1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes awya, kanwekn̂e komo chewno me mas okwe. Cewkemu rma re mîkyam. Enîhra tko naxe okwe. Tpanakemu rma re mîkyam. Entara rma tko naxe okwe. Kanwekn̂e ro mak mîkyam ham okwe.

3 Ero ke on wara wîîkes awya, awci yaka enkakî awemyawno waapa narîrî wara. Enkapuche amîn yai epatakakî katpanaw n̂examro wero ro rma. Anana etoko amîn yai. Ero wara awesenpotopo ponaro na natu. Kanwekn̂e me rma naxe, wara rma ero ponaro rma na natu.

4 Katpanaw rma n̂examro wero ro eeko awemyawno katpanaka. Awci yaka enkaxapu eeko. Waapa narîrî wara rma awemyawno enkakî. Kokon̂i tak n̂examro wero ro rma epatakakî waapa narîrî wara.

5 N̂examro wero ro rma ewto wacan awkakî. Ewtarî yaro tak arko awemyawno.

6 Amotaka anîmko awemyawno n̂examro wero ro. Awarpantaporo exitaw ero wara esenpoko. Poono ke awewru ahruko roowo yenîhra awehtome. Ixaw Yana komo yehtopo kuknon me kiirî. Ero ke ero wa esko, kekn̂e owya.

7 Ero ke Kporin komo mtapotarî yaw roro rma wîxakn̂e. Katpanaw rma oyemyawno wen̂emhatakekn̂e. Enkaxapu wen̂emhatakekn̂e waapa narîrî wara. Kokon̂i tak ewto wacan wawkekn̂e oyamorî ke rma. Awarapantaporo exitaw oyemyawno waar̂akn̂e. Omotaw waar̂akn̂e n̂examro wero ro rma. Ero wara wîxakn̂e.

8-9 Enmapuche tak hara on wara wencekn̂e Kporin komo mtapotarî, Ai tooto xîkrî, Ahce wa ketken̂e Ixaw Yana komo awya, kanwekn̂e kom ha? Ahce poko mai kopi? kahra xatken̂e awya?

10 On wara kasko hara yîwya so, On wara kesî Aporin komo Kaan awya so, Kayaritomo kuknon me ero wara kesenpekn̂e, Xerusaren pono komo kayaritomon kuknon me ha. Ahnoro Ixaw Yana komo kuknon me kesenpoi marha iitono komo kuknon me.

11 On wara kasko yîwya so, Ero wara kesenpoi Xerusaren pono komo yehtopo yenpotome awya so. Owî kesenpoi ero wara rma emetanmexapu me naxe. N̂examro pen naar̂axe waapa anarî roowo pona. Ahsîpînkan me ro mak nahsîyaxe okwe.

12 Awarpantaporo exitaw on wara nas iitono komo kayaritomon, cemyawno naar̂asî tmotaw. Ewto poi n̂epatakesî. Ewto wacan nawkexe noro yepatakachome. Cewru tko nahruyasî roowo yenîhra ro mak cehtome.

13 Omîyen wiir̂asî noro pen yemcinotopo me. Ero yaka rma n̂emciyas okwe. Babiron̂a pona noro waar̂asî, Kawtew komo rowon pona. Roowo yenîhra rma tko nasî. Iito tak waihyas okwe.

14 Miya so ro mak wakpesî noro yakrononho komo, noro maywen komo, antomano rin̂e komo, sowtatu komo marha. N̂examro pen meero Ow wenatîkesî kacipara imo ke waihkachome so owya.

15 Mîk hak rowon pono komo cheka n̂examro pen wakpesî, anarî yana komo cheka. Ero yimaw on wara kexe opoko, Kporin komo xa Mîk ham kakpexe so, kexe tak opoko.

16 N̂examro poyinonho rma tko wîmcesî waihkara so kacipara imo ke, rooma ke, eper̂a ke. Iito so cexitaw onok na rowon pona toxapu komo on wara tak kexe, Kicicitho pokononho xa kîwyam okwe, kexe. Ero yimaw on wara kexe opoko, Kporin komo xa Mîk ham, kexe, kekn̂e. Ero wara kekn̂e Kporin komo owya.

17-18 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara marha wîîkes awya, atatanîmko aweseresmetaw, awokru yeer̂ataw marha. Cerahsom wara atatanîmko.

19 On wara kasko iitono komo ya, Ai oyakno komo, on wara kesî Kporin komo Kaan awya so, On wara men naxe amn̂e Xerusaren pono komo, Ixaw Yana rowon pono komo ahnoro, cerahso ro mak n̂eseresmexe, ahwora marha twokru komo n̂eer̂axe tuuna. N̂etînakexe ro mak iitono komo, yutunarî komo marha wahra xa nasî. Ero wara nasî waihkano rin̂e me exirî ke iitono komo okwe.

20 Wemronho me tak nasî ewtonthîrî komo. Pohnî me tak nasî yîrowonthîrî komo okwe. Ero yimaw on wara mîîkexe opoko, Kporin komo xa Mîk ham kemetanmekyaxe so, mîîkexe, kasko yîwya so, kekn̂e owya.

21-22 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, Ahce wa ketu Ixaw Yana komo takîhretopo komo tî re tîrowon komo pokono? Pahkî mexe n̂enmayasî. Enîn̂e komo n̂enîtho yaw rorohra mexe tasî, kexe kica.

23 Ero ke on wara kasko yîwya so, On wara men kesî Kporin komo Kaan, ero wara kan̂e komo wîtîtmamnoyasî. Ero wa kahra tak naxe Ixaw Yana komo. On wara xa matko kasko yîwya so, Pahnoke tak men nasî enîn̂e komo n̂enîtho yaw roro rma tak awitopo komo.

24 Ero yimaw tohnaw ekatîmra tak naxe enîn̂e komo. Kukurunpexe so rma Kporin komo, kacho yentara naxe Ixaw Yana komo.

25 Ero yimaw Owî rma Aporin komo, awehtopo komo wekatîmyas awya so oyanme ro. Ero wa kacho yaw roro rma tak nasî ecmamra ro mak. Waipîra rma ka awexitaw so omtapotachonho yaw roro rma tak kiir̂axe so, wîîkes awya so Ow, Aporin komo Kaan. Kanwekn̂e ro mak amyamro ham okwe, kasko yîwya so, kekn̂e.

26-27 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, Entakî Ixaw Yana komo mtapotarî. On wara kexe apoko, Kaan ya kîwîrîmacho komo rma re n̂een̂a Esekiew. Pahxarono pokono mak mîn n̂een̂asî, kwenatîwono komo yîwîrîmacho mak, kexe okwe.

28 Ero ke on wara kasko yîwya so, On wara men kesî Kporin komo Kaan awya so, Ecmamra tak men nas omtapotachonho yaw roro ciino ritopo. Yohno men ciino wiir̂asî omtapotachonho yaw roro, kes awya so, kasko yîwya so, kekn̂e. Ero wara kekn̂e Kporin komo owya.