1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara Ixaw Yana rowon pono komo ya. Aporin komo Kaan Ow ha on wara wîîkesî, Ai, on wara wîîkes awya so, N̂eexi, n̂eexi xa tak ha arowon pono komo yakronomacho owya. Ero mapitawno meero akronomara wasî.

3 N̂eexi tak awakronomacho komo owya. Kîrwonasî xa tak apoko so. Ken̂ekexe so tak awehtoponhîrî komo poko. Kepemexe so kicicme ro mak awehtoponhîrî komo yepetho ha.

4 Amtora so wasî. Apînîn yawra so tak wasî. Kicicme awehtoponhîrî komo poko kesepanîyasî, kicicitho poko awehtoponhîrî komo wepemesî. Ero wara awehtoponhîrî komo poko oyesepanîche on wara mîîkexe opoko, Kporin komo xa Mîk ham, mîîkexe.

5 On wara kesî xa hara Kporin komo, ponaro kehtopo komo, Awîrîmacho komo tak awepor̂axe so okwe, awîrîmacho komo xa tak ha.

6 N̂eexi, n̂eexi tak awakronomacho komo owya. Awîrîmacho komo me tak n̂enmapu oroto xa.

7 Awya so wîîkesî Ixaw Yana komo rowon pono komo ya, awîrîmacho komo xa tak awepor̂axe so okwe. Pahnoke tak men nasî awîrîmacho komo me enmacho. Ero ke on wara naxe îh pono komo, tahwore exihra ro mak naxe okwe.

8 Pahnoke tak men nasî tîrwon̂e xa tak awemetanmetopo komo owya okwe. Kîrwonasî ro mak tak apoko so. Ken̂ekexe so kicicme awehtoponhîrî komo poko. Kepemexe so kicicitho poko awehtoponhîrî komo yepetho me.

9 Amtora so men was okwe. Apînîn yaw so exihra tak was okwe. Kepemexe so mak awehtoponhîrî komo yaw roro rma. Kicicitho poko awehtoponhîrî komo yaw roro rma kepemexe so okwe. Ero yimaw on wara mîîkexe opoko, Kporin komo xa Mîk ham kemetanmekn̂e komo, mîîkexe. Ero wara mîîkexe.

10 Taa, n̂enmapu tak awîrîmacho komo me okwe. N̂epemrutunta tak amoyi warai awîrîmacho komo. Cehcoyoponkaxmu me awehtopo komo tak nasî cepemrutuntaxmu me kica.

11 Por̂mamtîka tak etapano rin̂e me awehtopo komo. Amoyi warai me tak n̂ehtîka kicicme awehtoponhîrî komo. Ero ke etîmtora ro mak naxe apoyino komo okwe. Noro yipu komo exihra tak nasî. Yupurantanthîrî komo exihra marha tak nasî. Yîpînîn yaw so yîwratara ro mak naxe poyino komo.

12 Awîrîmacho komo me tak n̂enmapu. Kicicme awehtoponhîrî komo yepemacho me tak nasî. Ahwotara n̂ehcowpe emyawno poko twarawantaxmu komo. Ahwokara ehcoko amyamro hara warawantanmekno rin̂e kom ha. Tîrwon̂e xa tak n̂examro pen wemetanmekyasî ahnoro.

13 On wara nasî roowo tîmn̂enho, epethîrî pona tîmn̂enhîrî, tînmîthîrî yahsîra ro mak nas hara. Waipîra rma na nai, wara rma ahsîra nasî. Tîrwon̂em me oyehtopo menwo ero wara oyehtopo rma nasî miyan komo pokono me rma. Tîmtapotachonhîrî towhîra ro mak nasî Kaan. Ekariton me ro mak tak naxe kicicitho pokono ro komo.

14 Tuu ketu rma na anarimaw sowtatu komo yan̂ihtopo me. Tukurun komo marha na nahsîyatu. Wara rma waapa me tohra ro mak naxe. Tîrwon̂e xa n̂examro pen wemetanmekyasî ahnoro.

15 Ewto poi tîto xe exitaw so, iito tko nasî kacipara imo kopi. Ewto po rma exitaw so iito nasî eper̂a, rooma marha okwe. Mararî pono komo waihyaxe kacipara imo ke. Ewto po rma exitaw so eper̂a nasî iito n̂examro pen yermomn̂e wara, rooma marha nasî ermomn̂e wara kopi.

