Ero yinhîrî on wara kekn̂e tooto warai owya, Ai, tooto xîkrî, on wara wîîkes awya, on ahko karita rma. Apuche etoko Ixaw Yana komo yaka. N̂examro yakro amtapotakî.

2 Ero ke kemtayankekn̂e. Noro tak onahmekn̂e karita ke.

3 Ero yinhîrî on wara kekn̂e owya, Tooto xîkrî, on ahko. Karita wîmyas awya ero ahko. Awethîrî yaka tomhe, kekn̂e owya. Ero ke ero karita wahyakn̂e. Tîkpore xakn̂e okre omtaw ween wara ro mak okre.

4 Ero yinhîrî on wara kekn̂e hara Noro owya, Ai, tooto xîkrî, on wara wîîkes awya, oroto etok ha Ixaw Yana komo yaka. Omtapotarî ekatîmko yîwya so.

5 Anarî yana komo cheka awen̂epera wasî, anarî yaro tîmtapotaxmu komo cheka. Ixaw Yana komo cheka xa matko ken̂epesî.

6 Mer̂pora naxe anarî yaro tîmtapotaxmu komo. Noro yipu komo mtapotarî yentara thakwa masî. Noro yipu komo yaka awen̂epera wasî. Noro yipu komo yaka rma tko awen̂epetaw ketaw ha re amtapotarî n̂encexe n̂examro reha.

7 Amtapotarî yenta xera tko naxe Ixaw Yana komo. Ero wara naxe apoko omtapotarî yenta xera cexirî ke so marha okwe. Ceipu ro mak nasî Ixaw Yana komo ropotarî. Kanwekn̂e komo ro mak mîkyam okwe.

8 Awepatarî tko wiirî ceipu n̂examro yeepatarî yopo. Aperî marha wiir̂asî ceipu n̂examro perî yopo.

9 Ceipu xa wiir̂asî aperî toopu wara ro mak. Saama yopono wara wiir̂asî ceipu xa oko. Ero ke erasîn me ro mak esko pona so. Kopi, kahra ro mak esko n̂examro yeen̂ataw. Kanwekn̂e rma re mîkyam. Erasîra tko esko pona so, kekn̂e owya.

10 On wara marha kekn̂e owya, Ai tooto xîkrî, omtapotarî men entakî takîhso. Aropotaka cirko ahnoro omtapotarî, apanarî ke marha entakî.

11 Apoyino komo yaka etoko, waapa nahsîtho komo yaka. N̂examro yakro amtapotakî. On wara kasko yîwya so, Ai oyakno komo, On wara kes awya so Kporin komo, ponaro kehtopo kom ha, kasko. Amtapotarî yentan̂e me exitaw so ekatîmko yîwya so. Amtapotarî yentan̂e pîn me exitaw so reha ekatîmko rma yîwya so, kekn̂e owya. Ero wa kekn̂e tooto warai owya.

12 Ero yinhîrî oyanîmyakn̂e Ekatî. Ero yimaw cewtunîmsom warai wencekn̂e omkai, kpanaikoton̂e warai oko. On wara kacho wencekn̂e, Kir̂wan̂he xa tahwotapore nasî kir̂wan̂he xa Kporin komo yehtopo poko. Tanî rma tahwotapore nasî, kacho wencekn̂e.

13 Mîk hak warai komo yaporî marha wencekn̂e etpona esehyatkaxapu ha. Nîyorwakn̂e marha tarara tarî warai, n̂examro panawno mko. Kar̂pe ro mak kekn̂e tarai wara ro mak.

14 Ero yinhîrî tak oyanîmyakn̂e Kaan Yekatî, miya oyar̂akn̂e. Tîrwon̂e ro mak kîwcekn̂e, ocorono wara xakn̂e oropotarî. Tamorî ke rma tko oyahsîn̂e wara xakn̂e Kporin komo. Karitî xa Mîk Noro yamorî.

15 Ero ke waapa nahsîtho komo yaka kîwcekn̂e. Terabibe pono komo yaka kîwcekn̂e. Keba yecihtawno mîn Terabibe, ewto ha. Iito tak keremekn̂e n̂examro yakro rma. 7 kaamo wîxakn̂e yîchew so. Ceserepokaxi ro mak wîxakn̂e. Ero wara wîxakn̂e iito.

