On wara marha kesî Kporin komo, Ero yimaw tak ponaro Ixaw Yana komo yehtopo me wasî. Ahnoro noro re me cehsom komo naxe oponaro. Oyanan me marha naxe. Ero wa naxe Ixaw Yana komo.

2 On wara marha kesî Kporin komo, On wara naxe Ixaw Yana komo amn̂e, kacipara imo ke cemyarkem komo nwaihkatho pîn komo mak. Noro yipu komo tak n̂een̂axe takronomacho komo axawa imo po. Iina kmokyas n̂examro ciitome cepokaresom me, kesî.

3 On wara kekn̂e Kporin komo pahxa kîwya so cesenpetaw, Eroromerono me aaxe so wîxakn̂e. Ero ke ooxatî me tak kiice so awakronomacho komo ke.

4 Pahxaro tak awewton komo wiir̂as hara. Cewtoi so tak maxe ero yimaw. Emasî warai amyamro Ixaw Yana komo. Pahxaro maraka ke tak maxe tporokye so okre. Amîn komo yai mepatakexe amanîmtome so tahworem komo yakro.

5 Ero yimaw anatîrî komo miir̂axe îh pona so, Samaria pono pona. Ero yipu n̂iir̂axe tînatkem komo. Epetache tak eperîrî nahyaxe okre.

6 Anarî kaamo po tak Eprain yîpîn po naxe ekahtono rin̂e komo. Tpoyino komo nan̂ikyaxe. On wara kexe, Ai, oyakno komo, amohcoko Siaw pona. Kporin komo yaka kaikatko, ponaro kehtopo komo yaka, kexe. Ero wara kexe pahxaro, kesî Kporin komo.

7 On wara marha kesî Noro, Ewanomacoko tahwore awexirî ke so. Xako yepamtho komo yakronomarî ke ewanomacoko. Kar̂pe xa amtapotacoko Ixaw Yana komo poko mîk hak rowon pono komo yopono me xa exirî ke so. Kir̂wan̂he Kaan yehtopo poko amtapotacoko. On wara kacoko Kporin komo ya, Apa, asak mak tak naxe ayanan komo, Ixaw Yana kom ha. N̂examro cma re mukurunpesî, kacoko yîwya.

8 Ixaw Yana komo wekyasî nohce n̂ixan poi roowo poi. Ahnoro wekyasî roowo mapitawnonho komo meero. Ewuhnî me naxe anarî komo, yîhrepun me naxe anarî kom hara. Wooxam komo naxe tarkem komo. Ewruporono me naxe anarî komo. Ero warai komo mokyaxe oona. Mer̂pono pînî ro mak mokyaxe.

9 Nîwracexe rma tko tmokyataw so. Kaan yakro nîmtapowaxe oona ekyataw so owya, yiixe so cehtopo komo poko nîmtapowaxe. Eepu yecihtari wekyasî. Capahno yaw wekyasî esama yaw ehrokara ro mak ehtome so. Kir̂wan̂he wekyasî Ixaw Yana komo yîîm me oyexirî ke. Eprain komo naxe omumuru warai me, poturme ewruxapu warai me ha.

10 Ai, mîk hak rowon pono komo amyamro, on wara wîîkes awya so, Kporin komo mtapotarî entacoko. Ero ekatîmcoko meyeno komo ya ciwya pono komo ya meero. On wara kacoko yîwya so, Ixaw Yana komo yakpan̂enho rma tak nasî enmekn̂e me hara. Tîyanan komo yenîn̂e me tak nasî, tooku n̂een̂asî oper̂a yosom ero wara rma, kacoko.

11 Xako yepamtho komo nowyasî Kporin komo. Karitî komo yanton me thakwa ka xatken̂e okwe. Iyopo so thakwa xatken̂e antoman̂e komo kar̂pe xa. N̂examro yai rma tko nahsîyas hara epethîrî pona.

12 Ero yimaw tak Ixaw Yana komo mokyaxe Siaw pona, îh pona ha. N̂emtarakexe tahwore xa cexirî ke so. Mer̂pora ro mak mokyaxe iina Kporin komo ya takronomarî komo ke. Iito tak nasî puruma, sepata, wooku, asece, oper̂a xîkrî, paaka xîkrî. Mararî wara rma naxe Ixaw Yana komo ropotarî, emapona roro tîhxapu wara. Ahwora exihra ro mak tak naxe okre.

13 Ero yimaw tak manaxe emasî komo, tahwore naxe. Kîrkomo marha nahwowaxe, kar̂pamxan komo, poritomo komo ahnoro. Ahwora n̂examro yehtoponho waknamesî tahwore ehtopo komo pona hara. N̂examro wewyakîresî, wahworesî marha ahwokaxapunhîrî komo.

