Ero yinhîrî tak kahsî ween̂akn̂e hara. Iito tak ween̂akn̂e kayaritomo yapon warai sapira ciixapu. Kaw xakn̂e kah yaw, kerubin komo yepoi.

2 Ero yimaw riin̂u kahxapu yawno yakro nîmtapowakn̂e xa hara oyan̂e. On wara kekn̂e yîwya, Ai, tarara tarî warai cheka etoko, kerubin makatawno cheka. Iito kerubin chew nasî wehto roron. Ero amehko mer̂pora n̂he awemyaw. Amekîche miya so ar̂makî. Akpakî ro mak ewto poko hakî, kekn̂e yîwya. Ero ke tarara tarî cheka cekn̂e noro owero ro.

3 Iina ewomyataw iito rma xatken̂e kerubin komo Kaan mîn mîtwo suu n̂ixa. Ero yimaw marha kaweresî ken̂e tak xakn̂e Kaan mîn roron, rakatawno ha.

4 Ero yimaw tak Kporin komo weyuru nawomyakn̂e kerubin yepoyinonho. Morona cekn̂e Kporin komo mîn metataka. Ero yimaw tawronohkatîkaxi xakn̂e Kaan mîn kaweresî ke. Kaan mîn roron xakn̂e tawronohkatîkaxi Kporin komo weyuru ke hara.

5 Mooxe n̂he n̂esencekn̂e kerubin yaporî powpow kacho. Kaan mîn roron pona roro n̂esencekn̂e, yîmkaino pona roro marha. Kar̂pe nîyorwakn̂e Kaanî mtapotarî wara rma, Karitî ro mtapotarî wara ha.

6 Taa, ero wara riin̂u kahxapu yawno yantomache, Wehto roron amehko kerubin chewnonho, kache yîwya cekn̂e tak noro kerubin yaka. Iito n̂ecececekn̂e tarara tarî mîtwo.

7 Ero yinhîrî n̂etapoyankekn̂e tak anarî kerubin wehto wece, tîchewno komo wece. Ero poi namekyakn̂e. Riin̂u kahxapu yawno yamorî yaka n̂iir̂akn̂e. Ero yahsîche mîîmo yai tak n̂epatakekn̂e riin̂u kahxapu yawno.

8 On wara xatken̂e kerubin komo, aporî makataw so n̂esenpekn̂e tooto yamorî warai. Ero wara xatken̂e.

9 Ero yinhîrî kerubin komo ween̂akn̂e xa hara. N̂examro mîtwo so xakn̂e tarara tarî, 4. Cewn̂e so xakn̂e tarara tarî kerubin panaw so. Pepeyure so xakn̂e tarara tarî, beriru wara.

10 Etîme re n̂esenpekn̂e tarara tarî. Taknoye re so xakn̂e, wahrai xakn̂e porin yaw.

11 Miya so cekn̂e tarara tarî, kerubin n̂een̂atken̂e iina so cetken̂e. Nohce yaw roro een̂ataw so kerubin iina cekn̂e tarara tarî. Suu yaw roro cekn̂e anarimaw, resce yaw roro anarimaw, oesce yaw roro anarimaw, ero wa so cekn̂e tarara tarî anarimaw so. Kerubin n̂een̂atken̂e ero yaw roro rma cekn̂e tarara tarî. Ahce wece na n̂een̂atken̂e kerubin yewru iina so cetken̂e kerubin. Pataw so mak cetken̂e ekor̂mara ro mak.

12 Cewke so xakn̂e kerubin komo pun ahnoro. Ero wa xakn̂e yîmkarî poko, amorî poko, aporî poko, tawronohkatîkaxi mak xakn̂e yupun komo yewru ke. Ero wara marha xakn̂e tarara tarî, 4 ha. Cewke so xa marha xakn̂e mer̂pono pîn ke.

13 Ero yimaw tooto mtapotarî warai wencekn̂e tarara tarî yetacitopo. Tarara tarî amoro, kekn̂e yîwya so on̂entarî me.

14 On wara xatken̂e kerubin komo, 4 so xakn̂e eepatarî komo. Kerubin yepatake so xatken̂e, tooto yepatake so marha xatken̂e, reaw yepatake so marha xatken̂e, yaimo yepatake so marha xatken̂e. Ero wa xakn̂e kerubin komo yeepatarî.

15 Ero yinhîrî kahsî takî nawomyatken̂e kerubin komo. N̂examro rma ween̂akn̂e pahxa n̂he Keba yecihtaw oyexitaw, onok na komo, kacho owya. Kerubin mîkyam xatken̂e.

16 Kerubin komo cetaw tarara tarî marha cekn̂e akro so. Panaw roro so rma cekn̂e. Powpow ketaw kerubin komo tawomtome so panaw so rma nawomyakn̂e tarara tarî hara. Etînomra ro mak xakn̂e tarara tarî.

17 Cecececetaw so kerubin komo n̂ecececekn̂e xa marha tarara tarî hara. Awomyataw so kerubin komo, akro so rma nawomyakn̂e tarara tarî. Mîk hak warai komo yekatî xakn̂e tarara tarî yaw so marha. Ero ke akro so cekn̂e roro. Ero wa cetken̂e.

18 Ero yinhîrî Kaan mîn potai tak cekn̂e hara Kporin komo weyuru. Kerubin yepona cekn̂e hara. Iito tak n̂ecececekn̂e.

19 Ero yinhîrî on wara xatken̂e kerubin komo owero ro rma, powpow ketken̂e tak roowo poi tawomtome so. Awomyataw so tarara tarî nawomyakn̂e akro so. Kaan mîn wacan potaw nîtîtmamyatken̂e kerubin komo, resce n̂ixan potaw. Kaan weyuru rma xakn̂e epoi so, ponaro Ixaw Yana komo yehtopo weyuru.

20 Pahxa n̂he onok na komo ween̂akn̂e Keba yecihtaw oyexitaw. Kaan makataw xatken̂e, ponaro Ixaw Yana komo yehtopo makataw. Kerubin xa mîkyam xatken̂e ham, wîîkekn̂e tak ero yimaw.

21 4 ke cepatake so xatken̂e, 4 ke marha tapoke so marha xatken̂e. Aporî komo makataw so xakn̂e tooto yamorî warai.

22 Etîme re n̂esenpekn̂e eepatarî komo, pahxa on̂enîtho komo yepatarî wara rma. Keba yecihtaw ween̂akn̂e n̂examro yepatake so rma xakn̂e. Etîme re xakn̂e eepatarî komo, etîme re marha xakn̂e yupun komo. N̂examro cetaw pataw mak cetken̂e ceepatai so rma. Ero wara cetken̂e kerubin komo.