Ero yinhîrî oyan̂e mtapotarî wencekn̂e xa hara, kar̂pe kekn̂e. On wara kekn̂e, Ai, ewto yenîn̂e komo amyamro, waihkano ritopo ke cemyarke so amohcoko, kekn̂e.

2 Ero ke 6 ween̂akn̂e kîrkomo. Waaca metatan n̂ixa mokyatken̂e îh pono n̂ixa, nohce n̂ixa. Watma ke cemyarke so mokyatken̂e. N̂examro yakro mokyakn̂e anarî hara tooto, riin̂u kahxapu yawno. Noro yaan̂apotun yaw xakn̂e karita mewretopo. N̂examro mokyatken̂e Kporin komo mîn roron pona. Tîmsom yakn̂itopo mîtkoso n̂ecececetken̂e, bronse ciixapu mîtkoso.

3 Ero yimaw Kaan weyuru tak xakn̂e anato, ponaro Ixaw Yana komo yehtopo weyuru. Kerubin yepoyinonho nawomyakn̂e. Kaan mîn potaka cekn̂e. Ero yinhîrî riin̂u ke tponoyem yakro nîmtapowakn̂e Kporin komo, karita mewretopo ke cemyarkem yakro.

4 On wara kekn̂e yîwya, esama yaw so etoko, Xerusaren pore etariko. Iito anarî komo meen̂asî ahwokaxapu komo, tîwrataxmu kom ha. Kicicitho poko ro mak naxe opoyino komo, tantono komo okwe. Okwe ro mak okwe, kan̂e komo meen̂asî. Ero warai komo perî poko see kasko mewretopo ke. Ero wa men kasko, kekn̂e.

5 Ero yinhîrî noro yakrono komo yakro nîmtapowakn̂e hara. On̂entarî me rma kekn̂e. On wara kekn̂e yîwya so, Taa, amyamro hara etocoko noro wenari. Ewto poko hak etocoko waihkano riso. Twaihkaxmu komo pînîn yaw exihra ro mak ehcoko. Moso mak wîmcesî, kahra ro mak ehcoko.

6 Poritomo pen komo waihkakî, kar̂pamxan pen komo, emasî pen komo, wooxam pen komo, rikomo pen komo, ero warai kom ha. Pemewrexapu komo tko apehra ro mak men ehcoko. Tan ka waihkano ritopo yihcicoko omîn mîtwono komo poko rma, kekn̂e. Ero wa kekn̂e oyan̂e yîwya so. Ero ke yihcirî me ka poritomo pen komo waihketken̂e Kaan mîn mîtwono pen kom ha ka.

7 Ero yinhîrî on wara kekn̂e hara yîwya so, Kaan mîn yîwîrîmacoko. Anwaikathîrî komo yokoputho yihxiko omîn roron pona. Mer̂pora ehcoko. Ero yinhîrî miya n̂he etocoko, kekn̂e. Ero ke miya tak cetken̂e. Waihkano n̂iir̂atken̂e ewto pono pen komo.

8 Taa, waihkano ciir̂ataw yîwya so iito rma ketînomyakn̂e cewn̂e. Kesewnapekn̂e tak. On wara wîîkekn̂e Kaan ya, Ai, Apa kah yawno, ahnoro Ixaw Yana pen komo mîwaiketîke etîmtoxapu komo meero okwe? Tîrwon̂e me xa Xerusaren pono pen komo mîwaike? Ahnoro ro mak mîwaiketîke okwe? wîîkekn̂e.

9 On wara kekn̂e Noro owya, Kicicme ro mak naxe Ixaw Yana komo, Xuta komo marha. Miya so nasî yînwaikathîrî komo kamxukutho yîrowon komo poko hak okwe. Mer̂pora ro mak naxe tan ewto po kicicitho poko ehtoponhîrî komo okwe. On wara kexe kica, Tîrowonthîrî tak nahsîpînkai Kporin kom ham. Kehtopo komo yenîhra ro mak tak nasî, kexe kica.

10 Ero ke tîpîn̂e n̂examro yenîhra ro mak wasî. Okwe, moxam wîmces okwe, kahra ro mak wasî. N̂examro wemetanmekyasî ehtoponhîrî komo yaw roro rma, kekn̂e owya. Ero wa kekn̂e oyan̂e owya.

11 Ero yinhîrî mokyakn̂e hara karita mewretopo ke cemyarkem. On wara kekn̂e noro oyan̂e ya, Apa, amtapotachonhîrî yaw roro rma wiirî, kekn̂e. Ero wara kekn̂e.