Ero yinhîrî on wara kekn̂e hara Kporin komo owya, Taa, tooto xîkrî amoro, on wara wîîkes awya, kacipara imo ahsîko tîyokem xa. Tooto poci yawototopo ro warai xa ahsîko. Ahpoci rma awotoko, ekanamurinkakî mak. Awetpoci marha pahko. Ero papuche awsîn yukuknomacho ke ahpocithîrî yîraconkakî osorwawno me.

2 Kaamo yenatîche tak, Xerusaren waparî kuknon me awehtoponhîrî yenatîche ahpocithîrî akn̂iko ewto me mewrexapu po rma, tehsa wicakî mak akn̂iko. Ero yinhîrî tehsa wicakî xa hara ahsîko. Ero cirko anmewrethîrî pona, Xerusaren kuknon pona. Iito tak yîknoko kacipara imo ke rma. Ero yinhîrî tehsa wicakî xa hara ar̂makî kahsî ocowo narîrî me. Xerusaren pono pen komo wemetanmekyasî kacipara imo ke okwe.

3 Ero yinhîrî asak mak ahpocithîrî yîmtoko. Ero wicakno mak eyamko aponon yaka, aramacho yaka.

4 Ero yinhîrî aponon yawno poyino rma ahsîko asakî mak. Ero mko ar̂makî kr̂a wehto ywaka akn̂itome. Wehto men tak n̂epatakesî en̂exa ahnoro Ixaw Yana pen komo yakn̂itopo oco.

5 On wara men wîîkes Ow, Aporin komo, ponaro awehtopo komo, on wara xatken̂e Xerusaren pono komo, mîk hak rowon pono komo cheka rma n̂examro wekenmekn̂e. Yîmîtwono komo chew so marha wekenmekn̂e.

6 Omtapotachonho yanwekn̂e me xa xatken̂e mîk hak rowon pono komo yopo. Kicicme ro mak xatken̂e tîmîtwono komo yopo ro mak okwe. Omtapotachonho yenta xera ro mak xatken̂e tpanatanmetopo komo. Ero wara men ehcoko, kacho yewetîra ro mak xatken̂e okwe.

7 On wara kesî Kporin komo, ponaro awehtopo komo, kicicme ro mak maxe Xerusaren pono komo mîk hak rowon pono komo yopo, amîtwono komo yopo marha. Omtapotarî yewetîra ro mak maxe okwe apanatanmetopo kom ha, Ero wa exihra ro mak men ehcoko, kacho yewetîra maxe. Nasî rma amîtwono komo yepanatanmetopo hara. Ero yipu yaw rorohra meero maxe. Kicicme maxe n̂examro yopo okwe.

8 Ero ke on wara wîîkes awya so, Aporin komo Ow, ponaro awehtopo komo, Ai, Xerusaren pono komo, awemetanmekn̂e komo me tak was Ow ha. Kemetanmekyaxe so tak mîk hak rowon pono komo wero ro.

9 Awemetanmetopo komo xa tak wîhtînoyas okwe. Pahxa anarî komo wemetanmekyakn̂e ero yopo tak kemetanmekyaxe so. Amn̂e awemetanmekîra xa hara wasî ero wara. Ero wara kemetanmekyaxe so kicicitho me ro mak awexirî ke so kica.

10 Ero wa awemetanmekyataw so owya tîmxîkîthîrî pun non̂exe yîîmînhîrî komo rma. Anarî kom hara tîîmînhîrî pun non̂exe yîmxîkîthîrî kom hara okwe. Kemetanmekyaxe so ro mak okwe. Waipîn komo rma wakpayasî miya so ro mak.

11 On wara marha wîîkes Ow Aporin komo, ponaro awehtopo kom ha, Yaaro wîîkesî, Waipîn me wasî, kacho wara rma nas omtapotarî yaaro. Kicicitho poko ro mak mîxatken̂e omîn yaw okwe. Yiixera ro mak oyehtopo mekyatken̂e iina okwe. Ero ke asakman me tak kiir̂axe so okwe. Apînîn yaw so exihra ro mak tak was okwe. Amtora so was okwe.

12 Apoyino komo waihyaxe ewto po rma. Eper̂a ke waihyaxe, rooma ke marha. 1 tehxa wicakî waihyaxe ero yaka. Ewto wacanî mkai waihyaxe anarî kom hara tehxa wicakî xa hara. Anarî komo wakpayasî miya so ro mak. Iina so rma tko kmokyasî kacipara ke cemyarke n̂examro waparî me rma oko.

13 Ero yinhîrî ketîrwoxinkesî tak. Yîrwomra tak was apoko so. Ero wara was oyesepanputîkache. On wara tak kexe apoyino komo ero yimaw, orwonîmtoponho yenatîche, Kporin komo xa Mîk nîrwonîmye ham kpoko so tîmtapotachonhîrî yaw roro rma, kexe. Ero wa kexe.

14 Wemronho me mak tak wiir̂asî awewtonthîrî komo. Ero yeen̂ataw awîrîyakexe mîk hak rowon pono komo, iitoxari tîtosom komo.

15 Ero wa nasî awewtonthîrî komo, kica, kacho me mak nasî. Ero yenîche awîrîyakexe so mîk hak rowon pono komo, amîtwono komo. N̂examro panatanmetopo me nasî awîrîmachonhîrî komo. N̂eserepokexe ro mak apoko so. Ero wa naxe apoko so awîrîmache so orwon ke. Kîrwonasî ro mak apoko so. Ero wa men was amn̂e. Kporin komo Ow, omtapotacho mîn ha.

16 Kwexe so marha waiwî warai ke oko. Rooma mîn ha waiwî warai. Awaikachome so wa kwexe so. Cerewre xa wiitîkesî aroman komo. Anahrî yekn̂e komo wahkocesî.

17 Aroman komo wekpesî aapo so. Kamara warai komo marha wekpesî aweskan̂e komo. Noro rma amxîkexe so okwe. Yîmxîkîra tak maxe okwe. Eper̂a marha awaikexe so, waapa komo marha. Tîkaciparayem komo wekpesî awaparî komo me. Ero wa men kwaihkexe so. Aporin komo Ow ero wa wîîkesî, kekn̂e. Ero wa kekn̂e Kporin komo Esekiew ya.