Ero yinhîrî nîmtapowakn̂e xa hara Kporin komo Xeremias yakro, weronomano rin̂e yakro ha. 10 cimn̂ipu xakn̂e Xuta komo kayaritomon me Setekias yehtoponho. 18 cimn̂ipu reha xakn̂e kayaritomo me Nabukotonoso yehtoponho hara.

2 Ero yimaw rma Xerusaren wamcetken̂e Babiron̂a pono komo, sowtatu kom ha. Iitono komo kayaritomom n̂en̂epetho mîkyam xatken̂e. Ero yimaw marha tahruso xakn̂e Xeremias pen kahrutopo roron po. Xuta komo kayaritomon mîn yaw rma xakn̂e kahrutopo ero yaw tahruso xakn̂e.

3 Xeremias pen nahruyakn̂e Setekias, Xuta komo kayaritomon. On wara kekn̂e noro Xeremias ya ahruyataw, Ahce kacho Kporin komo mtapotarî yanmen wara mekatîmya kîwîrîmacho komo poko kica? On wara mîîkesî kica, On wara men kesî Kporin komo, On ewto wîmyasî Babiron̂a pono komo kayaritomon ya. Noro tak awar̂mexe so.

4 Emahcira thakwa nasî Setekias pen, Xuta komo kayaritomon pen. Noro pen nahsîyaxe Kawtew komo. Babiron̂a kayaritomon yaka naar̂axe. Noro yakro xa nîmtapowasî. Noro yewru rma n̂een̂asî yîmtapowataw.

5 Ero yinhîrî tak Setekias pen naar̂asî Nabukotonoso Babiron̂a pona. Iito tak nasî noro pen owya akronomacho me cehso ro tak. Kawtew Yana komo yakro rma re metar̂mexe. Iyopo so tko exihra thakwa maxe okwe, kesî Kporin komo, mîîkesî kica. Ahce kacho ero wa mîîke kica? kekn̂e. Ero wa kekn̂e Setekias Xeremias ya.

6-7 Ero yinhîrî on wara kekn̂e Xeremias, Nîmtapowakn̂e xa hara Kporin komo oyakro. On wara kekn̂e owya, Mokyasî men amn̂e aamo yakno mumuru. Anan̂eew mîk mokyasî, Sarun mumuru, aamo yakno mumuru ha. On wara kesî noro awya, Mînto nai omararîn Anatoce panaw. Ero cma re mahsîyasî amararîn me. Epethîrî pona cma re mahsîyasî. Ahsîn̂e me rma masî amoro noro re me kexirî ke, kes awya, kekn̂e Kporin komo owya.

8 Ero yinhîrî tak mokyakn̂e rma Anameew, apapa yakno mumuru. Kahrutopo roron pona mokyakn̂e ohyaka. Kporin komo mtapotachonho yaw roro rma mokyakn̂e. Tmokuche on wara kekn̂e owya, Omararîntho cma re mahsîyasî epethîrî pona. Anatoce panaw rma nasî, Benxamin rowon po rma. Ahsîn̂e me mas amoro epethîrî pona noro re me kexirî ke. Ero ke amararîn me cma re mahsîyasî, kekn̂e owya. Yîmtapotarî yentache, Kaanî mtapotachonho yaw roro rma nîmtapowa ham, wîîkekn̂e.

9 Ero ke Anan̂eew mararîntho tak wepemekn̂e ahsîtome tak owya. Anatoce po xakn̂e apapa yakno. Noro mumuru mararîntho yepetho wîmyakn̂e. Opurantan yawsîn wukuknomekn̂e epethîrî yecenarî xa tîmtome. 17 exepeyu wîmyakn̂e yîwya prata.

10 Karita yaka tak oyosotî mewrekn̂e. Mewreche een yaka wenkayakn̂e. Enkapuche, teme wîîkekn̂e tak, ahruru wahkoromekn̂e. Puranta tîmtopo yenîn̂e wan̂ikyakn̂e. N̂examro wero ro tak puranta wukuknomekn̂e awsîn yukuknomacho ke.

