1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, iito naxe Ixaw Yana weronoman̂e komo. Tîmtapotarî komo rma tko n̂ekatîmyaxe, tanme ro so tînîhtînoputhîrî komo mak kica. On wara tko kexe, Ai, oyakno komo, entacoko ka, Kporin komo mtapotarî wekatîmyas awya so, kexe kica.

3 On wara wîîkesî, Aporin komo Kaan Owî, n̂etwîrîmexe men okwe ero wa kan̂e komo. Akpîra cesehtînosom mak mîkyam, weronomano rin̂e komo. Cekatî rma kyam mak n̂ewehcaxe. On̂enporî yenîhra ro mak naxe.

4 Okwe, wîîkesî apoko so Ixaw Yana komo. Rokohci wara mak naxe apoyino komo, aweronoman̂e kom ha. Ecahxaputho yawno wara naxe mîîmotho yawno wara. Ero wara naxe okwe.

5 On wara maxe okwe amyamro tohnaw ekatîmn̂e komo, tohra mîxatken̂e Ixaw Yana komo wacan yaka etawkaxaputho yaka ahruso hara. Etawkaxaputho tahrupore nasî Ixaw Yana komo wacan me ehtome amn̂e etar̂metaw so amn̂e Kporin komo kamon me enmayataw. Ahrura rma tko mîxatken̂e okwe.

6 On wara naxe tohnaw ekatîmn̂e komo, On warai ween̂e, kexe tohnaw ro mak kica. Kaan ya ciino ritopo wîhtînoyasî, kexe marha, cemaronwaxe mak kica. On wara men kesî Kporin komo, kexe, Kporin komo nantomatho pîn komo ro mak. Tîmtapotachonhîrî komo yaw roro ciino ritopo ponaro rma tko naxe kopi.

7 Tohnawno mîn an̂enîthîrî komo kica. Tohnaw ro mak mîhtînoyaxe an̂ekatîmrî komo kica. On wara men kesî Kporin komo, mîîkexe kica yîmtapotara ro mak oyexitaw.

8 Ero ke on wara wîîkes awya so, Aporin komo Kaan Ow wîîkesî. Yaarono pîn mak mekatîmyaxe kica. Cemaro mak mîn an̂enîthîrî komo. Ero ke awîrîman̂e komo me men wasî, wîîkes Ow Aporin komo Kaan.

9 Ero wara weronomano rin̂e komo yîwîrîman̂e me men was okwe. Oyanan komo chew esenmekîra tak men naxe okwe. Karita yaw osotî komo mewrera ro mak nas amn̂e, Ixaw Yana komo Yosotî Tan, kacho yaw. Ixaw Yana komo rowon pona tohra ro mak naxe. Ero yimaw on wara mîîkexe opoko, Kporin komo Kaan xa Mîk ham, mîîkexe tak.

10 Oyanan komo n̂emîknoyaxe ro mak kica. Cerepore taxe amn̂e, kexe cerepore awehtopo komo exihra ro mak exitaw so. On wara marha naxe. Waaca n̂iir̂axe poyino komo. Ero tak numuturexe tohnaw ekatîmn̂e komo cetowsom ke mak kica.

11 Ero ke on wara kasko cetowsom ke yumuturen̂e komo ya, N̂emacakesî men amn̂e waaca, anmuturethîrî komo. Tuuna mokyasî mer̂pora ro mak, ceipamxapu marha mokyasî porin komo. Nocowonasî marha ocowo imotho ro mak.

12 Ero yinhîrî waaca yemacakache on wara men kexe apoyino komo awya so, Ahto tak nai waaca yumuturetopo an̂irithîrî komo, kexe awya so.

13 Ero ke on wara wîîkes Ow Aporin komo, Kîrwonasî tak apoko so. Ero ke ocowo imo wen̂epes aapo so. Tuuna marha wen̂epesî xukrano, ceipuru marha porin ha. Mer̂pora wen̂epesî awîrîman̂e komo me. Tîrwon̂e xa wen̂epesî.

