonasî ro mak. Kesewopon̂akn̂e mak okwe on ewto yenîhra tak oyehtome. Ero wara wasî on pono komo poko kicicme ro mak exirî ke so, kekn̂e Kporin komo Xeremias ya.

6 On wara tko on pono komo wiir̂asî, kar̂pe tak wiir̂asî, amotopîra so wiir̂asî, wehcemesî marha. Cerepore tak wiir̂asî, onoke na komo pona erasîra ro mak, omtapotarî wentamexpesî marha yîwya so.

7 Xuta yepamtho komo wekyas hara oona, Ixaw Yana komo komo marha wekyas hara waapa komo nahsîthonho. N̂examro yewton wiir̂as hara pahxan wara rma hara.

8 Kicicme ro mak xatken̂e n̂examro opoko. Ero wara ehtoponhîrî komo tko wowyasî. Oyanwekyatken̂e marha okwe. Ero wara ehtoponhîrî komo rma wîhcamnoyasî.

9 Ero yimaw tak opoko nahwowaxe mîk hak rowon pono komo miyan komo rma ahnoro. On pono komo yehtopo yentarî ke rma nahwowaxe. Kir̂wan̂he nai Kaan ham okre. Kyopono ro xa Mîk ham Kporin komo okre, kexe. Ixaw Yana komo yakronomacho n̂encexe, owya akronomacho. Ero ke twerî tak naxe opoko, tatanaxe mak cerahtîmrî ke so. Ero wa naxe on pono komo yakronomarî ke owya. Ahce na poko exitaw so ero poko oyanan komo wiir̂asî ehn̂an me ro mak. Ero wa owya ciitopo n̂encexe. Ero ke opoko twerî xa tak naxe.

10-11 On wara marha kesî Kporin komo, On wara mîîkexe on ewto poko, Pohnî me tak nas okwe. Tooto komo exihra tak naxe, okno komo marha exihra nas okwe, mîîkexe. Yaaro mîîkexe, tooto komo exihra ro mak naxe Xerusaren po, esamathîrî komo yaw exihra, okno komo meero exihra nasî. Amn̂e tko on po rma n̂esencesî xa hara tahwotaxmu komo mtapotarî, cipici yahsîn̂e komo mtapotarî, ciin̂o yahsîn̂e komo mtapotarî marha. On wara kacho n̂esencesî, Kir̂wan̂he nai ham Kporin komo okre, kantoman̂e ro. Kir̂wan Mîkro, eroromero kakronoman̂e Mîk okre, kacho n̂esencesî. Ero wara kacho nîmyaxe Kporin komo ya tokuthîrî komo puntho tîmtopo wara rma, yîmîn yaw so rma nîmyaxe. Waapa narîtho komo wekyas hara oona. Tan tak naxe, pahxa xatken̂e ero wara rma naxe hara, kesî Kporin komo.

12 On wara marha kesî Kporin komo, Oroto ka pohra nasî on ewto. Tooto komo exihra nasî tan, okno marha exihra. Pahxaro tko on po nasî xa hara oper̂a yosom mîn. Iyoh komo yetîrapotopo marha nasî. Ero wa so nasî ahnoro Xuta komo yewton po.

13 Ero yimaw tooku nukuknomexe oper̂a yosom komo. Ero wa naxe îîpî chewno komo, tuuna yecihtawno komo, suu n̂ixan pono komo, Benxamin rowon pono komo, Xerusaren mîtwono komo, Xuta yewton pono komo. Iitono komo tak tooku nukuknomexe.

14 On wara marha kesî Kporin komo, Pahxaro tak omtapotachonho yaw roro rma tak Ixaw Yana komo wakronomesî, Xuta yepamtho komo marha wakronomesî.

15 Ero yimaw Tapi peremru warai por̂mamnoyas Ow. Kir̂wan xa Noro Tapi peremru warai. Yaaro epanîno rin̂e me nasî, kir̂wan̂he mak ciino rin̂e me ha.

16 Ero yimaw towso tak naxe Xuta komo, waapa yantonînho. Erasîra marha naxe Xerusaren pono komo. On wara kacho me tak nasî Xerusaren, Kporin Komo Yeken, Kir̂wan̂he Kehtopo Yeken, kacho me.