11 Ero yinhîrî karita wahsîyakn̂e, On wahsî on kaamo po, kacho. Enkaxapu wahsîyakn̂e, kayaritomo mtapotachonho yaw roro rma ahkoromaxapu ha. Enkan meero wahsîyakn̂e.

12 Ero mko wîmyakn̂e Baruke ya. N̂erias mumuru mîk xakn̂e Baruke, Maaseia parî. Anan̂eew wero ro rma wîmyakn̂e yîwya, apapa yakno mumuru wero ro. Epemachonho yenîn̂e komo n̂enîrî me marha wîmyakn̂e yîwya, karita poko tosotî mewren̂enho komo n̂enîrî me. Iito marha xatken̂e yaake Xutew komo kahrutopo roron po. N̂examro wero ro meero karita wîmyakn̂e Baruke ya.

13-14 Ero yinhîrî Baruke yakro kîmtapowakn̂e iitono komo n̂entarî me rma. On wara wîîkekn̂e yîwya, On wara kesî Kporin komo awya, kantoman̂e ro Mîkî, ponaro Ixaw Yana komo yehtopo Mîk kesî. On wara kesî Noro awya, On karita mko arko mararî yepetho yukuknomacho. Enkaxapu arko, enkan marha. Enkakî amn̂e tahrem yaka, er̂mo kahxapu yaka. Iito n̂expe pahkî, kesî.

15 On wara marha kesî Noro, Kporin kom ha, kantoman̂e ro, ponaro Ixaw Yana komo yehtopo, Mararî mko nahsîyaxe xa hara apoyino komo amn̂e. On roowo pono komo rma nahsîyaxe. Mîîmo mko marha nahsîyaxe, tînatîrî komo marha n̂iir̂axe uupa yatî. Ero wara naxe tantono komo rma amn̂e, kesî Kporin komo, wîîkekn̂e iitono komo ya.

16-17 Ero yinhîrî on wara wîxakn̂e karita tîmîche Baruke ya, mararî yahsîtopo pokono tîmîche, Kporin komo yakro kîmtapowakn̂e. On wara wîîkekn̂e yîwya, Apa, Kaan Amoro. On wara wîîkes awya, Kaapu yakîhton̂enho Amoro, roowo yakîhton̂enho marha. Awaporî ke rma makîhcekn̂e. Kar̂pe xa awexirî ke makîhcekn̂e. Ahce na poko awehn̂anmetopo exihra ro mak nasî.

18 Mer̂pono pîn miw komo yakronoman̂e rma Amoro. Kicicme ehxapunhîrî komo marha mepemesî. Yîmxîkîthîrî pen komo yenaka rma mar̂mesî emetanmetopo komo. Kyopono ro xa Amoro, Karitî marha. Amna porin Amoro, amna yantoman̂e ha.

19 Kyopono me xa mas Amoro amna yakîhretopo poko. Mekaricesî ro mak an̂irirî poko. Ahnoro tooto me ewruxapu komo yehtopo yenîn̂e Amoro. Ehtoponhîrî komo yecenarî xa epemano miir̂asî, yin̂irithîrî komo marha mepemesî.

20 Pahxa keserepokacho miir̂akn̂e Exitu pono komo wero ro, cirihnî mko miir̂akn̂e. Ero yipu rma miir̂asî oroto Ixaw Yana komo wero ro hara, anarî komo wero ro marha. Karitî me ekaiporexapu Amoro. Ero wara rma mekaiwasî.

21 Ayanan komo mekyakn̂e Exitu poi cirihnî ciriche, eserepokacho komo ciriche. Awamorî ke rma n̂examro mekyakn̂e karitî ke ha. Awaporî ke marha mekyakn̂e apockantaxapu ke. Eraspeno xa miir̂akn̂e n̂examro yekyataw en̂exa.

