Taa, on wara wîxakn̂e anarî kaamo po. 6 cimn̂ipu tak xakn̂e ero yimaw iito amna yehtoponho Xerusaren poi mohxapunhîrî. 6-înhîrî nuun̂i po omîn yaw wîxakn̂e ceremaxi. 5-nhîrî kaamo po iito wîxakn̂e. Iito marha xatken̂e Xuta poritomon komo ceremaxi oyepatai. Ero wa oyexitaw oyahsîn̂e wara tak xakn̂e Kporin komo Kaan.

2 Ero ke tooto warai ween̂akn̂e wehto me cehsom mak ha tko. Noro wetho n̂esennpekn̂e wehto wara. Ero wara rma xakn̂e yupun roowo pona roro wehto, wara n̂esenpekn̂e. Noro yawrutarî xakn̂e sîîpo wara hara, ero wara Noro n̂esenpekn̂e.

3 Noro tak napockanwakn̂e owece. Tamorî warai ke oyahsîyakn̂e ohpoci poko. Ero wa oyanîmyakn̂e Kaan Yekatî kahsî. Miya oyan̂e wara xakn̂e Xerusaren pona. Ero wara mak n̂esenpekn̂e. Ero wara enîn̂e me oriyakn̂e Kaan. Kaan mîn yaka oyar̂akn̂e ero roron pona rakatawno pona. Mehxa waaca metatan ween̂akn̂e nohce n̂ixan. Ero metata wararî xakn̂e onoke na me ciixaputho. Kaanî rwonmekn̂e me ro mak mîn xakn̂e kica, tîyanan komo yewyomacho ke yîrwonmekn̂e ha.

4 Iito marha oyepataw ween̂akn̂e Kaan weyuru, ponaro Ixaw Yana komo weyuru. Pahxa ween̂akn̂e woskara po ero warai xa marha ween̂akn̂e xa hara.

5 Ero yinhîrî on wara kekn̂e Kporin komo owya, Ai, tooto xîkrî, nohce yaw roro enko, kekn̂e. Ero ke iina ween̂akn̂e. Iito ween̂akn̂e metata Kaan ya tîmsom yakn̂itopo yaka kewomtopo. Iito marha onoke na me ciixaputho ween̂akn̂e metata mehxa nohce n̂ixa. Kaanî rwonmetopo xa mîn xakn̂e enporixaputho kica. Tîyanan komo yewyomacho ke yîrwonmekn̂e me xakn̂e. Ero yipu ween̂akn̂e.

6 Ero yimaw on wara kekn̂e owya Kporin komo, Ai, tooto xîkrî, meen̂a tak na tantono komo n̂iritho? Kicicitho me ro mak naxe Ixaw Yana komo tan kica. Ero poko exirî ke so oyen̂epen̂e me thakwa naxe miya omîn yai okwe. Miya xenî xa tak meen̂as amn̂e kicicitho xa tak kica.

7 Ero yinhîrî oyar̂akn̂e Kaan mîn roron metatan yaka. Iito ewtarî ween̂akn̂e Kaan mîn wacan yaw. Cetawkaxi xakn̂e.

8 On wara kekn̂e Kporin komo owya, Tooto xîkrî, ahtoko n̂he, waaca n̂he awkakî porin me, kekn̂e. Ero ke wahcekn̂e. Iina ahtoche owya anarî tak ween̂akn̂e metata.

9 On wara kekn̂e owya, Mîîmo yaka ewomko. Kicicme ro mak n̂examro yehtopo enta, kicicitho poko ehtopo komo kica, kekn̂e owya.

10 Ero ke kewomyakn̂e entome. Iito mewrexapu mko ween̂akn̂e yaake. Mîk hak mewrexapu xakn̂e iito, kar̂wa warai, okoi warai, mîk hak ween̂akn̂e keskan̂e komo marha oko. Noro warai ween̂akn̂e mewrexapu. Ahnoro ween̂akn̂e ponaro Ixaw Yana komo yehtopo iito. Mewrexapu mîn ween̂akn̂e Kaan mîn wacan poko tapomritîkaxi ro.

11 Ixaw Yana komo poritomon komo ween̂akn̂e 70. Mewrexapu wece cewru xatken̂e. N̂examro chew n̂ecececekn̂e Xaasan̂ias, Sapan mumuru. Ahnoro xatken̂e kotoporem yakn̂itopo ke cemyarke so. Ero yipu yai yîsîn pen nawomyakn̂e kotoporem.

12 On wara kekn̂e tooto warai owya, Tooto xîkrî, Ixaw Yana poritomon komo yehtopo menwo? Awarpanaw mak ciixaputho poko naxe, tîmîn yawno poko. On wara kexe, Kenîhra ro mak nasî Kporin komo. Krowon poi cekn̂e ro mak Noro, kexe kica, kekn̂e.

13 On wara marha kekn̂e oyekn̂e owya, Taa, amoko xiya hara. Miya xenî tko meen̂as amn̂e kicicitho n̂he kica, kekn̂e.

14 Ero yinhîrî oyar̂akn̂e Kporin komo mîn metatan yaka hara, nohce n̂ixan yaka. Iito wooxam komo ween̂akn̂e ceremaxi so. Tamus pînîn yaw nîwracetken̂e kica.

15 On wara kekn̂e Noro owya, Tooto xîkrî, moxam yehtopo meen̂a? Taa, miya xenî rma ka meen̂as amn̂e kicicme n̂he tak, kekn̂e owya.

16 Ero yinhîrî oyar̂akn̂e Noro rma Kporin komo mîn roron pona xa hara, rakatawno pona. Iito xakn̂e Kaan mîn metatan. Iito marha xakn̂e Kaan mîn mahremacho. Xehxa n̂he xakn̂e Kaan ya tîmsom yakn̂itopo. Ero yotaw xatken̂e kîrkomo, 25. Yîmkarî komo xakn̂e Kporin komo mîn wece. Resce yaw roro cewru xatken̂e. Kaamo wece nutupenwatken̂e resce yaw roro. Ero yakro nîmtapowatken̂e. Tporinî ro me n̂etahcatken̂e kica. Ero wara xatken̂e kica.

17 Ero yinhîrî on wara kekn̂e owya oyan̂e, Tooto xîkrî, moxam yehtopo meen̂a? Kicicme cik natu Xuta komo wahra mak, kacho me ma re nai? Pîra ro makî. Kicicitho poko ro mak naxe kica Kporin komo mîn yaw? Waihkano meero n̂iir̂axe okwe. Miyan komo rma waihkexe tîrowon mapitawno komo meero. Ero yinhîrî tak mokyaxe oona hara orwonmetome ro mak kica. Weewe peremru marha n̂iir̂axe cewnarî yakan me owîrîyakacho kica.

18 Ero ke n̂examro wen̂ekesî orwon me oko. Tîpîn̂e enîhra so ro mak tak wasî. N̂examro yîmtora wasî, yîpînîn yaw so exihra ro mak wasî. Oyakro rma na nîmtapowatu, kar̂pe xa na nîmtapowatu opanarî yaka xa. Wara rma yîmtapotarî komo yentara ro mak wasî, kekn̂e. Ero wa kekn̂e owya oyan̂e.