17 On wara marha kesî Kporin komo, Tapi yepamtho exihra ro mak nas okwe, Ixaw Yana komo kayaritomon me cehsom, kacho mera ro mak nas amn̂e. Miya roro nasî noro yepamtho kayaritomo me.

18 On wara marha naxe omîn yenîn̂e komo, Repita komo marha, Noro yipu komo exihra ro mak nas okwe, kacho mera ro mak nasî. Kporin komo ya tîmsom yakn̂in̂e komo exihra nas okwe, takn̂itîkaxmu yakn̂in̂e komo marha exihra, puruma yatho tîmn̂e komo exihra okwe, iime roro kahn̂eru pun yakn̂in̂e komo exihra marha, kacho mera marha nasî. Noro yipu komo rma naxe amn̂e miya roro, kesî Kporin komo.

19-21 Ero yinhîrî nîmtapowakn̂e xa hara Kporin komo Xeremias yakro. On wara kekn̂e yîwya, Ai Xeremias, on wara wîîkes awya, Aporin komo rma Ow, pahxa kîmtapowakn̂e enmarî poko, Roowo n̂enmape roro kosope ehxapunhîrî, wîîkekn̂e. Awarpan poko marha kîmtapowakn̂e, Kosope n̂expe kokmamche roro, wîîkekn̂e. Ero wa kachonho wowya ma re awya so enmapîra ro mak tak ehtome, kosope exihra marha ehtome? Pîra ro mak. Ero wa xa marha omtapotachonho towîhra wasî, Tapi ya wîîkekn̂e ero towîhra. Oyanton mîkro Tapi. On wara wîîkekn̂e yîwya, Awepamthîrî komo naxe kayaritomo me miya roro. Exihra tak nas okwe oyanton Tapi yepamtho kayaritomo me cehsom, kacho mera ro mak tak nasî, wîîkekn̂e. Ero wa xa marha wîîkekn̂e Repita komo ya hara n̂examro yepamtho komo poko, tîmsom pokono komo ya marha ero wara wîîkekn̂e. Ero wara kachonho towîhra ro mak wasî, enmarî pokono wara rma.

22 Atî wicakî nai xir̂ko mko? Yukuknomarî yopo ro mak nasî mer̂pora ro makî. Atî wicakî nai axawa yatho cik hara tuuna imo yecihtawno? Yukuknomarî yopo xa marha nasî. Ero wicakî xa marha oyanton Tapi wepamnoyasî mer̂pora ro mak ehtome so. Ero wicakî xa marha Repita komo wepamnoyas hara, tîmsom pokono kom ha.

23-24 On wara marha kekn̂e Kporin komo Xeremias ya, Tantono komo mtapotarî mence ha na? On wara kexe, Ixaw Yana komo cma re ka nahsîyakn̂e Kporin komo, Xuta komo marha. Tîyanan me nahsîyakn̂e. Oroto tak nahsîpînkes hara okwe, kexe. Ero wara oyanan komo nîwîrîyakexe. Cehcamnosom me mak nîhtînoyaxe okwe.

25-26 On wara xa wîîkes Ow Aporin komo, Roowo n̂enmape roro, kahra katî wîxakn̂e pahxa awya so? Kosope roro n̂expe hara kokmache roro, kahra marha katî wîxakn̂e awya so? Roowo yecehtora marha wîxakn̂e omtapotarî ke, kaapu marha ecehtora wîxakn̂e ero ke rma awya so? Ero wara kan̂e pîn me oyexitaw ketaw ha re, Xako yepamtho komo re wahsîpînkesî, oyanton Tapi yepamtho komo marha re wahsîpînkesî. Noro yepamtho men̂ekara ro mak wasî Abraaw yepamtho komo kayaritomon me ehtome, Isake yepamtho komo, Xako yepamtho komo kayaritomon me ehtome ha. On wara tko wîîkesî, n̂examro yahsîpînkara xa matko wasî. N̂examro pen wekyas hara oona waapa narîtho me ehxapunhîrî. Yîpînîn yaw so tak wasî, wîîkesî. Ero wara men wîîkes oyanan komo poko, kekn̂e Kporin komo Xeremias ya.