14 Kaan ya tîmsom pokono komo nahrî marha wîmyasî mer̂pono pîn, iyotî komo marha. Cerepore tak naxe oyanan komo twakrerî ke so owya, kesî Kporin komo.

15 On wara kes hara Kporin komo, Hama pono komo yîwratarî n̂esences okwe. Cerewre ro mak nîwracexe okwe. Hakew yemsîrî komo nîwracexe tîmxîkîthîrî komo pînîn yaw. Esewyakîrepora ro mak naxe okwe yîmxîkîthîrî komo exihtorî ke tak okwe.

16 On wara tko kesî Noro, Kporin komo, yîwratara tak ehcoko. Awewyokuthîrî komo yickacoko. Ahce poko na awehtoponhîrî komo yepetho rma wa mahsîyaxe. Mokyaxe xa hara ayanan komo tîîxatî pîn komo rowon pononho.

17 Ero ke on wara kacoko, Kir̂wan̂he rma kiir̂axe so Kaan amn̂e, kacoko. Amxîkîthîrî komo mokyaxe hara tîrowon komo pona, kesî rma wa Kporin komo.

18 On wara marha kesî Noro, Eprain komo mtapotarî wencesî, Okwe okwe, kexe. On wara kexe, Ow mîpanarekn̂e Apa. Paaka xîkrî wara wîxakn̂e, panarenî ro wara kica. Aponaro tak ow cirko hara. Ahyaka tak kmokyasî. Oporin Amoro, ponaro oyehtopo ha.

19 Ahyai ka kemoxenorekn̂e kica. Ero yinhîrî kicicme oyehtoponho tak poxunkekn̂e hara. Awehtopo tak wîhtînoyakn̂e yuhnari. Kepetkatapekn̂e tak oyeserepokarî ke. Kîhyapamyakn̂e ro mak, kicicitho me kesehtînoyakn̂e kicicitho poko oyehtoponho poyero, kar̂pamxan me oyexitawnonho poyero ha.

20 On wara tko kesî Kporin komo, Omumuru komo rma mîkyam Eprain komo. Omxîkrî mexan komo xa mîkyam okre. Kicicme ehtoponhîrî komo yanme rma re wen̂ekekn̂e. Wara rma n̂examro ponaro rma wasî. Yiixe so ro mak wasî, yîpînîn yaw so ro mak was amn̂e.

21 Esama kuknonî mko ciicoko esama yakumyaw so. Esama yekanîn̂e mko marha ciicoko. Awesamathîrî tak yîhtînocoko hara amyamro Ixaw Yana komo. Awewtonthîrî komo pona etocoko xa hara. Emasî warai amyamro owya.

22 Oyemsîrî cik amoro, opona enîhkan̂e ro okwe. Atî wicakî pahkî mîîcetu mîk hak yaka okwe? On wara tko awir̂axe so Kporin komo, tooto komo yehtopo ro warahra awir̂axe so. Wooxam tak nasî kîîrî yecehton̂e me hara. Ero wara naxe Kporin komo yanme rma, kesî Kporin komo.

23 On wara marha kesî Kporin komo, kantoman̂e ro, ponaro Ixaw Yana komo yehtopo Mîk kesî on wara, Pahxaro tak oyanan komo wekyas hara oona waapa narîtho. Ero yimaw on wara tak kexe Xuta rowon pono komo, n̂examro yewton pono kom ha, Ai, yaaro ciino rin̂e komo yeken amoro ewto, Kporin komo yekenî ro amoro îîpî. Awakre xe wasî Kporin komo ya, kexe.

24 Ero yimaw iito re tak n̂enmayaxe Xuta yewton pono komo. Ero wara naxe mararî pokono ro komo, oper̂a ke tokyem komo marha, tok yewyarin̂e kom ha.

25 Ekar̂kaxapu komo werepores hara. Ahwokaxapu komo wînahmesî ahnoro, kesî Kporin komo.

26 Ero yinhîrî kpakai hara. Miya so tak kesewyar̂akn̂e. Tpoxwe xakn̂e owîntopo okre.

27 On wara marha kesî Kporin komo, Pahxaro tak omararîn wara rma naxe Ixaw Yana komo, Xuta komo marha. N̂examro cheka wiir̂as onatîrî warai. Cepamsom me xa tak n̂examro wiir̂asî, cepamsom me marha iyoh komo wiir̂asî.

28 Pahxa n̂examro ponaro wîxakn̂e ar̂machome so, mohkachome so marha, yîmînthîrî komo yixkachome marha, n̂examro pen yîwîrîmachome. Ero wa ciitome ka ween̂akn̂e. Oroto tak n̂examro ween̂asî yîmîn komo ciitome hara. Onatîrî wara rma n̂examro wiir̂asî ewton komo pona, kesî. Ero wara kesî Kporin komo.

