Taa, on wara kekn̂e tîmtapotaxmu owya, Ai, tooto xîkrî, on wara wîîkes awya, piiri awomko. Kîmtapowas awakro, kekn̂e.

2 Ero wa ketaw rma owya Kaan Yekatî mokyakn̂e oropotaka. Noro rma oyanîmyakn̂e piiri cehso ro tak. Oyawomuche tak tooto mtapotarî warai wencekn̂e xa hara.

3 On wara kekn̂e owya, Ai, tooto xîkrî, on wara wîîkes awya, Ixaw Yana komo yaka ken̂epesî. Kanwekn̂e komo mîkyam okwe. Ow meero oyanwekyaxe kica oroto rma. Mehxa ro rma oyanwekyaxe, n̂examro porin pen komo marha.

4 Noro yipu komo yaka ken̂epesî. Kewetîn̂e pînî ro mak n̂examro kica. Ceipu nasî yîropotarî kom okwe. Yîhyaka so awtoche on wara kasko yîwya so, Ai, oyakno komo, on wara men kesî Kporin komo awya so, kasko.

5 Anarimaw na awencetu, anarimaw awentara rma na natu. Kanwekn̂e komo ro mak mîkyam okwe. Wara rma on wara tak kexe, Weronomano rin̂e xa mîk ham, kîcheka so mokye noro, kexe apoko.

6 On wara wîîkes hara awya, tooto xîkrî, erasîn me ro mak esko n̂examro pona, yîmtapotarî komo pona marha. Anarimaw cekyekyem chewno wara mai oko. Anarimaw cikiri chewno wara na mai oco. Kanwekn̂e me rma re naxe, erasîra tko esko n̂examro pona. Yîmtapotarî komo pona erasîra esko, cewîrwoxe awece een̂ataw so marha erasîra esko pona so.

7 Omtapotarî men ekatîmko yîwya so. Anarimaw na awencetu, anarimaw awentara na natu. Kanwekn̂e komo xa mîkyam okwe. Wara rma omtapotarî ekatîmko rma yîwya so.

8 Tooto xîkrî amoro, on wara marha wîîkes awya, omtapotarî men entakî. Omtapotarî yanwekîra esko n̂examro wara, kanwekn̂e ro komo wara. On cirko amtaka. On wîmyas awya anahrî me, kekn̂e owya.

9 Ero ke Noro wece tak ween̂akn̂e. Tooto yamorî warai ween̂akn̂e owece esehyatkaxapu. Emyaw xakn̂e karita yamomixapu.

10 Ero yinhîrî karita tak namomhokekn̂e on̂enîrî me. Tmewreso xakn̂e yîratari, yîmkari, ero wara. Okwe okwe, kacho ro mak xakn̂e tmewreso ero yaw, kîwratacho komo, kahwokacho komo, ero re mak xakn̂e tmewreso okwe. Ero wara xakn̂e karita owya n̂enpekn̂e ero.