22 On roowo tak mîmyakn̂e n̂examro ya. On roowo wîmyas awya so, awepamthîrî ya marha, mîîkekn̂e n̂examro yîîm pen komo ya, ero wa kachonho yaw roro rma mîmyakn̂e yîwya so. Mer̂pora paaka mownu nas iito eepu wara rma ha re. Weenu pen marha nas iito ero wicakî xa marha okre.

23 Ero ke on pona tak mokyatken̂e ayanan komo. Ceken komo me nahsîyatken̂e. Amtapotachonhîrî yewetîra rma tko xatken̂e kica. Awya tpanatanmetopo komo yaw roro exihra xatken̂e okwe. Ero wa men ehcoko, mîîkekn̂e yîwya so ahce wa na ehtopo komo poko. Ewetîra xatken̂e kica. Ero ke on warai tak mekmexpekn̂e yîwîrîmacho komo xa tak okwe.

24 Enko xe, ehyu nakîhtoce waapa komo. Ewto imo panaka mohce Kawtew komo. Kacipara imo ke cemyarke naxe. Rooma me ro mak naxe ewto pono komo, eper̂a ken̂e marha. Ero yipu yanme ewto tak nahsîyat ham Kawtew komo okwe, waapa me mohxapu kom ha. Amtapotachonhîrî yaw roro rma tak nat ham. Enko xe exirî komo.

25 On wara tko mîîkes owya, Mararî ahsîko epethîrî pona prata pona. Apoyino komo wero ro epemakî, mîîkesî, Wara rma ewto tak mahsîpesi Kawtew komo ya okwe, wîîkekn̂e. Ero wara wîîkekn̂e Kporin komo ya.

26-27 Ero yinhîrî Xeremias n̂eyukyakn̂e Kporin komo. On wara kekn̂e yîwya, Aporin komo Ow ha. Ponaro ahnoro tooto komo yehtopo Ow. Oyehn̂atopo ma re nai awya?

28 Ero ke on wara wîîkes Ow Aporin komo awya, on ewto wîmyasî Kawtew komo ya. Nabukotonoso ya wîmyasî, Babiron̂a pono komo kayaritomon ya. Tantono komo nahsîyasî noro.

29 Waapa me mohce Kawtew komo, n̂examro tak n̂epatakexe on ewto pona. Mîîmo mko nakn̂itîkexe wermonho me cehso ro. Iito rma nas mîîmo mko. Ero meretwo so kotoporem nakn̂iyatken̂e Baaw tawakeretopo me. Iito marha wooku nukmamyatken̂e ponaro anarî yana komo yehtopo ya tîmsom me kica. Ero wa orwonmekyatken̂e mîîmo mko meretwo kica. Ero ke ero mko nakn̂iyaxe Kawtew komo.

30 Kicicitho pokono me mak xatken̂e Ixaw Yana komo, Xuta komo marha. Tîmrenai ro so rma ero wa xatken̂e. Kir̂wan̂he exihra ro mak xatken̂e. Orwonmetopo poko mak xatken̂e kica. Tîn̂irithîrî komo ke rma orwonmekyatken̂e, wîîkes Ow Aporin komo.

31 Yihcirî me on ewto ciitoponho n̂ixa ro rma on pono komo naxe orwonmekn̂e me rma kica. Oroto rma ero wara naxe okwe. Miya xe ro mak orwonmekyaxe kica. Ero ke on ewto thakwa war̂mesî oroto oyepatawra tak ehtome.

32 Orwonmekyatken̂e Ixaw Yana komo, Xuta komo marha. Kicicme ro mak xatken̂e okwe. Ero wa xatken̂e n̂examro kayaritomon komo, antoman̂e komo, tîmsom pokono komo, weronoman̂e komo, Xuta komo kîrkomo, Xerusaren pono komo marha, ero warai komo orwonmekyatken̂e kica.

33 Tîmkarî komo mak n̂aknametken̂e owece okwe, owece cewru exihra ro mak xatken̂e. Pahxaxaro so n̂examro panatanmekyakn̂e. Omtapotarî yentara ro mak xatken̂e okwe. N̂examro panaretaw owya panatara rma xatken̂e okwe.

