On wara marha kekn̂e Kaan Yekatî owya, Taa, tooto xîkrî, on wara wîîkes hara awya, er̂po warai ahsîko er̂mo kahxapu. Ero cirko awepatai. Ero pona ewto warai mewreko, Xerusaren warai.

2 Ero yinhîrî ero waparî wara esenpoko amoro. Sowtatu wacan warai cirko ero mîtwo. Ero wacan yaka enmeko roowo sowtatu ya awnutopo warai. Sowtatu mîn warai cik cirko marha ero mîtwo. Ewto wacan mohrakacho mko marha akîhtoko ero mîtwo.

3 Ero yinhîrî anarî xa hara ahsîko er̂po kuripara tak. Ero cirko anmewrethîrî yecen̂e, awecen̂e marha iyotaw mak. Ero ciriche anmewrethîrî wece cewru tak esko. Ero wara Xerusaren pono komo waparî warai me xa esenpoko. Ero wara esenpoko Ixaw Yana komo ya Xerusaren pono komo waparî kuknon me.

4 Ero yinhîrî etakriko tawxapo, poowa n̂ixan po. Ero wara Ixaw Yana yehtopo ciin̂e wara esko, apona rma ciin̂e wara. Kicicme ehtopo komo cirko aponan wara. Pahkî ero wara n̂examro yehtopo yapon wara esko awxaw awehtopo poko hakî.

5 Kicicme Ixaw Yana komo yehtopo wukuknomesî ero wicakî pahkînon. Cewn̂e kaamo awexitaw awawxarî po cewn̂e cimn̂ipu kuknon me nai, kicicme ehtopo komo kuknon. Ero ke 390 kaamo ero wa esko kicicme Ixaw Yana komo yehtopo kuknon me. 390 cimn̂ipu kicicme so naxe Ixaw Yana komo okwe.

6 Ero wicakî kaamo yenatîche etakriko xa hara. Tawxapo etakriko kaarî n̂ixan po tak hara. Ero wara cetakriso awexitaw Xuta komo yehtopo yukuknoman̂e wara mesenpesî, kicicme ehtopo komo kuknoman̂e. 40 kaamo ero wara esko 40 cimn̂ipu kuknon me.

7 Xerusaren waparî komo kuknon mîmewrew ero wece cewru esko akaman po awexitaw. Awaporî ahrura marha esko poono ke. Ero wara awexitaw Xerusaren pono pen komo yar̂macho ekatîmko.

8 Ero wara awexitaw awahsîn̂e wara wasî epanamara ro mak awehtome akaman po. Xerusaren pono pen komo yar̂macho kuknon me awehtopo yenatîche tak kahsîpînkes hara.

9 On wara awru cirko ero wara awexitaw, puruma ahsîko, kumasa, puruma warai, kumasa warai anarî hara. Ero yipu cirko een yaka er̂mo kahxapu yaka. Ero mko tak aposokakî awru me ciisom. Awru me tak aiko. Ero tak tohko 390 kaamo pahkînon tawxapo awetakriyataw.

10 Ero tokyataw awya 0,2 kiru wicakî xa yukuknomakî awru me. Ero wicakî mak tohko kaamo po roro. Kaamo marha yukuknomakî ero tohtopo me awya. Mînto exitaw mak kaamo oyuru wokyasî roro, kasko.

11 Tuuna marha yukuknomakî 0,6 ritru wicakî so. Tukuknomaxi marha ero erko, amn̂e xa so mak.

12 Awru tohko sepata aixapu. Apoyino komo wero ro aiko. Tooto wetî marha cirko wehto kamerî me ero yuputopo.

13 On wara marha kekn̂e Kporin komo owya, Ero wara xa marha tînahrî nahyatu Ixaw Yana komo amn̂e anarî yana komo chew n̂examro pen yen̂epeche owya. Tusmuyemtho mak nahyaxe kica, kekn̂e owya.

14 On wara tko wîîkekn̂e yîwya, Okyo Apa Kaan, kicicitho yahn̂e pînî ro mak ow mehxa ro omrenai ro. Onok na yokoputho tonon̂e pîn ow puknow wa enxaputho, kamara n̂eskatho tonon̂e pîn marha ow. Kicicitho tonon̂e pînî ro mak ow okwe, wîîkekn̂e Kaan ya.

15 Taa, kekn̂e Noro owya, paaka wetî xa cirko awehtorî kamerî me, awru yuputopo me. Tooto wetî cirko awehtorî me, kahra tak was awya, kekn̂e owya.

16 Ero yinhîrî on wara kekn̂e xa hara owya, Ai, tooto xîkrî, on wara wîîkes awya, Xerusaren pono komo nahrî yekn̂e komo Ow wahkocesî. Ero ke iitono komo tak nahsîyaxe tînahrî komo tukuknomaxi cik mak okwe. Cerahso nokyaxe. Tuuna marha n̂eer̂axe tukuknomaxi xa marha okwe. Okwe ro mak, kexe ero wicakî so mak ceseresmetaw so.

17 Wahra so mak nasî yînahrî komo, wokru komo marha. Okwe ro mak, kexe tpoyino komo yeen̂ataw. Nakporotîkexe ro mak okwe kicicme cehtoponhîrî komo yanme rma. Ero wara men naxe okwe, kekn̂e. Ero wara kekn̂e Kporin komo owya.