29 Ero yimaw on wara kahra tak naxe Ixaw Yana komo, Uupa nahce yîîm komo, kawawano nahce kica. Ero yanme yîmxîkrî komo nîyokakwawanasî, kahra naxe.

30 Kicicme ehxapu makî reha waihyasî kicicme cehtoponhîrî poyero. Kawawano yapuche tooto ya, uupa yapuche, noro rma nîyokakwawanasî, anarî pîn, kesî Kporin komo.

31 On wara marha kesî Kporin komo, Pahxaro tak Ixaw Yana komo yakronomacho poko kîmtapowasî xa hara, Xuta yepamtho komo yakronomacho poko marha. Anarmen poko kîmtapowasî n̂examro yakro.

32 Pahxa kîmtapowakn̂e ha re n̂examro yîîm pen komo yakro akronomacho komo poko. Exitu poi on̂ekîtho mîkyam, amorî yaw so rma wekyakn̂e. Ero yimaw kîmtapowakn̂e n̂examro pen yakro akronomacho komo poko. N̂examro yin̂o wara rma wîxakn̂e ha re. Wara rma omtapotachonho yewetîra tko xatken̂e okwe. Ero ke omtapotachonho wara yîmtapotara tak wasî pahxaro, anarme tak kîmtapowasî ero yimaw.

33 On warai poko xa kîmtapowasî Ixaw Yana komo yakro ero yimaw, n̂examro panatanmetopo mewresî yîhtîpîrî komo yaka, yîropotaka so marha. Ponaro n̂examro yehtopo me tak wasî. Oyanan me tak naxe n̂examro hara.

34 Ero yimaw on wara kahra tak naxe tooto komo tîmîtwono komo ya, takno komo ya marha, Kporin komo ponaro esko, kahra tak naxe. Ahnoro rma naxe oponaro, emyawnomnî komo naxe oponaro, cemyawnoyem komo marha, ahnoro mak. Ero yimaw tak kir̂wan pîn me ehtoponhîrî komo wîhcamnoyasî. Kicicme ehtoponhîrî komo ponarora tak wasî, kesî Kporin komo.

35 Taa, anarî poko tan kîmtapowas hara. Aporin komo Ow ha, kaamo yantoman̂e Ow, katpareno ritopo poko antoman̂e ha. Nuun̂i yantoman̂e marha Ow, xir̂ko mko yantoman̂e marha, kosope weipono ritopo yantoman̂e cik ha. Tuuna imo yewcokocokoman̂e marha Ow, cewtun̂em me ciin̂e ha. Kporin komo Mîk ha, kantoman̂e ro. Ero wa nasî Noro yosotî.

36 Epatakara exitaw ketaw ha re kaamo, nuun̂i komo, xir̂ko komo, ahnoro onantomarî komo yepatakara exitaw ketaw ha re, tuuna imo ewcokocokomara exitaw marha ketaw ha re, ero yimaw tak n̂ehcamnoyaxe Ixaw Yana komo exihnî me tak okwe, wîîkesî, kesî Kporin komo.

37 On wara marha kesî Noro, Kaapu mko yakwerî mukuknometu ma re awya so? Roowo mapatan ma re mepor̂atu censo ro roowo makatawno ha? Kaapu mko yukuknomache rma awya so, roowo mapatan yenîche marha awya so ero yimaw mak tak Ixaw Yana komo wahsîpînkesî ahnoro. Kicicme ehtoponhîrî komo poyero wahsîpînkesî, kesî Kporin komo.

38 Pahxaro tak on ewto n̂iir̂axe xa hara miya Anameew mîn pona roro, waaca metatan pona roro marha n̂iir̂axe xiya waaca yeknutawno pona roro.

39 Karebe Yîpîn pona roro waaca nukuknomexe pataw, xapopo warai ke nukuknomexe. Iito tak wow kesî Koa wece hara.

40 On wara tak nasî woskara iitono ero yimaw, tooto pen yokoputho yahrutopo me nasî, wemronho yar̂macho me marha nasî. Kporin komo rowonî ro me tak nasî. Ero wa nasî yîhroron Ketîron kwaka rorono ha. Ero wa marha nasî resce n̂ixan waaca metatan yaka rorono mko, Kawaru Metatan yaka rorono mko ha. Ahnoro ero yipu nasî Kporin komo rowonî ro me. Ero yinhîrî on ewto yar̂mara ro mak tak nasî waapa, akn̂ipîra marha nasî. Ero wa nasî miya roro eroromero.