14 Waaca marha Ow macakesî anumuturethîrî komo. Wakuhr̂apesî ro mak exihra cehso ro. N̂esenpesî tak toopu mko waaca yaponho. Waaca yemacaketaw amyamro meero tak mîwaiyaxe akro ro rma. Ero yimaw on wara mîîkexe opoko, Kporin komo xa Mîk ham, mîîkexe.

15 Ero wa wasî orwon yanme rma. Waacatho Ow mohrakesî, yumuturen̂enhîrî komo wîwîrîmesî marha. Ero yimaw on wara wîîkes awya so, Waaca exihra tak nas okwe, yumuturen̂enhîrî pen komo marha exihra naxe.

16 Ero wa men naxe amn̂e Ixaw Yana weronoman̂e komo. On wara ketken̂e, Cerepore tak taxe amn̂e esemetanmekîra ro makî. Ero wara kehtopo komo ween̂asî, ketken̂e kica awerepotacho komo exihra ro mak exitaw. Ero wa kan̂e komo exihra tak naxe amn̂e, wîîkesî ero yimaw Ow Aporin komo Kaan.

17 Taa, tooto xîkrî, on wara wîîkes hara awya, apoyino komo yemsîrî wece tak enko hara en̂ekachome so. N̂examro marha tî re naxe ekatîmn̂e me. Tanme ro tînîhtînoputhîrî komo marha n̂ekatîmyaxe. N̂examro yîwîrîmacho marha ekatîmko.

18 On wara kasko yîwya so, On wara men kesî Kporin komo Kaan, On wara naxe wooxam komo anarî komo, emeknuwar̂ko poko tîhyasîrî komo natpexe. Xwaraxwarano marha natpexe kawno mko, kawno pînî mko marha. Tooto yeewopontotopo mîn natpexe n̂examro yemcinotome mak kica. Ahce kacho tooto waihkacho ponaro matu, awetkurunpetaw so amyamro hara?

19 Noro pîntho wara Ow menpexe oyanan komo ya. Ero wa n̂examro miir̂axe sepata yahsîtome wahra mak ahsîtome. Awru komo yahsîtome ero wara oyanan komo miir̂axe okwe. Cemaro yentan̂e me rma re naxe oyanan komo okwe. Noro yipu komo ya cemaro mekatîmyaxe kica twaihkaxmu pîn me cehsom komo waihkachome, twaihkaxmu me cehsom komo mukurunpexe waipîra ehtome so hara okwe.

20 Ero ke on wara kesî Kporin komo Kaan awya so, Ahwora ro mak wasî ahyasîrî komo poko. Ero yipu ke tooto yemcinon̂e me maxe, torowo n̂emcinoyaxe kar̂pamxan komo ero wara. Ahce wa wiir̂a ahyasîthîrî komo? Awaporî komo yai kr̂a mohkesî. Tooto pen wowyasî amîyen komo warai yai, torowo warai wowyasî an̂emcinoputhîrî kom ha.

21 Awewoponthîrî marha kr̂a Owî mohkesî. Oyanan komo wowyasî anahsîthîrî komo. An̂emcinorî komo mera tak wiir̂asî. Ero wara oyanan komo wukurunpesî. Ero yimaw on wara mîîkexe opoko, Kporin komo xa Mîk ham, mîîkexe hara.

22 Kir̂wan komo mahwoketken̂e amtapotarî ke, cemaro yekatîmrî ke. Onahwokarî pîn komo mîkyam n̂examro rma mahwoketken̂e. Kicicitho komo marha mahworetken̂e kicicme ehtoponhîrî komo poko rma ehtome so. Kicicme cehtoponhîrî komo yahsîpînkara naxe okwe awanme so rma. Ahsîpînketaw ketaw ha re yîwya so waipîra n̂ehcerî ha re okre.

23 Ero ke tohnawno yenîhra tak maxe ahce wa na tooto yehtopo pokono. Ahyasîrî komo ke tooto yehtopo yîhtînopîra tak maxe amn̂e. Oyanan komo wowyasî ahyai so. Ero yimaw on wara mîîkexe opoko, Kporin komo xa Mîk ham, mîîkexe. Ero wara mîîkexe.