1-2 Ero yinhîrî oyakro nîmtapowakn̂e xa hara Kporin komo. On wara kekn̂e owya, Ai, tooto xîkrî, on wara marha wîîkes awya, îîpî mko yakro amtapotakî, Ixaw Yana rowon pono yakro. Tooto yan wara kasko. Cemetanmesom me ehtopo ekatîmko yîwya.

3 On wara kasko yîwya, Ai îîpî, Ixaw Yana rowon pono amoro, Kporin komo mtapotarî ka wekatîmyas awya so. On wara kesî Kporin komo Kaan îîpî ya, matîwîn ya marha, tarenakem ya marha, woskara ya marha, waapa wekpesî amn̂e apona so, kacipara imo ke cemyarkem mîkyam wekpesî. Iito aapo so nasî anarî ro ya tîmsom yakn̂itopo mko, Ero komo kr̂a wakuhr̂apesî.

4 Tîmsom yakn̂itoponho mko tak nasî takuhr̂aposo, anakîtothîrî komo. Ero wa xa marha nasî kotoporem yakn̂itoponho hara, tar̂maxi so nasî. Iito marha nasî mîk hak warai me an̂irithîrî kom hara. Ero mîtwo so rma kîrkomo pen yokoputho war̂mesî, apoyino pen komo yokoputho okwe.

5 Ixaw Yana pen komo yokoputho wiir̂asî iina ciixaputho mîtkoso. Ayochîrî komo wakpayasî anmîthîrî komo yakn̂itoponho mîtkoso rma.

6 Ahnoro awewtonthîrî komo wakn̂iyasî. Anarî ro ya tîmsom yakn̂itoponho kr̂a tak nasî tîhcamnoso îh pononho komo. Tîmsom yakn̂itoponho nasî cixkaxi so, tîwîrîmaxi so. Takuhr̂aposo marha nasî mîk hak warai me an̂irithîrî komo. Anarî cirihra ro mak tak maxe. Kotoporem yakn̂itoponho marha nasî tar̂maxi so. Ahnoro an̂irithîrî komo tak nasî tîhcamnoso okwe, ero yipu me an̂irithîrî kom ha.

7 Achew so rma apoyino pen komo waihyaxe okwe. Ero yimaw tak on wara mîîkexe opoko, Kporin komo xa Mîk ham, mîîkexe. Ero wara mîîkexe.

8 Asak makî tko wîmcesî apoyino komo. Waapa komo yai cemahcisom me wiir̂asî n̂examro mîk hak rowon pono komo chew exitaw so rma. Ero wa kiir̂axe so awakpache so anarî rowon pona so.

9 Ero yimaw on wara tak naxe etîmtoxapu komo iito, mîk hak rowon pono komo chew cexitaw so, ahsîxapu me taan̂enhîrî komo chew, oponaro tak naxe. Ahwora ro mak wîxakn̂e Ixaw Yana komo poko, anarî ro poko cepohkaxmu me exirî ke so. Opoxunketken̂e okwe. Mîk hak warai me ciixaputho yeen̂ataw yîwya so tpoxwe ro mak n̂een̂atken̂e kica. Poxumnîtho me ro mak tak n̂esen̂axe n̂examro rma. Ero wara n̂esen̂axe kicicitho me ro mak cehtoponhîrî komo yanme.

10 Pahxaro tak on wara kexe opoko, Kporin komo xa Mîk ham, kexe. Yaaro xa Noro kekn̂e pahxa kîwya so, Kemetanmekyaxe so men amn̂e okwe, kekn̂e yaaro ham, kexe marha.

11 On wara marha kesî Aporin komo Kaan owya, Ai, Esekiew, knowknow kasko aweserepokarî ke. Knuhknu kasko marha ahtarî ke. Okwe, kasko marha kar̂pe. Ero wa kasko Ixaw Yana komo yehtopo poko. Kicicme ro mak naxe okwe, poxumnîtho poko ro mak naxe okwe. Ero wa exirî komo yepetho me tak waihyaxe amn̂e kacipara imo ke, rooma ke, eper̂a ke, ero warai ke waihyaxe okwe.

12 Meyeno komo waihyaxe eper̂a ke. Meyeno pîn komo reha waihyaxe kacipara ke. Etîmtoxapu komo reha waihyaxe rooma ke hara okwe. Ero warai wen̂epesî n̂examro yemetanmetopo orwonîmrî ke xa.

13 Ero yimaw on wara mîîkexe opoko, Kporin komo xa Mîk ham, mîîkexe. Ero wara kexe tpoyino pen komo yokoputho yenîche puknow wa so okwe, waapa nparaxkatho pen. Miya so n̂een̂axe okoputhîrî komo mîk hak warai me tîn̂irithîrî mîtwo so rma, tîmsom yakn̂itopo mîtwo so, îîpî meretwo so, matîwîn meretwo so kawno meretwo so, weewe yapomyaw so porin yapomyaw so, kapar̂u yapomyaw so taakem yapomyaw so. Iina so kotoporem nakn̂iyatken̂e ciixaputho yanme me kica, iito so marha nasî tpoyino pen komo yokoputho.

14 Oyamorî ke n̂examro pen waihkesî. Pohnî me tak wiir̂asî yîrowonthîrî komo. Pohnî rma re mîn Tibra mehxan roowo, pohnî me nasî ahnoro iitononhîrî komo pen yekenho mko. Pohnî me xa tak wiir̂asî Ixaw Yana komo rowontho ero yimaw. Ero yimaw tak on wara kexe n̂examro opoko, Kporin komo xa Mîk ham ero wa kiir̂axe so, kexe. Ero wara kexe.