16 Waipîn komo rma cetu îh pona so etîmtoxapu komo ciki. Iito tak nîwracexe. Potkuku wara mak n̂esencexe, woskara pono wara. Ero wara nîwracexe kicicme cehtoponhîrî komo poyero.

17 Kar̂pera tak n̂ehtîkesî n̂examro yamorî. Kar̂pera marha nasî osokmuru komo, xukrano wara mak okwe. Ero wara naxe ahnoro iitono komo.

18 Kumixitho mak namruyaxe. Erahtîmtopo komo marha nasî ponon komo wara. Tîhyapamsom me mak n̂esenpexe. Yîhpora so naxe ahnoro.

19 Cemyawnonhîrî tak nar̂mexe esama yaka, prata. Yukpurukpuruntho wara tak nasî ooru hara emyawnonhîrî komo. Yukurun mera ro mak nasî prata, ooru marha, emyawno komo. Kporin komo yîrwonîmtopo me exitaw yukurun komo me exihra ro mak nasî ero yipu okwe. Yîroman komo yerepotanmetopo mera thakwa nasî ooru, prata komo, wethîrî komo yakan mera thakwa nas okwe. Kicicitho poko pohkan̂e komo me mak xakn̂e ero yipu okwe.

20 N̂ehcoyoponketken̂e mak cemyawno komo poko, ooru poko, prata poko. Ero rma tko n̂iir̂atken̂e ponaro cehtopo komo me. Poxumnîtho me ro mak n̂iir̂atken̂e kica. Ero ke ero yipu rma wiir̂akn̂e xapari wetî wara ro mak yîwya so, poxumnîtho me xa tak.

21 Ero rma wîmyasî anarî yana komo ya yînarîrî komo me. Roowo poko hakno komo ya wîmyasî kicicitho komo ya. N̂examro ya wîmyas oyanan pen komo yemyawnonho, prata mko, ooru mko marha. Ero tak nîwîrîmexe ahsîce.

22 Anana cewruno wara wasî oyanan komo yenîn̂e mera tak. Ero ke omînî ro nîwîrîmexe okwe kir̂wanînhîrî. Ero yaka n̂ewomyaxe cen̂epan̂em komo yîwîrîmachome kica.

23 Kanawa mici warai ehcoko. Kir̂wan pen komo kamxukutho ken̂e xa nasî arowon komo miya ro mak mapitaka roro. Mer̂pora naxe waihkano rin̂enho komo Xerusaren po marha.

24 Xenciu komo tak wekyasî, kicicitho komo xa. N̂examro tak naxe Xerusen pononho komo mîntho yahsîn̂e me. Noro pîntho me tak wiir̂asî cehcoyoponkaxmunhîrî komo, karitînhîrî kom ha. N̂etwîrîmesî tak anarî ro poko ehtoponhîrî komo.

25 Pona erahtîmtopo mokuche waapa komo, n̂examro tawakeretopo nukukmexe re. Etawakeren me thakwa tko naxe waapa komo okwe.

26 Anarî kaamo po yîwîrîmacho komo n̂epor̂asî, enmapuche hara yîwîrîmacho komo xa hara nai anarî men hara okwe. Tapota marha n̂esencesî roro ahwokacho komo. Weronomano rin̂e yaka cexe Kaanî mtapotarî yentaxi cma re. Entara rma tko naxe okwe. Kaan ya kpanatanmetopo yekatîmra tak naxe Kaan ya tîmsom pokono komo rma okwe. Akîhreno cirihra marha naxe poritomo komo.

27 Nîwracesî tak kayaritomo. Ahwora ro mak naxe antomano rin̂e komo exihra exirî ke yînantomarî komo. Namotatanaxe tak yînantomarî komo. N̂examro yehtoponho yaw roro rma n̂examro wîîr̂as hara. Ero wara kesepanîyasî. Yaaro rma n̂examro pen wîwîrîmesî. Ero yimaw on wara tak kexe opoko, Kporin komo xa Mîk ham ero wara kiin̂e komo okwe, kexe. Ero wara kexe.