16-17 Taa, 7 kaamo yenatîche tak on wara tak wîxakn̂e iito, Kporin komo mtapotarî xa hara wencekn̂e. On wara kekn̂e owya, Ai, tooto xîkrî, on wara wîîkes awya, waapa yekaiporen̂e me tak kiire, Ixaw Yana komo ya ekaiporen̂e me ha. Ero ke omtapotarî men entakî n̂examro weronomacho. Oyanme xa n̂examro weronomakî.

18 Anarimaw on wara wîîkesî kicicitho ya, Mîwaiyasî men amn̂e okwe, wîîkesî. Amoro tko na noro yipu weronomara mai. Kicicme awehtoponhîrî yai tak etaknamakî waipîra awehtome, kahra na mai yîwya. Ero wara kahra awexitaw waihyasî rma noro pen okwe kicicme rma. Apona tko wiir̂asî noro pen waihtoponho.

19 Anarimaw tko na kicicitho mîweronome, Mîwaiyasî men okwe, mîîke rma na yîwya. Wara rma noro etaknamara na nai kicicme cehtoponhîrî yai. Ero wara cexitaw noro pen waihyasî kicicme rma. Cetowso tko mas amoro, apona cirihra nai kicicme noro yehtoponho.

20 Anarimaw on wara na nai kir̂wanînhîrî, kir̂wan̂he cehtoponhîrî tak na nahsîpînke. Kicicme tak nai okwe. Ero ke noro yehrokacho wiir̂asî noro yesamarî yaw. Ero ke noro pen waihyas okwe. Amoro tko na noro weronomara mai okwe. Mîwaiyasî men okwe kicicme awehtoponhîrî yanme, kahra mai. Ero wara exitaw noro yehtoponho wîhcamnoyasî, kir̂wan̂he ehtoponhîrî rma. Apona tko wiir̂asî noro pen waihtoponho.

21 Anarimaw na kir̂wan mîweronome. Kicicme exihra men esko, mîîke na yîwya. Ero ke kicicme exihra na nai amtapotachonhîrî yaw roro. Ero wara exitaw waipîra nasî noro amtapotarî yentarî ke, tweronomacho ha. Apona ecirira nasî ahce wa na noro yehtoponho, kekn̂e owya. Ero wa kekn̂e Kporin komo owya.

22 Iito rma oyexitaw oyahsîn̂e wara xakn̂e Kporin komo, tamorî ke oyahsîn̂e wara. Ero yinhîrî on wara kekn̂e hara Noro owya, Ai awomko, woskara pona etoko. Iito tak kîmtapowas awakro, kekn̂e.

23 Ero ke kawomyakn̂e. Woskara pona tak kîwcekn̂e. Iito oyexitaw Kporin komo weyuru ween̂akn̂e xa hara. Iito xakn̂e cececetoso. Noro weyuru ween̂akn̂e pahxa n̂he Keba yecihtaw ero warai xa marha ween̂akn̂e hara. Ero ke kesewnapekn̂e.

24 Ero yinhîrî mokyakn̂e tak Kaan Yekatî oropotaka. Oyanîmyakn̂e tak piiri. On wara kekn̂e Noro owya, Ai, tooto xîkrî, on wara wîîkes awya, etoko amîn yaka. Etahruko iito.

25 Iito awexitaw amiyaxe iitono komo ruupu ke. Cimiso tak mas iito tooto chere tohnî me thakwa.

26 Ero yimaw marha an̂uru wahsîsîknoyasî akarantaka. Ero ke yîmtapotan me tak masî. N̂examro weronomara tak masî. Kanwekn̂e komo ro mak mîkyam okwe.

27 Ero yinhîrî kîmtapowasî awakro xa hara. Ero yimaw tîmtapotaxmu me tak kiir̂as hara. On wara tak kasko yîwya so, Ai oyakno komo, on wara men kesî Kporin komo Kaan, kasko. Ero wa ekatîmyataw tak amtapotarî yenta xatî komo awentacowpe. Amtapotarî yanwekn̂e komo awanwecowpe rma. Kanwekn̂e ro komo mîkyam okwe, kekn̂e. Ero wa kekn̂e Kaan Yekatî owya.