34 Iito nasî omîn oyosoken. Ero yaka rma n̂iir̂atken̂e kica yiixera ro mak oyehtopo. Ero wa omîn nîwîrîmetken̂e kica.

35 Baaw kuknon mînî mko n̂iir̂atken̂e Inon mumuru yaporî yecihtaka. Iito marha tumumuthîrî pen komo cik nakn̂iyatken̂e Moroke ya tîmsom me okwe, cemsîthîrî pen komo cik marha nakn̂iyatken̂e. Ero wara amxîkîthîrî pen komo akn̂icoko, kahra ro mak wîxakn̂e. Ero wa akn̂itopo yîhtînopîra ro mak wîxakn̂e. Kicicme ro mak xakn̂e Xuta yepamtho komo yehtopo, ero wara akn̂itopo komo okwe.

36 On wara tko wîîkes hara Ow Aporin komo, on wara mîîkexe on ewto poko, kacipara imo yaka waihyaxe on pono komo, rooma yaka marha waihyaxe, eper̂a yaka marha. Ero ke Babiron̂a pono komo kayaritomon nahsîrî me thakwa nas on ewto, mîîkexe.

37 On wara tko wîîkes hara Owî, Aporin komo, ponaro Ixaw Yana komo yehtopo, miya so tantononhîrî komo wakpayasî mîn hak pona roowo pona. Kîrwonasî ro mak poko so, ero ke iina so wakpayasî. Wara rma oona n̂examro wekyas hara amn̂e. Tan tak naxe cekenke erasîn me okre.

38 Oyanan me tak naxe ero yimaw. Ponaro n̂examro yehtopo me was Ow hara.

39 Ero yimaw iito re cesehtînosom me wiir̂asî n̂examro ropotarî. Iito re opokono me marha n̂examro wiir̂asî. Ero wa n̂examro wiir̂asî oponaro xa tak ehtome so etowîn me ro mak. Ero wa n̂examro wiir̂asî kir̂wan̂he ehtome so, kir̂wan̂he ehtome so marha yîmxîkrî komo yîîm pen komo waipuche.

40 Akronomacho poko marha kîmtapowasî n̂examro yakro. Towîhnî me ro mak kîmtapowasî. Yîtîhkara ro mak wasî n̂examro yakronomacho. Oponaro xa ehtopo komo wiir̂asî yîropotaka so. Ero ke ohyai etowra ro mak tak naxe okre.

41 Kahwowasî n̂examro yakronomacho poko. On roowo pona n̂examro wiir̂asî onatîrî wara rma. Tahwore ro mak n̂examro wakresî.

42 On wara marha wîîkes Owî, Aporin komo, Moxam yîwîrîmacho xa wekmexpekn̂e oko. Ero wa xa marha n̂examro yakronomacho xa tak wekmexpes hara amn̂e. Omtapotachonho yaw roro rma n̂examro wakronomesî.

43 On wara mîîkexe on roowo poko, pohnî me ro mak nas okwe. Tooto exihra nasî tan, okno marha exihra nasî. Kawtew komo rowon me tak nîmye ham Kaan, mîîkexe. Pahxaro tko mararî mko nahsîyaxe hara apoyino komo epethîrî pona. Tantono rma nahsîyaxe.

44 Mararî mko xa hara nahsîyaxe puranta pona. Karita mewrexe mararî yahsîtopo pokono. Eronhîrî tak nahkoromexe. Yaaro epethîrî nîmye ham, kan̂e komo wero ro epethîrî nîmyaxe. Ero wa naxe Benxamin rowon pono komo, Xuta yewton pono komo, îîpî chewno komo, matîwîn pono komo, resce n̂ixan pono kom ha, suu n̂ixan komo marha. Iitono komo nahsîyaxe tmararîn komo amn̂e, wîîkesî, kekn̂e Kporin komo. Ero wa kekn̂e.