Ero yinhîrî oyanîmyakn̂e xa hara Kaan Yekatî. Kporin komo mîn potaka xa oyar̂akn̂e, resce n̂ixan potaka. Iito tak kîrkomo ween̂akn̂e, 25. Metataw xatken̂e. Iito ween̂akn̂e Xaasan̂ias, Asu mumuru, Peracias marha, Benaia mumuru, anarî komo yakro iito xatken̂e n̂examro. Antomano rin̂e komo mîkyam xatken̂e.

2 On wara kekn̂e Kaan Yekatî owya, Tooto xîkrî, kicicitho poko cesentaxmu komo moxam. On ewto pono komo yakîhren̂e tî re moxam akpîkano rin̂e me xa matko naxe kica.

3 On wara kexe tpoyino komo ya, Oroto ka kîmîn komo ciitopo mera nasî. Tahrem wara nasî on kewton komo, wooto wara taxe kîwyam on pono komo, tahrem yawno wara, kexe kica.

4 Ero ke n̂examro yîwîrîmacho ekatîmko amoro tooto xîkrî. Ekatîmko men, kekn̂e owya.

5 Ero yinhîrî tak Kaan Yekatî mokyakn̂e xa hara oropotaka. On wara kekn̂e hara owya, Ai, tooto xîkrî, on wara kasko apoyino komo ya, Ai Ixaw Yana komo amyamro, on wara kesî Kporin komo awya so, On wara mîmtapowaxe. Awesehtînotopo komo rma tko wîhtînoyasî.

6 On ewto pono pen komo rma mîwaiketken̂e mer̂pora ro mak okwe. Esama mko mawronohketîketken̂e anwaikathîrî pen komo yokoputho ke okwe.

7 Ero ke on wara kesî Aporin komo Kaan awya so, Tooto pen yokoputho mar̂metken̂e iina ero rma nasî wooto warai me. On ewto nasî tahrem warai me hara. Miya so tko ken̂epexe so on ewto poi kr̂a tak.

8 Waapa pona meraswaxe tîkaciparayem komo pona. Noro yipu komo rma tko wekyasî awaikan̂e komo rma, kesî Aporin komo Kaan.

9 On ewto poi ken̂epexe so. Kahsîpexe so marha anarî yana komo ya. Kemetanmekyaxe so okwe awehtoponhîrî komo yepetho me ha.

10 Mîwaiyaxe tak kacipara ke. Kicicme awehtoponhîrî komo poko ken̂ekexe so meye Ixaw Yana komo rowon wokpan yaw xa. Ero yimaw on wara mîîkexe opoko, Kporin komo xa Mîk ham ken̂ekan̂e, mîîkexe.

11 Tahrem warahra tak nasî on ewto awen komo mera. Wooto warahra marha tak maxe amyamro hara on ewto pono komo. Meye xa awehtoponhîrî komo poko ken̂ekexe so, Ixaw Yana komo rowon wokpan yaw.

12 Ero yimaw on wara tak mîîkexe opoko, Kporin komo xa Mîk ham ken̂ekan̂e, mîîkexe. Omtapotarî yewetîra mîxatken̂e apanatanmetopo komo. Anarî yana komo yehtopo poko xa matko mîpohnatken̂e, amîtwono komo yehtopo poko, kasko yîwya so, kekn̂e owya. Ero wara kekn̂e Kaan Yekatî owya.

13 Taa, ero wara ekatîmyataw rma owya waihyakn̂e tak okwe Peracias, Benaia mumutho pen. Ero ke tak kesewnapekn̂e. Kaan yakro kîmtapowakn̂e, kar̂pe wîîkekn̂e yîwya. Okwe Apa Kaan, Ixaw Yana komo ma mîwaiketîke asak maknonhîrî pen komo okwe? wîîkekn̂e yîwya.

14-15 Ero ke on wara kekn̂e Kporin komo owya, Ai, tooto xîkrî, on wara kexe Xerusaren pono komo apoyino komo poko, awakno komo poko xa kexe on wara, Mooxe ehcoko amyamro Kporin komo yai. Amna yeken me mak nîmye on roowo, kexe.

16 Ero ke on wara kasko yîwya so, Xerusaren pono komo ya, Yaaro rma re mooxe n̂examro wen̂epekn̂e anarî yana komo cheka. Mîk hak yana cheka n̂examro wakpayakn̂e. Wara rma n̂examro mîn wara rma wasî iito exitaw so mîk hak rowon pono komo chew.

17 Ero ke on wara kasko apoyino komo ya waapa narîtho komo ya, Ai oyakno komo on wara kesî Kporin komo Kaan awya so, Miya so metakpayatken̂e anarî yana komo cheka, mîk hak rowon pono komo cheka. En̂exa rma tko kekyaxe so hara. Ixaw Yana komo rowon wîmyas hara awya so aweken komo me, kasko yîwya so.

18 Iina men cexe hara. Iito cexitaw so tak kicicitho mko kr̂a nar̂mexe, yiixera ro mak oyehtopo mko ha.

19 Ero yimaw cewn̂e yatî cesehtînosom me tak wiir̂asî n̂examro ropotarî. Yaxan wiir̂asî ekatî komo yîropotaka so. Toopu wara ka nasî yîropotarî komo oroto. Erotho wowyasî, ekenhîrî na tak tooto pun me cehsom wiir̂asî yîropotarî kom hara.

20 Ero yimaw tak omtapotarî n̂ewehcaxe tpanatametopo kom ha. Tîtwermacho komo ponaro xa tak naxe. Oyanan me tak naxe okre. Ponaro n̂examro yehtopo me tak was Ow hara.

21 Anarî komo reha naxe kicicitho mko ponaro rma okwe, yiixera ro mak oyehtopo mko ponaro. Noro yipu komo yehtoponho yaw roro rma wemetanmekyasî, kesî Aporin komo Kaan, kasko yîwya so, kekn̂e owya.

22 Ero yinhîrî on wara xatken̂e kerubin komo, tarara tarî ke tpanawnoyem komo, powpow ketken̂e xa hara taporî ke so. N̂examro yepoi rma xakn̂e Kporin komo weyuru oco.

23 Nawomyakn̂e tak Kporin komo weyuru. Ewto po exihra tak xakn̂e. Îh po mak nîtîtmamyakn̂e resce n̂ixan po.

24 Ero yinhîrî oyanîmyakn̂e xa hara Kaan Yekatî. Oyar̂akn̂e Babiron̂a pona hara, waapa nahsîtho komo cheka hara. Ero wara owtotopo wara n̂esenpekn̂e, Kaan Yekatî n̂enpotho owya. Ero yinhîrî Noro n̂enpotho nawomyakn̂e hara. Enîhra tak wîxakn̂e okwe.

25 Ero yinhîrî wekatîmtîkekn̂e iitono komo ya, waapa nahsîtho komo ya. Owya n̂enpekn̂e Kporin komo ero wekatîmtîkekn̂e yîwya so. Ero wara wekatîmyakn̂e.